The Disciple-Making Minister in Malayalam

Chapter One

Chapter Two

Chapter Three

Chapter Four

Chapter Five

Chapter Six

Chapter Seven

Chapter Eight

Chapter Nine

Chapter Ten

Chapter Eleven

Chapter Twelve

Chapter Thirteen

Chapter Fourteen

Chapter Fifteen

Chapter Sixteen

Chapter Seventeen

Chapter Eighteen

Chapter Nineteen

Chapter Twenty

Chapter Twenty-One

Chapter Twenty-Two

Chapter Twenty-Three

Chapter Twenty-Four

Chapter Twenty-Five

Chapter Twenty-Six

Chapter Twenty-Seven

Chapter Twenty-Eight

Chapter Twenty-Nine

Chapter Thirty

Chapter Thirty-One

Chapter Thirty-Two

Chapter Thirty-Three

• • Gushyiraho Intego nyayo
• • Gutangira Mu Buryo Bwiza
• • Gukomeza mu buryo bukwiye
• • Amatorero yo mu Ngo
• • Gukura kw’Itorero
• • Umurimo wo Kwigisha
• • Ubusobanuro bwa Bibiliya
• • Yesu yigishiriza ku musozi
• • Umuvugabutumwa Yesu akunda
• • Kuvuka bwa Kabiri
• • Kubatizwa mu Mwuka Wera
• • Abagore mu Murimo w’Imana
• • Gutandukana kw’abashakanye no Kongera Gushaka
• • Imfatiro zo Kwizera
• • Gukiza Indwara Kw’Imana
• • Umurimo Wa Yesu Wo Gukiza Indwara
• • Impano z’Umwuka
• • Impano z’Umurimo
• • Ibyo Kuba Muri Kristo
• • Guhimbaza no Kuramya/Gusenga
• • Umuryango Wa Gikristo
• • Uburyo Bwo Kuyoborwa n’Umwuka
• • Amasakaramentu
• • Guhangana, Kubabarira, no Kwiyunga
• • Guhana k’Umwami
• • Kwiyiriza Ubusa
• • Nyuma y’Ubu Buzima
• • Umugambi w’Imana w’Iteka Ryose
• • Kuzamurwa kw’Itorero n’Ibihe by’Imperuka
• • Ibitekerezo by’Iki Gihe Byerekeye Intambara yo Mu Mwuka, Igice cya 1
• • Ibitekerezo by’Iki Gihe Byerekeye Intambara Yo Mu Mwuka, Igice Cya 2
• • Kuba Umwizerwa/Igisonga
• • Amabanga Y’Ivugabutumwa

Abrahamu amaze kugaragaza ubushake bwe bwo gutamba umwana we akunda cyane Isaka, Imana yamuhaye isezerano:

Kandi mu rubyaro rwawe ni mo amahanga yose yo mu isi azaherwa umugisha kuko wanyumviye (Itang. 22:18).

Intumwa Pawulo avuga ko iri sezerano ryahawe Aburahamu n’urubyaro rwe, mu buke si imbyaro, mu bwinshi, kandi ko urwo rubyaro ruvugwa mu buke ari Kristo (reba Gal. 3:16). Amahanga yose, cyangwa se nk’uko byanditse neza, amoko yose yo mu isi yasezeraniwe guherwa umugisha muri Kristo. Iri sezerano rya Aburahamu ryavugaga n’ibihumbi by’abanyamahanga mu isi yose bizinjira muri iyo migisha yo kuba muri Kristo. Ayo moko atandukanye mu buryo bw’uko atuye mu bice bitandukanye by’isi, bakaba ari imiryango itandukanye, imico itandukanye bakavuga n’indimi zitandukanye. Imana ishaka ko bose baherwa umugisha muri Kristo, ari yo mpamvu Yesu yapfiriye ibyaha by’ab’isi bose (reba 1 Yohana 2:2).

Nubwo Yesu yavuze ko inzira ijya mu bugingo ifunganye, kandi ko abayicamo ari bacye (reba Mat. 7:14), intumwa Yohana yaduhaye kumva ko hari abantu bazaturuka mu moko yose yo mu isi bakinjira mu bwami bw’Imana:

Hanyuma y’ibyo mbona abantu benshi umuntu atabasha kubara, bo mu mahanga yose n’imiryango yose n’amoko yose n’indimi zose, bahagaze imbere ya ya ntebe n’imbere y’Umwana w’Intama, bambaye ibishura byera kandi bafite amashami y’imikindo mu ntoki zabo, bavuga ijwi rirenga bati, “Agakiza ni ak’Imana yacu yicaye ku ntebe n’ak’Umwana w’Intama” (Ibyah. 7:9-10).

Nuko rero abana b’Imana bategerezanyije amatsiko menshi umunsi bazateranyirizwa hamwe imbere y’intebe y’Imana ari ibihumbi byinshi biturutse mu moko yose!

Abamisiyoneri benshi muri iki gihe mu ngamba zabo bitaye cyane ku kugera ku bihumbi by’abantu “basigaye inyuma” mu moko yo mu isi, bafite ibyiringiro byo kuba bashinga itorero ryiza muri buri bwoko bwo muri yo. Ibi rwose ni ibyo gushimwa, kuko Yesu yatubwiye kujya mu isi yose “tugahindura amahanga yose abigishwa (cyangwa, amoko yose)” (Mat. 28:19). Imigambi y’abantu ariko, n’ubwo yaba igamije ibyiza ite, cyane cyane iyo itarimo kuyoborwa n’Umwuka Wera, ishobora akenshi guteza ibibi kurusha ibyiza yazana. Ni ngombwa cyane gukurikiza ubwennge bw’Imana igihe dushaka kubaka ubwami bwayo. Yaduhaye ubundi buryo bw’uko dukwiye kubyifatamo duhindura abantu abigishwa kurusha ibyo tubona gusa muri Matayo 28:19.

Birashoboka ko ikintu gikunze kwirengagizwa cyane n’abo baharanira gusohoza Inshingano Nkuru ari uko Imana ari yo muvugabutumwa mukuru kuruta abandi bose, kandi ko ari gukorana na yo, atari ukuyikorera. Yitaye cyane ku kugeza ubutumwa bwiza ku isi yose kurusha umuntu uwo ari we wese, kandi ibyo ibikorana umwete cyane kurusha uwo ari we wese. Ibyo yarabyitangiye cyane kandi n’ubu irabyitangiye ku buryo yabipfiriye, kandi itararema umuntu n’umwe yari ibifite mu bitekerezo byayo, kandi n’ubu ibifite ku mutima wayo! Ibyo ni byo kwiyemeza ikintu ukakitangira!

“Gufata Isi Ku bwa Kristo”

(“Winning the World For Christ”)

Biratangaje kubona ukuntu iyo dusoma inzandiko zo mu Isezerano Rishya, tudasangamo amagambo yo kwinginga cyane abizera (nk’uko dukunze kubyumva muri iki gihe) basabwa “guhaguruka bakagenda bakageza ubutumwa bwiza mu isi yose ku bwa Kristo!” Abakristo n’abakozi b’Imana ba mbere bumvaga neza ko Imana ihagurukiye cyane gucungura isi, kandi ko umurimo wabo ari ugufatanya na yo bakajya aho ibayoboye. Nta muntu wari usobanukiwe ibi bintu nka Pawulo, we “utararakirijwe agakiza” n’umuntu n’umwe.” Ahubwo yahinduwe no gukora kw’Imana ubwayo nta muntu ikoresheje ubwo yari ari mu nzira ijya Damasiko. Kandi mu gitabo cy’Ibyakozwe cyose tugenda tubona ukuntu itorero rikura biturutse ku bantu buzuye Umwuka Wera bafatanyaga na We akabayobora. Igitabo cy’Ibyakozwe, nubwo gikunze kwitwa “Ibyakozwe n’Intumwa,” mu byukuri cyari gikwiye kwitwa “Ibyakozwe n’Imana.” Luka atangira igitabo cy’Ibyakozwe, yavuze ko inkuru ye ya mbere (Ubutumwa bwiza bumwitirirwa) yavugaga ibyo “Yesu yatangiye gukora byose no kwigisha” (Ibyak 1:1). Biragaragara ko Luka yumvaga ko igitabo cy’Ibyakozwe yari inkuru y’ibyo Yesu yari akomeje gukora no kwigisha. Yakoreraga mu bagaragu be buzuye kandi bayobowe n’Umwuka Wera kandi bemera gufatanya na we.

Niba se abakristo bo mu itorero rya mbere batarahatirwaga cyane “guhaguruka ngo bajye kubwiriza abaturanyi babo kandi bafate isi ku bwa Kristo,” inshingano yabo yari iyhe mu kubaka ubwami bw’Imana? Abatarabaga barahamagariwe by’umwihariko kubwiriza ubutumwa bwiza mu ruhame kandi ngo babe barabiherewe impano (intumwa n’abavugabutumwa) bahamagarirwaga kubaho ubuzima bwejejwe kandi bagandukira Imana, no guhora biteguye kuba bahinyuza umuntu uwo ari we wese wakerensa ibyo gukizwa kwabo. Urugero, Petero yaranditse ati,

Icyakora nubwo mwababazwa babahora gukiranuka, mwaba muhiriwe. Ntimugatinye ibyo babatinyisha kandi ntimuhagarike imitima, ahubwo mwubahe Kristo mu mitima yanyu ko ari we Mwami, kandi mube mwiteguye iteka gusubiza umuntu wese ubabajije impamvu z’ibyiringiro mufite, ariko mufite ubugwaneza, mwubaha kandi mufite imitima itabacira urubanza, kugira ngo nubwo babasebya batuka ingeso zanyu nziza zo muri Kristo bamware (1 Pet. 3:14-16).

Urabona ko Abakristo Petero yandikiraga banyuraga mu bihe byo kurenganywa. Ariko abakristo badahindutse rwose ngo batandukane n’ab’isi, ab’isi (birumvikana) ntibabatoteza. Iyo ni yo mpamvu imwe mu zituma hari ukurenganywa guke cyane mu bice bitandukanye by’isi muri iki gihe–kuko ibyo abitwa abakristo bakora ntaho bitandukaniye n’ibyo abandi bose bakora. Ntabwo mu byukuri ari abakristo na gato, bityo rero ntawe ubatoteza. Nyamara abenshi muri bene abo “bakristo” nib o ku cyumweru bahugurirwa guhaguruka bakajya “gusangira kwizera kwabo n’abaturanyi babo.” Iyo agiye kubwiriza abaturanyi babo, abo baturanyi babo batungurwa no kumva ko (ngo) bavutse ubwa kabiri. Ikirushijeho kuba kibi, “ubutumwa bwiza” babwiriza abaturanyi babo ntaho bitandukaniye no kubabwira “inkuru nziza” ko bibeshya niba bibwira yuko ibikorwa byiza no kubaha Imana hari aho bihuriye n’agakiza. Icy’ingenzi gusa ni uko “bakira Yesu nk’Umukiza wabo.”

Aho bitandukaniye, abakristo ba mbere (abo Yesu yari abereye Umwami koko) bari nk’amatara mu mwijima, bityo rero ntibari bakeneye gukurikira amasomo y’ukuntu bashobora guhamya Yesu cyangwa ukuntu bashira amanga bakabwira abaturanyi babo ko ari abayoboke ba Kristo. Bari bafite amahirwe menshi yo kubwiriza ubutumwa bwiza iyo babaga babajijijwe cyangwa basebejwe ku byerekeranye no gukiranuka kwabo. Icyo bakoraga gusa ni ukwimika Yesu nk’Umwami mu mitima yabo kandi bakaba biteguye gusubiza neza, nk’uko Petero yavuze.

Birashoboka ko itandukaniro ry’ibanze hagati y’abakristo b’iki gihe n’ab’itorero rya mbere ari iri: Abakristo b’ubu basa n’abibwira ko umukristo arangwa n’ibyo azi kandi yizera–tubyita “imyizerere,” bityo tukibanda cyane ku kubyiga. Naho abakristo ba mbere bizeraga ko umukristo arangwa n’ibyo akora–bityo rero bo bibandaga ku gukurikiza amategeko ya Kristo. Biratangaje iyo ubonye ukuntu nta mukristo wagiraga Bibiliya ye bwite mu binyejana cumi na bine bya mbere, bityo bikaba bitarashobokaga ko “basoma Bibiliya buri munsi,” ari cyo kintu cyahindutse imwe mu nshingano z’ingenzi z’umukristo muri iki gihe. Rwose simvuga ko abakristo b’iki gihe badakwiye gusoma Bibiliya buri munsi. Icyo mvuga gusa ni uko abakristo benshi cyane bahinduye kwiga Bibiliya ikintu cy’ingenzi kuruta kuyikurikiza. Nuko tukirata ko ari twe dufite imyizerere isobanutse (tutameze mbese nka ba bayoboke b’andi matorero agera ku 29,999 atari ku rwego rwacu mu myizerere) nyamara tukigendera mu mazimwe kandi tugwiza ubutunzi bwacu mu isi.

Niba dushaka koroshya imitima y’abantu ngo barusheho kwakira ubutumwa bwiza, dukwiye kubikora mu buryo bw’ibikorwa si mu nyigisho.

Imana Ni Yo Muvugabutumwa Mukuru

(God, the Greatest Evangelist)

Reka turebe twitonze umurimo w’Imana mu kubaka ubwami bwayo. Uko turushaho kumva uko ikora, ni ko turushaho kuba twashobora gufatanya na yo.

Iyo abantu bizeye Yesu, ni ikintu baba bakoresheje imitima yabo (reba Rom. 10:9-10). Bizera Umwami Yesu hanyuma bakihana. Bimura ubushake bwabo ubwabo bakimika Yesu ku ntebe yo gushaka kwabo. Kwizera bituruka ku guhinduka k’umutima.

N’iyo kandi abantu banze kwizera Yesu, na bwo ni ikintu bakoresha imitima yabo. Barinangira bakananira Imana, bityo ntibihane. Biturutse ku cyemezo cyo mu mutima wabo, bima Yesu intebe y’ubwami mu mitima yabo. Kutizera bituruka ku cyemezo gihoraho cy’umuntu kwanga guhindura umutima we.

Yesu yavuze ko imitima y’abantu bose inangiye ku buryo ntawamuzaho atari Data umumujyanyeho (reba Yohana 6:44). Imana mu mbabazi zayo ikomeza gukurura buri muntu wese imujyana kuri Yesu mu buryo bunyuranye, kandi bwose bukora ku mutima, kandi muri ubwo buryo bwose barakomeza bakoroshya imitima yabo cyangwa bakayinangira.

Ni ubuhe buryo Imana ikoresha ngo ikore ku mitima y’abantu ishaka kubakururira kuri Yesu?

Ubwa mbere ikoresha ibyaremwe byayo. Pawulo yaranditse ati,

Umujinya w’Imana uhishurwa uva mu ijuru, ubyukirijwe ubugome no gukiranirwa kw’abantu byose, bashikamiza ukuri gukiranirwa kwabo kuko bigaragara ko bazi Imana, Imana ubwayo ikaba ari yo yabahishuriye ubwo bwenge, kuko ibitaboneka byayo ari bwo bubasha bwayo buhoraho n’ubumana bwayo, bigaragara neza uhereye ku kuremwa kw’isi, bigaragazwa n’ibyo yaremye kugira ngo hatagira icyo kwireguza (Rom. 1:18-20).

Urabona ko Pawulo avuga ko abantu “bashikamiza ukuri” ni ukuvuga ngo “kumvikana cyane muri bo.” BIvuga ko, ukuri guhaguriuka muri bo kugahangana na bo, ariko bakagucinyiza bakagusubiza hasi bakanga kwemera iryo jwi ry’imbere ribemeza.

Uko ni ukuhe kuri kugaragarira buri wese mu mutima we? Pawulo yavuze ko uko kuri ari “ibitaboneka byayo, ububasha bwayo buhoraho n’ubumana bwayo,” bigaragazwa n’ “ibyo yaremye.” Abantu iyo barebye ibyaremwe n’Imana bamenya neza muri bo ko Imana iriho,[1] bakamenya ko ifite imbaraga zitangaje, ko itangaje mu kurema kandi ifite ubwenge butagereranywa, tubaye tuvuzemo bicye.

Pawulo yanzura avuga ko abantu nk’abo “nta cyo kwireguza bafite,” kandi ni byo. Imana ikomeza gutera ijwi hejuru ihamagara buri wese, yihishura kandi igerageza ngo irebe ko imitima yabo yakoroha, ariko abenshi biziba amatwi. Nyamara Imana ntirekera aho ikomeza kuvuga cyane mu bugingo bwayo, idatuza gukorera ibitangaza imbere yabo–mu ndabo, inyoni, abana bavuka, kureka k’urubura, imbuto nk’imineke na za “pome,” n’ibindi byinshi bitabarika.

Niba Imana iriho kandi ikaba ari igihangange nk’uko ibyo yaremye bibigaragaza, rwose ikwiriye kubahwa. Kandi iryo hshurirwa ry’imbere mu mutima ubutumwa bw’ingenzi rikomeza gusakuza ryamamaza ni ubu: Nimwihane! Ku bw’iyo mpamvu Pawulo ahamya ko buri wese yamaze kumva Imana imuhamagarira kwihana:

Ariko ndabaza nti ntibumvise? Yee, rwose barumvise; “ndetse ijwi ryabo ryasakaye mu isi yose, amagambo yabo agera ku mpera z’isi” (Rom. 10:18).

Mu byukuri Pawulo yavugaga iby’umurongo uzwi cyane wo muri Zaburi 19, aho mu buryo burambuye haravuga ngo,

Ijuru rivuga icyubahiro cy’Imana, isanzure ryerekana imirimo y’intoke zayo. Amanywa abwira andi manywa ibyayo, ijoro ribimenyesha irindi joro. Nta magambo cyangwa ururimi biriho, nta wumva ijwi ryabyo. Umugozi ugera wabyo [Ijwi] wakwiriye isi yose, amagambo yabyo yageze ku mpera z’isi (Zaburi 19:1-4a).

Ibi na none birerekana ko Imana ivugana na buri muntu, ijoro n’amanywa, iciye mu byo yaremye. Abantu bumvise ubutumwa bw’ibyaremwe by’Imana, bakwikubita hasi bubamye basakuza cyane bavuga amagambo nk’aya ngo, “Muremyi Ukomeye, ni wowe wandemye, kandi ikigaragara ni uko wandemeye kugira ngo nkore ubushake bwawe. None ndakwiyeguriye!”

Ubundi Buryo Imana Ivugamo

(Another Means by Which God Speaks)

Irindi hishurirwa ry’imbere mu mutima rishingiye ku biboneka ni irindi hishurirwa ry’imbere, ni ihishurirwa ritangwa n’Imana na ryo, kandi ntirishingiye ku kuba umuntu yabonye ibitangaza by’ibyaremwe. Iryo hishurirwa ry’imbere ni umutimanama wa buri muntu, ijwi rihora ryerekana amategeko y’Imana. Pawulo yaranditse ati,

Abapagani badafite amategeko y’Imana, iyo bakoze iby’amategeko ku bwabo baba bihindukiye nubwo batayafite, bakagaragaza ko umurimo utegetswe n’amategeko wanditswe mu mitima yabo, ugahamywa n’imitima ihana ibabwiriza, igafatanya n’ibitekerezo byabo kubarega cyangwa se kubaregura. Kandi ni nabyo Imana izatangaho umugabo ku munsi izacirira abantu ho iteka muri Yesu Kristo ku byahishwe byabo, nk’uko ubutumwa bwiza nahawe buri (Rom. 2:14-16).

Bityo, buri muntu wese azi gutandukanya ikibi n’icyiza. Cyangwa se tubivuze mu buryo bwumvikana neza, buri muntu wese azi ibinezeza Imana n’ibitayinezeza, kandi ku munsi w’urubanza buri wese izamuhanira ko yakoze ibyo yari azi neza ko bitayinezeza. Uko abantu bagenda basaza, bagenda barushaho kumenya kwihagararaho basobanura impamvu z’ibyaha byabo bakitsindishiriza kandi birengangiza ijwi ry’umutima uhana wabo, ariko Imana ntihwema kurangurura amategeko yayo muri bo.

Uburyo Bwa Gatatu

(A Third Means)

Ariko si ibyo gusa. Imana, umuvugabutumwa mukuru ukomeza gukora kugira ngo igeze buri wese ku kwihana, ifite ubundi buryo na none ivugana n’abantu. Dusome n’ubundi amagambo ya Pawulo:

Umujinya w’Imana uhishurwa uva mu ijuru, ubyukirijwe ubugome no gukiranirwa by’abantu byose, bashikamiza ukuri gukiranirwa kwabo (Rom. 1:18).

Urabona ko Pawulo yavuze ko umujinya w’Imana uhishurwa, ntabwo avuga ko hari umunsi uzahishurwa. Umujinya w’Imana ugaragarira buri wese mu makuba y’uburyo bwinshi ateye agahinda, ayoroshye n’akomeye, ajya atera abari mu isi. Niba Imana ishobora byose, igashobora gukora no kuburizamo icyo ishatse cyose, ibintu nk’ibyo, iyo byadutse ku birengagiza Imana, nta kindi biba byerekana uretse umujinya wayo. Abanyatewolojiya batagira umutima n’abiyita abanyabwenge (philosophers) b’abapfapfa ni bo gusa badashobora kubibona. Nyamara no mu mujinya w’Imana urukundo n’imbabazi byayo birerekanwa, kuko abo yahagurikirije umujinya wayo akenshi ubageraho ni mucye cyane kurusha uwo bari bakwiye, bityo bakaba baburiwe mu rukundo ko hari umujinya w’iteka utegereje abanga kwihana iyo bamaze gupfa. Ubu ni ubundi buryo Imana ikoresha kugira ngo ikomange imitima y’abakeneye kwihana.

Uburyo Bwa Kane

(A Fourth Means)

Hanyuma, Imana ntinyura gusa mu byaremwe, mu mutima uhana no mu makuba igerageza kwigaruriraho abantu, ahubwo inyura no mu guhamagara k’ubutumwa bwiza. Uko abagaragu bayo bagenda bayumvira kandi bakamamaza ubutumwa bwiza, bwa butumwa bumwe n’ubw’ibyaremwe, n’ubw’ijwi ryo mu mutima hamwe n’ubw’amakuba bwongera gushimangirwa: Nimwihane!

Urabona ko ibyo dukora mu ivugabutumwa ubigereranije n’ibyo Imana ikora nta mahuriro. Ibwiriza ubutumwa ubudahwema buri muntu ubuzima bwe bwose buri munsi, mu gihe umuvugabutumwa w’igihangange mu isi ashobora kuba yabwiriza ubutumwa amagana macye y’ibihumbi by’abantu mu gihe cy’imyaka nka makumyabiri mirongo itatu. Kandi abo bavugabutumwa ubusanzwe babwiriza itsinda runaka ry’abantu incuro imwe gusa mu gihe kigufi gusa. Mu byukuri iryo rimwe ni yo mahirwe abo bavugabutumwa baba bemerewe guha abantu ukurikije ibyo Yesu yategetse by’uko bakunkumura umukungugu wo mu birenge byabo mu gihe umudugudu runaka cyangwa urugo runaka banze kubakira (reba Mat. 10:14). Ibi byose biravuga gusa ko iyo tugereranyije ivugabutumwa ry’Imana ridahwema, ry’isi yose, ritangaje, ryemeza umutima n’ivugabutumwa ryacu rifite imipaka ritarenga usanga nta mahuriro.

Iyi myumvire idufasha gusobanukirwa neza kurushaho inshingano zacu mu ivugabutumwa no mu kubaka ubwami bw’Imana. Ariko mbere y’uko tureba uruhare rwacu by’umwihariko, hari ikindi kintu cy’ingenzi tutagomba kwirengagiza.

Nk’uko twabivuze mbere, kwihana no kwizera ni ibintu abantu bakoresha imitima yabo. Imana yifuza ko buri muntu wese yakwicisha bugufi, akoroshya umutima we, akihana akizera Umwami Yesu. Ku bw’iyo mpamvu, Imana ikomeza gukora ubudahwema ku mitima y’abantu mu buryo bwinshi nk’uko tumaze kubusobanura.

Kandi na none birumvikana ko, Imana izi umutima wa buri muntu. Imenya aboroshya imitima yabo ikamenya n’abayinangira. Imenya utega amatwi ubutumwa bwayo budahwema ikamenya n’ubwirengagiza. Imenya ufite umutima uteye mu buryo haramutse hagize amakuba runaka atera byatuma akingura umutima we akihana. Imenya n’abafite imitima inangiye cyane ku buryo nta byiringiro byo kwihana kwabo. (urgero yabwiye Yeremiya incuro eshatu zose ngo ntiyirirwe asengera Isirayeli kuko imitima yabo yabaye akahebwe itagishobora kwihana; reba Yer. 7:16; 11:14; 14:11.)[2] Imenya n’abafite imitima yoroshye cyane ku buryo Umwuka Wera wayo abemeje akandi gato gusa bahera ko bihana.

Hamwe n’ibi byose se, ni iki dushobora kwiga ku ruhare rw’itorero mu ivugabutumwa no kubaka ubwami bw’Imana?

Ihame#1

(Principle #1)

Ubwa mbere, mbese ntibyumvikana ko Imana, Umuvugabutumwa Mukuru ukora 95% by’umurimo wose w’ivugabutumwa kandi ukomeza gushyira ijwi hejuru adahwema abwira buri muntu buri munsi, yakohereza abakozi bayo kubwira ubutumwa bwiza abantu bafite imitima yoroshye yakwakira ubutumwa itaruhanyije aho kubohereza ku bantu badashobora kubwakira? Ni ko mbyumva.

Mbese na none ntibishoboka ko Imana, Umuvugabutumwa Mukuru wabwirije abantu bose ubutumwa bwiza buri gihe cyose cy’ubuzima bwabo, yahitamo no kutirushya igira uwo yohereza kubwiriza abantu bagaragaje ko batitaye ku byo ibabwira kumara imyaka myinshi? Kuki yakwirushya ibwira abantu 5% by’ibintu yari isigaje kubabwira niba baravuniye ibiti mu matwi bakirengagiza 95% yamaze imyaka igerageza kubabwira? Ndibwira ko igishoboka cyane ari uko Imana yakoherereza abantu nk’abo ibyago bikaba byatuma imitima yabo yoroha. Bigenze bityo kandi na bo bakoroshya imitima yabo, noneho byaba bifite ishingiro gutekereza ko yakohereza abagaragu bayo bakabwiriza ubutumwa bwiza.

Hari ushobora kuvuga ko Imana yakohereza abakozi bayo kubwiriza ubutumwa bwiza abantu izi neza ko batazihana kugira ngo bazabure icyo bireguza ku munsi w’amateka. Nyamara wibuke ko, ukurikije uko Bibiliya ivuga, abo bantu n’ubundi batagifite icyo bireguza imbere y’Imana kuko idahwema kubihishurira ibinyujije mu byaremwe byayo (reba Rom. 1:20). Bityo rero iyo Imana yohereje umwe mu bakozi bayo ku bantu nk’abo si ukugira ngo batazagira icyo bireguza, ahubwo biba ari ukugira ngo barusheho kugira ibyo bazabazwa.

Niba rero ari ukuri ko Imana yohereza abakozi bayo ku bantu ibona bafite imitima yakwakira ubutumwa bwiza, twe nk’abakozi bayo dukwiye gusenga tugasaba ubwenge bwayo kugira ngo tumenye abo izi ko ari ibisarurwa byeze bikeneye gusarurwa tukaba ari bo dusanga.

Urugero Rwo Muri Bibiliya

(A Scriptural Example)

Iri hame rigaragara neza cyane mu murimo wa Filipo umubwirizabutumwa nk’uko byanditse mu gitabo cy’Ibyakozwe. Filipo yari yabwirije i Samariya abantu bafite imitima yakira, ariko nyuma yaje kuyoborwa na marayika kujya guca mu nzira runaka. Aho yayobowe ku muntu washakaga Imana bitangaje:

Bukeye marayika w’Umwami Imana abwira Filipo ati, “Haguruka ugane ikusi, ugere mu nzira imanuka iva i Yerusalemu ikajya i Gaza, ya yindi ica mu butayu.” Arahaguruka aragenda. Nuko haza Umunyetiyopiya w’inkone, umutware w’umunyabyuma w’ibintu byose bya Kandake, umugabekazi w’Abanyetiyopiya. Yari yaragiye i Yerusalemu gusenga. Yasubiragayo yicaye mu igare rye, asoma igitabo cy’umuhanuzi Yesaya. Umwuka abwira Filipo ati, “Sanga ririya gare ujyane na ryo.” Filipo arirukanka yumva asoma igitabo cy’umuhanuzi Yesaya, aramubaza ati, “Ibyo usoma ibyo urabyumva?” Undi ati, “Nabibasha nte ntabonye ubinsobanurira?” Yinginga Filipo ngo yurire bicarane. Ibyo yasomaga mu byanditswe byari ibi ngo:

Yajyanywe nk’intama bajyana mu ibagiro, kandi nk’uko umwana w’intama ucecekera imbere y’uwukemura ubwoya, ni ko atabumbuye akanwa ke. Ubwo yacishwaga bugufi, urubanza rwari rumukwiriye barumukuyeho. Umuryango we uzamenyekana ute? Ko ubugingo bwe bukuwe mu isi?”.

 

Iyo nkone ibaza Filipo iti, “Ndakwinginga mbwira, ayo magambo umuhanuzi yayavuze kuri nde? Yayivuzeho cyangwa yayavuze ku wundi?” Filipo aterura amagambo, ahera kuri ibyo byanditswe amubwira ubutumwa bwiza bwa Yesu. Bakigenda mu nzira bagera ku mazi, iyo nkone iramubaza iti, “Dore amazi, ikimbuza kubatizwa ni iki?” Filipo arayisubiza ati, “Niba wizeye mu mutima wawe wose birashoboka.” Na yo iti, “Nizeye Yesu Kristo ko ari Umwana w’Imana.” Itegeka ko bahagarika igare, baramanuka bajya mu mazi bombi Filipo n’inkone, arayibatiza. Bavuye mu mazi Umwuka w’Imana ajyana Filipo inkone ntiyasubira kumubona, nuko ikomeza kugenda inezerewe (Ibyak. 8:26-39).

Filipo yayobowe n’Imana kujya kwigisha umuntu wari ushonje cyane mu mwuka ku buryo yari yagombye gufata urugendo rwo kuva muri Afrika akaza i Yerusalemu gusenga Imana kandi yari yaguze nibura umwe mu mizingo y’ibitabo by’ubuhanuzi bwa Yesaya. Agisoma Yesaya 53, igice cyo mu Isezerano rya Kera gisobanutse cyane kivuga mu buryo burambuye kwitanga kwa Kristo nk’impongano y’ibyaha,akinibaza uwo Yesaya yandikagaho, Filipo aba arahageze, yiteguye gusobanura ibyo inkone yasomaga! Uwo yari umuntu weze rwose ugeze igihe cyo gukizwa! Imana yari izi umutima we hanyuma yohereza Filipo.

Uburyo Bwiza Kurushaho

(A Better Way)

Mbega ukuntu ari byiza kuyoborwa n’Umwuka ku bantu biteguye kwakira aho gukwira mu bantu badashobora kwakira ubutumwa kuko tuba twishinja ko niba tutababwirije batazigera bagira amahirwe yo kugerwaho n’ubutumwa bwiza. Ntiwibagirwe–umuntu wese uhura na we aba arimo abwirizwa n’Imana ubudahwema. Byaba byiza kurushaho tugiye tubanza kubabaza uko umutima wabo uhana ubamereye hanyuma tukamenya niba bakira iby’Imana cyangwa batabyakira, kuko buri wese aba arwana n’ijwi rimushinja mu buryo bumwe cyangwa ubundi.

Urundi rugero rw’iryo hame ni ugukizwa kwa Koruneliyo n’ab’urugo rwe babwirijwe na Petero, wari wayobowe n’Imana mu buryo bw’igitangaza ngo ajye kubwiriza ubutumwa bwiza iri tsinda ry’abanyamahanga rifite imitima yiteguye cyane kwakira. Nta gushidikanya Koruneliyo yari umuntu utega amatwi umutima- nama we kandi ushaka Imana cyane, nk’uko bigaragazwa no gufasha abakene kwe n’ubuzima bwe bwo gusenga (reba Ibyak 10:2). Imana yamuhuje na Petero, atega amatwi ubutumwa bwa Petero n’umutima ukunze kandi akizwa mu buryo bushimishije cyane.

Mbega ukuntu byaba birimo ubwenge tugiye dusenga tugasaba Umwuka Wera akatuyobora ku bantu bakinguye imitima yabo aho guta umwanya tugerageza gufata ingamba zo kugabanya imijyi yacu mo ibice dushyiraho amatsinda y’abantu bajya kubwiriza ubutumwa muri buri gice inzu ku nzu, n’urugo ku rundi. Iyo Petero icyo gihe aza kuba ari mu nama y’abamisiyoneri i Yerusalemu bashyiraho ingamba z’ivugabutumwa cyangwa Filipo agakomeza kubwiriza ubutumwa i Samariya, urugo rwa Koruneliyo na ya nkone y’Umunyetiyopiya ntibaba baragezweho n’agakiza.

Birumvikana ko ababwirizabutumwa n’intumwa bashobora kuyoborwa kujya kubwiriza ubutumwa bwiza mu ruhame rw’abantu benshi barimo abafite imitima yoroshye ishobora kwakira, n’abafite imitima inangiye itakira. Ariko na bwo bagomba gusenga bakabaza Imana aho ishaka ko bajya kubwiriza. Na none dusanga mu gitabo cy’Ibyakozwe aho abantu basizwe amavuta y’Imana kandi bayobowe n’Umwuka Wera bafatanya na we yubaka ubwami bw’Imana. Mbega ukuntu uburyo ab’itorero rya mbere bakoreshaga butandukanye n’ubw’iry’ubu. Mbega ukuntu umusaruro utandukanye! Kuki tutakwigana ibintu byarimo ubutsinzi bungana butyo?

Ihame #2

(Principle #2)

Ni mu bundi buryo buhe amahame ya Bibiliya twabanje kubona mu ntangiriro z’iki gice adufasha uruhare rwacu mu ivugabutumwa no kubaka ubwami bw’Imana?

Niba Imana yarashyizeho ityo ko ibyaremwe, umutima – nama hamwe n’amakuba byose bifatanyiriza hamwe guhamagarira abana b’abantu kwihana, nuko rero ababwiriza ubutumwa bwiza bagomba kumenya neza niba batarimo kubwiriza ubutumwa buvuguruzanya n’ubwo. Nyamara abenshi ni bwo babwiriza! Ubutumwa bwabo buvuguruza mu buryo butaziguye buri kintu cyose Imana irimo igerageza kubwira abanyabyaha! Ubutumwa bwabo bw’ubuntu budashingiye kuri Bibiliya bushyigikira igitekerezo cy’uko gukiranuka no kugandukira Imana bitari ngombwa kugira ngo umuntu ahabwe ubugingo buhoraho. Mu kutavuga ko ari ngombwa kwihana kugira ngo umuntu abone agakiza, mu gushimangira ko agakiza kadaturuka ku bikorwa (mu buryo Pawulo atigeze ashaka ko ari ko byumvikana), mu byukuri ahubwo barwanya Imana, bagatuma abantu binjira kurushaho mu buyobe bubi buzana kurimbuka kwabo, kuko icyo gihe noneho baba bibwira rwose badashidikanya ko bakijijwe kandi mu byukuri badakijijwe. Mbega ibyago, igihe abitwa intumwa z’Imana ari bo ahubwo barwanya Imana kandi bavuga ko ari yo bahagarariye!

Yesu yadutegetse kwigisha “kwihana kugira ngo abantu bababarirwe ibyaha” (Luka 24:47). Ubwo butumwa buba bushimangira ubwo Imana iba yaragiye ikomeza kubwira abanyabyaha ubuzima bwabo bwose. Ubutumwa bwiza busatura imitima y’abantu bugakomeretsa abafite imitima yinangiye. Ariko ubutumwa bw’iki gihe busiga abantu amavuta bubabwira uburyo Imana ibakunda cyane (ikintu nta ntumwa n’imwe yigeze ivuga igihe babaga babwiriza ubutumwa nk’uko tubibona mu gitabo cy’Ibyakozwe), butuma bibwira ko Imana itabarakariye kandi ko rwose imyifatire yabo ntacyo iyitwaye. Bahora babwirwa ko icyo bakeneye gukora gusa ari “ukwakira Yesu.” Ariko Umwami w’abami kandi Umutware w’abatware ntakeneye ko tumwakira. Ikibazo si ukuvuga ngo, “Wemeye kwakira Yesu?” Ahubwo ni, “Mbese Yesu yemeye kukwakira?” Igisubizo ni, nutihana ngo umukurikire, umuteye isoni, kandi imbabazi ze icyo zikora gusa ni uguhamya ko ukwiye umuriro utazima.

Nkurikije ubutumwa bwiza bw’iki gihe bupfobya cyane ubuntu bw’Imana, sinabura gutangazwa n’ukuntu ibihugu bimwe, biyobowe n’abantu bahawe n’Imana ubutware bwo gutegeka ibyo bihugu (kandi ibi ntawabijyaho impaka; reba Dan. 4:17, 25, 32l 5:21; Yohana 19:11; Ibyak 12:23; Rom. 13:1), bifungira imipaka yabyo abamisiyoneri baturuka mu bihugu by’i Bulayi n’Amerika. Aho impamvu ntiyaba ari uko Imana igerageza kurinda ibyo bihugu ngo bitagerwamo n’ubwo butumwa bupfuye?

Ihame #3

(Principle #3)

Amahame twabanje kubona muri iki gice anadufasha kurushaho kumva neza uko Imana ibona abantu bakurikira amadini y’ibinyoma. Mbese n’abantu bari mu bujiji bakwiriye kugirirwa impuhwe kuko batigeze bagira amahirwe yo kumva ukuri? Mbese amakosa yose ni ukuyashyira ku itorero kuko ritegeze rijya kubabwiriza ubutumwa?

Oya, abo bantu ntibayobewe ukuri. Bashobora kuba batazi ibintu byose nk’ibyo umukristo wizera Bibiliya azi, ariko bazi ibintu byose Imana yihishuraho ibinyujije mu byaremwe, mu mutima- nama no mu makuba. Ni abantu Imana iba yarakomeje guhamagarira kwihana mu buzima bwabo bwose, nubwo baba batarigeze babona umukristo cyangwa ngo babe barumvise ubutumwa bwiza. Ikindi kandi baba baragiye boroshya imitima yabo cyangwa bakayinangira ku ijwi ry’Imana.

Pawulo yanditse ku bujiji bw’abatizera ahishura n’impamvu yo kujijwa kwabo:

Ni cyo gituma mvuga ibi, nkabihamya mu Mwami yuko mutakigenda nk’uko abapagani bagenda, bakurikiza ibitagira umumaro byo mu mitima yabo, ubwenge bwabo buri mu mwijima kandi ubujiji buri muri bo no kunangirwa kw’imitima yabo, byabatandukanije n’ubugingo buva ku Mana. Kandi babaye ibiti biha ubusambanyi bwinshi, gukora iby’isoni nke byose bifatanije no kwifuza (Ef 4:17-19).

Urabona yuko impamvu abapagani bari mu bujiji ari “ukubera kunangirwa kw’imitima yabo.” Pawulo kandi avuga ko “babaye ibiti.” Birumvikana ko yavugaga uko imitima yabo imeze. Mbese nk’amabavu; amabavu aza ku biganza by’abantu bakunze gukoresha ibintu bikomeye bikagenda bikuba uruhu rwabo. Uruhu rwajeho amabavu, nk’inkokora z’ihene, ntiruba rucyumva cyane, ushobora gukoraho umuntu ntiyumve. Ni ko bimeze no ku bantu bakomeza kunangira imitima yabo ku muhamagaro w’Imana ukorera mu byaremwe, mu mutima – nama no mu makuba, imitima yabo ihinduka ibiti, bigatuma itagishobora kumva iryo jwi ry’Imana. Ni yo mpamvu ubushakashatsi bwerekana ko muri rusange uko abantu basaza imitima yabo igenda yinangira. Uko umuntu agenda asaza ni ko amahirwe y’uko yakwihana agenda agabanuka. Abavugabutumwa b’abanyabwenge bibanda ku bantu bakiri bato.

Icyaha cy’Abatizera

(The Guilt of the Unbelieving)

Ikindi kimenyetso cyerekana ko Imana ibara abantu ho icyaha n’ubwo baba batarigeze bumva ubutumwa bwiza ni uko ibaha ibihano. Iyo Imana iza kuba itababaraho ibyaha bakora ntiyabahana. Ariko kuko ibahana, bituma tudashidikanya ko ibabaraho icyaha, kandi niba ibabaraho icyaha, bagomba kuba baba bazi ko ibyo bakora bitayishimisha.

Uburyo bumwe Imana ikoresha ihana abinangira ku ijwi ry’Imana ribahamagarira kwihana ni “ukubareka” ngo bakurikize ibyo imitima yabo irarikiye maze babe imbata z’ibyangiza byimbitse kurushaho. Pawulo yaranditse ati:

Kuko ubwo bamenye Imana batayubahirije nk’Imana, habe no kuyishima, ahubwo bahinduka abibwira ibitagira umumaro, maze imitima yabo y’ibirimarima icura umwijima. Biyise abanyabwenge bahinduka abapfu, maze ubwiza bw’Imana idapfa babuhindura ibishushanyo by’abantu bapfa, n’iby’ibiguruka, n’iby’ibigenza amaguru ane, n’iby’ibikururuka.

 

Ni cyo cyatumye Imana ibareka ngo bakurikize ibyo imitima yabo irarikiye, bakore ibiteye isoni bononane imibiri yabo, kuko baguraniye ukuri kw’Imana gukurikiza ibinyoma, bakaramya ibyaremwe bakabikorera kubirutisha Imana Rurema, ari yo ishimwa iteka ryose. Amen.

 

Ni cyo cyatumye Imana ibarekera ibyonona, ndetse bigeza ubwo abagore babo bakoresha imibiri yabo uburyo bunyuranye n’ubwo yaremewe. Kandi n’abagabo ni uko, bareka kugirira abagore ibyo imibiri yabo yaremewe, bashyushywa no kurarikirana. Abagabo bagirirana n’abandi bagabo ibiteye isoni, bituma mu mibiri yabo bagarurirwa ingaruka mbi ikwiriye kuyoba kwabobabo.

 

Kandi ubwo banze kumenya Imana, ni cyo cyatumye Imana ibareka ngo bagire imitima yabaye akahebwe bakora ibidakwiriye. Buzuye gukiranirwa kose n’ububi, no kurarikira n’igomwa, buzuye n’ishyari n’ubwicanyi, n’intonganya no gusebaniriza mu byongorerano, n’abatukana, n’abanga Imana n’abanyagasuzuguro, n’abirarira n’abahimba ibibi, n’abatumvira ababyeyi n’indakurwa ku izima, n’abava mu masezerano n’abadakunda ababo n’intababarira, nubwo bamenye iteka ry’Imana yuko abakora ibisa bityo bakwiriye gupfa, uretse kubikora ubwabo bashima n’abandi babikora. (Rom. 1:21-32).

Urabona uburyo Pawulo ashimangira ukuntu umuntu ahamwa n’icyaha imbere y’Imana. Abapagani “bamenye Imana,” ariko “ntibayubahirije nk’Imana, cyangwa ngo bayishime.” “Baguraniye ukuri kw’Imana gukurikiza ibinyoma,” ni ukuvuga ko bahuye n’ukuri kw’Imana. Bityo rero Imana “yarabaretse” ngo bararikire ibyonona, kugeza ubwo abantu bakora ibintu biteye isoni, by’amahano kandi byo kuyoba kuko barushijeho gushayisha mu byaha. Ni nk’aho Imana ivuga iti, “Mbese murashaka kuba imbata z’ibyaha aho kuba imbata zanjye? Ngaho nababwira iki. Simbabujije, kandi muzagenda murushaho kuba imbata z’iyo mana mukunda.”

Ndibwira ko umuntu yanavuga ko ubu buryo bwo guhana kw’Imana bwerekana imbabazi zayo, kuko umuntu ashobora gutekereza ko uko abantu barushaho gushayisha mu byaha no kuba babi cyane, bashobora kugeraho bagakanguka bakabona ko ibyo barimo bidakwiye. Umuntu yibaza impamvu abatinganyi batibaza ikibazo bati, “Kuki ndarikira kugira imibonano n’umuntu duhuje igitsina kandi tudashobora gukora imibonano mpuzabitsina nyayo koko? Ibi biteye isoni!” Mu buryo bumwe umuntu yavuga ati Imana koko “ni ko yabaremye” (nk’uko ubwabo bakunze kubyitwaza iyo bashaka gushyigikira uko kuyoba kwabo), mu buryo gusa bwo kuvuga ko Imana yemera bikababaho, kandi bitewe gusa n’uko yiringira ko igihe kimwe izabakangura kugira ngo bihane bamenye imbabazi zayo zitangaje.

Ntabwo ari abatinganyi gusa bakwiriye ibyo bibazo. Pawulo yashyize ku rutonde ibyaha byinshi bibata abantu bigaragara nk’igihano Imana ihaye abanze kuyikorera. Miliyari z’abantu bakagombye kwibaza ku myifatire yabo mibi. “Kuki nanga umuryango wanjye bwite?” “Kuki nshimishwa no gukwiza amazimwe?” “Kuki ntajya nigera na rimwe nyurwa n’ibyo mfite?” “Kuki nkomeza kumva mpatwa cyane kureba sinema z’ubusambanyi?” Imana abo bose yarabaretse ngo babatwe n’iyo mana yabo.

Nta gushidikanya ko umuntu uwo ari we wese igihe icyo ari cyo cyose ashobora koroshya umutima we, akihana akizera Yesu. Bamwe mu banyabyaha bakomeye mu isi b’imitima inangiye cyane bagiye babikora, kandi Imana ikababohora ikabezaho ibyaha byabo! Igihe cyose umuntu agihumeka, Imana iba ikimwongera amahirwe yo kwihana.

Nta kintu Bakwireguza

(No Excuses)

Pawulo avuga ko abanyabyaha badafite icyo kwireguza. Iyo bacira abandi urubanza baba bagaragaza ko bazi gutandukanya ikibi n’icyiza, bityo bakaba rwose abo gucirwaho iteka n’Imana:

Ni cyo gituma utagira icyo kwireguza, wa muntu we ucira abandi urubanza. Ubwo ucira undi urubanza uba witsindishirije, kuko wowe umucira urubanza ukora bimwe n’ibyo akora. Ariko tuzi yuko iteka Imana izacira ku bakora bene ibyo ari iry’ukuri. Wowe muntu ucira urubanza abakora bene ibyo nawe ukabikora, mbese wibwira yuko uzakira iteka ry’Imana, kandi usuzugura ubutunzi bwo kugira neza kwayo, n’ubw’imbabazi zayo n’ubwo kwihangana kwayo? Ntuzi yuko kugira neza kw’Imana ari ko kukurehereza kwihana? (Rom. 2:1-4).

 

Pawulo yavuze ko gutegereza kw’Imana no kwihangana kwayo ari uguha abantu amahirwe yo kwihana. Ikindi kandi, nk’uko Pawulo akomeza kuvuga, yagaragaje ko abihana bakagendera mu buzima bwo gukiranuka ari bo bonyine bazaragwa ubwami bw’Imana:

 

Ariko kuko ufite umutima unangiwe utihana, wirindirije umujinya uzaba ku munsi w’uburakari, ubwo amateka y’ukuri y’Imana azahishurwa, kuko Imana izitura umuntu wese ibikwiriye ibyo yakoze. Abashaka ubwiza n’icyubahiro no kudapfa babishakisha gukora ibyiza badacogora, izabitura ubugingo buhoraho. Ariko abafite imitima ikunda kwirema ibice ntibumvire iby’ukuri ahubwo bakumvira gukiranirwa, izabitura umujinya n’uburakari n’amakuba n’ibyago. Ni byo izateza umuntu wese ukora ibyaha, uhereye ku Muyuda ukageza ku Mugiriki. Ariko ubwiza n’icyubahiro n’amahoro, ni byo izitura umuntu wese ukora ibyiza, uhereye ku Muyuda ukageza ku Mugiriki (Rom. 2:5-10).

Mu buryo bugaragara neza, Pawulo ntuiyemeranya n’abigisha ko abantu bapfa gusa “kwemera Yesu nk’Umukiza” ubugingo buhoraho bukaba bubaye ubwabo. Ahubwo, ni abihana kandi “ntibacogore gukora ibyiza bashaka ubwiza n’icyubahiro no kudapfa.”

Ariko se ibi ntibivuga ko abantu bashobora gukomeza gukurikira andi madini atari ubukristo bagakizwa niba gusa bihannye kandi bakumvira Imana?

Oya, nta gakiza kariho atari muri Yesu bitewe n’impamvu nyinshi; imwe muri zo ni uko ari Yesu gusa ushobora kubatura abantu mu bubata bw’ibyaha.

Ariko se igihe bashatse kwihana, bazamenya bate kwambaza Yesu batarigeze bamwumva?

Imana, yo imenya imitima y’abantu bose, izihishurira umuntu wese uyishakana umutima ukunze. Yesu yarasezeranye ati, “Mushake muzabona” (Mat. 7:7), kandi Imana ishaka ko buri muntu ayishaka (reba Ibyak 17:26-27). Iyo ibonye umuntu ufite umutima wumva kubwiriza kwayo kudahwema, imwoherereza ubutumwa bwiza, nk’uko yabikoreye ya nkone y’Umunyetiyopiya n’urugo rwa Koruneliyo. Imana nta n’ubwo igendera ku kuba Itorero ryakoze cyangwa ritakoze, nk’uko yabigaragaje mu gukizwa kwa Pawulo w’i Taruso. Iyo hatagize uboneka ngo ashyire ubutumwa bwiza umuntu ushaka Imana nta buryarya, Imana ubwayo irihagurukira! Maze kumva ubuhamya bwinshi mu bihugu bitemera ubutumwa bwiza, bw’abantu bakizwa babonye Yesu mu iyerekwa.

Kuki Abantu Ari Abanyedini?

(Why People Are Religious?)

Impamvu ni uko abakurikira amadini y’ibinyoma baba atari abantu bashaka ukuri koko. Ahubwo baba abanyedini kuko gusa bashaka ikintu cyo kwitsindishiriza cyangwa guhisha ibyaha byabo. Kuko bakomeza kwica amategeko y’umutima – nama wabo, bashaka uburyo bihisha inyuma y’idini. Ku bwo gukora imihango y’idini ryabo bakihumuriza biyumvisha ubwabo ko batazajya mu muriro. Ibi ni kimwe ku banyedini bose, baba “abakristo” b’ibinyoma (harimo na babandi babwiriza iby’ubuntu budasobanutse) baba Ababudha, Abayisilamu n’Abahindu. Nubwo baba bakora iby’idini ryabo, umutima – nama wabo ubacira urubanza.

Iyo Umubuda yunama aramya ibigirwamana bye cyangwa imbere y’umukuru w’idini ryabo aho yicaye aho nk’ikigirwamana, umutima – nama we ukomeza kumubwira ko ibyo akora ibyo ari bibi. Iyo umuhindu yiburanira agerageza gushaka kuvuga ko ikimubujije kugirira impuhwe umushonji umutegeye amashyi amusaba mu muhanda ngo amufashe ari uko uwo mushonji arimo arababazwa kubera ibyaha yakoze mu buzima bwe bwabanjirije ubwo, umutima – nama we uramushinja. Iyo umuyisilamu w’intagondwa aciye “umukafiri” umutwe mu izina rya Allah, umutima – nama we umuvugiriza induru umwereka uburyarya bwe bwuzuye ubwicanyi. Iyo “umukristo” yirundaniriza ubutunzi mu isi, ahora mu mashusho y’ubusambanyi kuri televiziyo, asebya abakristo bagenzi be mu byongorerano, kandi akomeza kwiringira ko ubuntu ari bwo bwamukijije, umutima we umucira urubanza. Izi zose ni ingero z’abantu bashaka gukomeza gukora ibyaha bakaba barabonye ibinyoma by’idini bizera bikabafasha gukomeza gukora ibyaha. “Gukiranuka” kw’abapagani nyamara b’abanyedini kuri kure, kure, kure cyane y’uko Imana ibashaka.

Ibi byose ni ukuvuga ko Imana idafata abantu bo mu madini y’ibinyoma nk’injiji zo kugirirwa impuhwe ngo bitewe n’uko batigeze bumva ukuri. Nta n’ubwo ubujiji bwabo bubarwa ku Itorero ngo ntryabwirije ubutumwa nk’uko bikwiriye.

Mbisubiremo, nubwo tuzi ko Imana ishaka ko Itorero ribwiriza ubutumwa bwiza ku isi yose, tugomba gukurikira ubuyobozi bw’Umwuka Wera akatuyobora aho “imirima yeze igeze gusarurwa” (reba Yohana 4:35), aho abantu biteguye kwakira kuko imitima yabo bayorohereje Imana idahwema kubasanga.

Ihame #4

(Principle #4)

Ihame rya nyuma dushobora kwiga mu kuri kwa Bibiliya twabonye mbere muri iki gice ni iri: Niba Imana ihana abanyabyaha ishaka ko bakoroshya imitima yabo, tugomba kumva ko abanyabyaha bamwe, nyuma yo kunyura mu bihano by’Imana cyangwa bamaze kwitegereza aho abandi banyabyaha bahanwa, bazoroshya imitima yabo. Bityo rero nyuma y’amakuba haba hari amahirwe yo kugeza ubutumwa bwiza ku bantu utashoboraga kugeraho mbere.

Abakristo bakwiye gushakisha bakamenya aho amahirwe yo kujyana ubutumwa bwiza ari; aho abantu bari mu bibazo. Urugero nk’ahantu abantu baba baheruka gupfusha ababo, baba bashobora kuba bakingura imitima yabo bakumva icyo Imana ishaka ko bumva. Nkiri umupastori, igihe cyose habaye gushyingura umuntu witabye Imana ntabwo ayo mahirwe yancagaho ntabwirije ubutumwa bwiza, nibuka ko Bibiliya ivuga ngo, “Kujya mu rugo rurimo imiborogo biruta kujya mu rugo rurimo ibirori, kuko ibyo ari byo herezo ry’abantu bose, kandi ukiriho azabihorana ku mutima we (Umubw 7:2).

Iyo abantu bahuye n’ibibazo by’uburwayi, igihombo n’ubukene, gutana kw’abakundanaga, ibiza n’ibindi by’ingaruka n’ibihano by’ibyaha, baba bakeneye kumenya ko iyo mibabaro ari akanyafu ko kubakangura ngo bahindukirire Imana. Mu buryo bw’imibabaro y’akanya gato Imana iba igerageza gukiza abanyabyaha gucirwaho iteka by’iteka ryose.

Incamake

(In Summary)

Imana ni yo igira uruhare runini cyane mu kubaka ubwami bwayo. Twe inshingano yacu ni ukugira ubwenge bwo kumenya kugendana na yo.

Abizera bose bahamagarirwa kubaho ubuzima bwejejwe kugira ngo bamurikire abari mu mwijima, kandi bagomba guhora biteguye gusubiza umuntu wese ubabajije iby’ibyiringiro byabo.

Imana iteka iba ikora ku bugingo bwa buri muntu ngo ashobore koroshya umutima we yihane, ivugana n’abantu ubudahwema ibinyujije mu byaremwe, mu mutima – nama no mu makuba, kandi ubundi ikabinyuza mu ivugabutumwa.

Abanyabyaha baba bazi neza ko barimo bacumura ku Mana, kandi bahamwa n’ibyaha byabo nubwo baba batarigeze bumva ubutumwa bwiza. Icyaha cyabo ni ikimenyetso cyo kwinangira kw’imitima yabo. Gukomeza kugenda bononekara mu ngeso zabo no kuba imbata z’icyaha bigaragaza umujinya w’Imana kuri bo.

Abanyedini si ukuvuga ko iteka baba bashaka ukuri. Ahubwo akenshi baba bagerageza gushyigikira ibyaha byabo mu kwizera ibinyoma by’idini ryabo.

Imana izi umutima wa buri muntu. Nubwo ishobora kudutuma kujya kubwiriza ubutumwa bwiza abantu bafite imitima yinangiye, ariko cyane cyane abo itwoherezaho ni abafite imitima yoroshye yiteguriye kwakira ubutumwa bwiza.

Uko Imana ikora ku bugingo bw’abantu ngo yoroshye imitima yabo biciye mu mibabaro, tugomba gusingira ayo mahirwe yo kubabwiriza ubutumwa bwiza ntaducike.

Imana ishaka ko tujyana ubutumwa bwiza ku isi yose, ariko ishaka ko tugendera ku ijwi ry’Umwuka Wera mu gihe dusohoza Inshingano Nkuru yacu, nk’uko bigaragara mu gitabo cy’Ibyakozwe.

Imana yihishurira buri muntu wese ushaka kuyimenya nta buryarya.

Imana ishaka ko ubutumwa tubwiriza buhuza n’ubwayo.

Umunsi umwe hazaboneka abantu bavuye muri buri bwoko bahagarare imbere y’intebe y’Imana baramya, kandi tugomba gukora uruhare rwacu tugafatanya n’Imana kugera kuri iyo ntego. Bityo rero abantu b’Imana bagomba kwerekana urukundo rwa Kristo ku bantu ba buri bwoko bwo mu isi bahuye na bo. Imana ijya ikoresha bamwe mu bakozi bayo kugera by’umwihariko ku bwoko runaka badahuje umuco, biciye mu kohereza no gushyigikira abashinga amatorero, cyangwa bo ubwayo bakigirayo. Aboherejwe bagomba guhindura abantu abigishwa, bakagaragaza koko ko ari abakozi b’Imana bahindura abantu abigishwa!

Amagambo y’Umusozo

(Final Words)

Ndashima Imana cyane yanshoboje gusohora iki gitabo mu rurimi rwanyu maze nawe ugashobora kugitunga ukacyisomera. Ndizera ko cyakubereye umugisha. Mbese niba cyaragufashije, ushobora kunyandikira ukabimbwira? Numva icyongereza gusa, ubwo rero bizagusaba ko unyandikira mu cyongereza cyangwa ukareba abagufasha gushyira urwandiko rwawe mu cyongereza mbere y’uko urunyoherereza!

Uburyo bwiza cyane bwo kungeraho ni ukunyandikira kuri e-mail, aderesi yanjye ya e-mail ni: [email protected]. Niba udashoboye uburyo bwa e-mail, ushobora no kunyandikira ukoresheje aderesi ya minisiteri yanjye, ariko bitewe n’igihe iki gitabo kikugereyeho, iyo aderesi ishobora no kuzaba yarahindutse. Ibyo ari byo byose, uyu mwaka wa 2010 aderesi yacu ni: Shepherd Serve, P.O. Box 12854, Pittsburgh, PA 15241 USA.

Amagambo Yo ku Gifuniko Inyuma

(Back Cover Text )

Mbese uri umukozi w’Imana uhindura bantu abigishwa?

Ushobora kumuba.

David Servant amaze imyaka irenga makumyabiri n’itanu yigisha abakozi b’Imana mu mahugurwa hirya no hino mu isi. Abifashijwemo n’inararibonye yakuye mu kwigisha ibihumbi mirongo by’abapastori mu bihugu birenga mirongo ine, yateguye inyigisho za Bibiliya muri iki gitabo zivuga ku bibazo bikomeye cyane abakozi b’Imana b’abakristo bahura na byo muri iki gihe.

Servant avuga ku ngingo zitandukanye nko gukura kw’itorero, intambara y’umwuka, gutandukana kw’abashakanye no kongera gushaka kwabo, gusobanura Bibiliya, itorero ryo mu rugo, umwanya w’umugore mu murimo w’Imana, ubuyobozi bw’itorero, impano z’umwuka, ivugabutumwa n’ibindi byinshi. Akunze gukemanga ibyo abantu bakunze kuvuga, ahubwo iteka agahagarara ku byo Bibiliya ivuga. Imyanzuro ye rimwe na rimwe ishobora kugutangaza ikagutungura. Icyo Servant yizera cy’ibanze ni uko buri mukozi w’Imana w’umukristo akwiye kuba umuntu uhindura abantu abigishwa bakurikiza ibyo Kristo yategetse byose.

Umukozi w’Imana Uhindura Abantu Abigishwa ni igitabo kimaze guhindurwa mu ndimi zirenga makumyabiri, kirimo kirafasha cyane abakozi b’Imana hirya no hino mu isi kurushaho gusohoza Inshingano Nkuru.

 

---

[1] Ni yo mpamvu Bibiliya ivuga ngo, “Umupfapfa ajya yibwira ati, “Nta Mana iriho” (Zaburi 14:1). Abapfapfa ni bo bonyine gusa birengagiza uko kuri kugaragara cyane.

[2] Uretse ibi, Bibiliya ivuga ko Imana ishobora no kurushaho kunangira imitima y’abantu bakomeza kunangira imitima yabo banga kuyumvira (nka Farawo). Ntabwo bishoboka cyane ko abantu nk’abo hari ibyiringiro by’uko bakwihana.

Mu gice twabonye mbere cy’Inyigisho ya Yesu yo ku Musozi, twabonye amagambo amwe Yesu yabwiye abigishwa be ku byerekeye ubwizerwa. Yababwiye kutabika ubutunzi bwabo mu isi, ko ahubwo bakwiye kububitsa mu ijuru. Ntiyerekanye gusa ubupfapfa bw’abantu bashora ubutunzi bwabo mu bintu by’akanya gato bishiraho, ariko yerekanye n’umwijima uri wo mu mitima yabo (reba Mat. 6:19-24).

Amafaranga ni yo mana nyakuri y’abantu birundaniriza ubutunzi bw’isi, kuko barayakorera akaba ari yo atwara ubugingo bwabo. Yesu yavuze ko bidashoboka gukorera Imana n’amafaranga, mu buryo bugaragara yerekanaga ko igihe Imana ari yo Mwami wacu koko, iba inafite ubutware ku mafaranga yacu. Nta kindi kitu kirwana n’Imana barwanira imitima y’abantu nk’amafaranga. Nta gushidikanya ko ari yo mpamvu Yesub yavuze ko tudashobora kuba abigishwa be tutaretse ibyo dutunze byose ngo tumukurikire (reba Luka 14:33). Abigishwa ba Kristo ntacyo bagira. Baba ari ibisonga gusa babikijwe iby’Imana, kandi Imana ikunda gukoresha amafaranga yayo mu bintu bigaragaza kamere yayo kandi biteza imbere ubwami bwayo.

Yesu yavuze byinshi ku byerekeye kuba igisonga, ariko bisa nk’aho amagambo ye kenshi yirengagizwa n’abitwa ko ari abayoboke be. Icyamamaye cyane ni ukugoreka Ibyanditswe kugira ngo baremangatanye “inyigisho z’ubutunzi” mu buryo bwazo bunyuranye, ubwiyorobetse n’ubweruye. Nyamara umukozi w’Imana uhindura abantu abigishwa we, ikimushishikaza ni ukwigisha abantu kwitondera ibyo Kristo yategetse byose. Nuko rero yigisha mu bikorwa no mu magambo, uburyo bwa Bibiliya bwo kuba igisonga cyiza.

Reka turebe icyo Bibiliya yigisha ku byerekeye ibyo kuba igisonga cyiza, kandi tunabonereho gushyira ahabona zimwe mu nyigisho z’ibinyoma zamamaye z’ubutunzi. Ntabwo riri bube isomo rinonosoye rwose. Nanditse igitabo kihariye kuri izi nyigisho ushobora kubona mu Cyongereza ku rubuga rwacu rwa interineti (ShepherdServe.org). Ugisanga ku izina rya”Biblical Topics (Ibyo Bibiliya yigisha)” irindi zina ryacyo riri munsi y’iryo ni, “Jesus on Money (Yesu avuga ku Mafaranga).”

Nyirukumara ubukene

(The Supplier of Needs)

Turibuka amagambo Pawulo yanditse, ahumekewe n’Umwuka Wera, agatangira neza ati, “Kandi Imana yanjye izabamara ubukene bwanyu bwose, nk’uko ubutunzi bw’ubwiza bwayo buri muri Kristo Yesu” (Fili. 4:19). Iryo sezerano tumenyereye cyane, akenshi rikunze gukoreshwa nabi n’abakristo barigira iryabo, ariko se mu byukuri ryatanzwe mu ruhe rwego? Iyo turebye ibyo Byanditswe muri rusange biri kumwe n’iryo sezerano, ntidutinda gusobanukirwa impamvu Pawulo yari ashize amanga cyane avuga ko Imana izamara ubukene bwose bw’abakristo b’i Filipi:

Ariko mwagize neza ubwo mwese mwafatanije imibabaro yanjye. Kandi mwa Bafilipi mwe, namwe ubwanyu muzi yuko ubutumwa bwiza bugitangira kubwirizwa ubwo navaga i Makedoniya, nta rindi Torero ryafatanije nanjye mu byo gutanga no guhabwa, keretse mwebwe mwenyine. Ndetse n’i Tesalonike mwoherejeyo ibyo kunkenura, si rimwe risa ahubwo ni kabiri. Nyamara burya si impano nshaka, ahubwo nshaka ko impano zongerwa kuri mwe. Dore mfite ibinkwiriye byose ndetse mfite n’ibisaga, ndahaze ubwo maze guhabwa na Epafuradito ibyo mwohereje, bimbereye nk’umubabwe uhumura neza n’igitambo cyemewe gishimwa n’Imana. Kandi Imana yanjye izabamara ubukene bwanyu bwose, nk’uko ubutunzi bw’ubwiza bwayo buri muri Kristo Yesu (Fili. 4:14-19).

Pawulo yari azi neza adashidikanya ko Yesu azamara Abafilipi ubukene bwabo bwose kuko bujuje icya ngombwa Yesu asaba: Bashakaga mbere na mbere ubwami bw’Imana, kandi byaragaragariraga mu mpano zabo batanze bitanga kugira ngo Pawulo akomeze umurimo wo gushing amatorero. Wibuke ko mu Nyigisho ya Yesu ku Musozi yavuze ati,

Kandi So wo mu ijuru azi ko mubikwiriye byose. Ahubwo mubanze mushake ubwami bw’Imana no gukiranuka kwayo, ni bwo ibyo byose muzabyongerwa (Mat 6:32-33).

Bityo rero tubona ko iryo sezerano rya Pawulo mu gitabo cy’Abafilipi 4:19 atari iry’umukristo wese urivuga akaryiyitirira. Ahubwo ni iry’abashaka mbere na mbere ubwami bw’Imana.

Ni Iki Dukeneye Mu Byukuri

(What Do We Really Need?)

Hari ikindi kintu dushobora kubona muri iri sezerano rya Yesu muri Matayo 6:32-33. Rimwe na rimwe bijya biturushya gutandukanya ibyo dukeneye n’ibyo twifuza. Nyamara Yesu yasobanuye neza ibyo dukeneye. Yaravuze ati, “Kandi So wo mu ijuru azi ko mubikwiriye byose.”

Ibyo ni “bintu” ki Yesu yavugaga avuga ko bizongererwa abashaka mbere na mbere ubwami bw’Imana no gukiranuka kwayo? Ni ibyo kurya, ibyo kunywa hamwe n’imyambaro. Ibyo ntawabijyamo impaka kuko ibyo ni byo Yesu yavuze mbere y’iri sezerano tuvuga (reba Mat. 6:25-31). Ibiribwa n’ibinyobwa n’imyambaro mu byukuri ni byo by’umubiri dukeneye. Kandi koko ni byo byonyine Yesu n’abigishwa be bagendanaga na we bari batunze.

Pawulo na we ku buryo bugaragara yemeranya na Yesu kuri iyo nsobanuro y’ibyo dukeneye, nk’uko tubona yandikiye Timoteyo:

Icyakora koko kubaha Imana iyo gufatanije no kugira umutima unyuzwe kuvamo inyungu nyinshi, kuko ari nta cyo twazanye mu isi kandi nta cyo tuzabasha kuyivanamo. Ariko ubwo dufite ibyo kurya n’imyambaro biduhagije tunyurwe na byo, kuko abifuza kuba abatunzi bagwa mu moshya no mu mutego, no mu irari ryinshi ry’ubupfu ryangiza, rikaroha abantu mu bibahenebereza bikabarimbuza. Kuko gukunda impiya ari umuzi w’ibibi byose, hariho abantu bamwe bazirarikiye barayoba, bava mu byo kwizera bihandisha imibabaro myinshi (1 Tim. 6:6-10).

Pawulo yumvaga ko icyo dukeneye mu buryo bw’umubiri ari ibyo kurya n’imyambaro gusa, naho ubundi ntaba yaravuze ko dukwiye kunyurwa n’ibyo gusa. Ibyo bituma tugira indi myumvire itandukanyeho gato kuri iryo sezerano yahaye Abafilipi yuko Imana izabamara ubukene bwabo bwose! Uburyo abavugabutumwa bamwe basobanura uwo murongo, wakwibwira ko ahubwo uvuga ngo, “Imana yanjye izahaza irari ryanyu ryose!” Ikindi kandi, niba tugomba kunyurwa n’ibyo kurya n’imyambaro gusa, tugomba kunyurwa noneho bingana iki n’ibyo dutunze? Kandi abenshi muri twe ni abafite ibirenze ibyo kurya n’imyambaro gusa.

Kutanyurwa

(Discontentment)

Ikibazo cyacu ni uko twibwira ko dukeneye ibirenze ibyo dukeneye koko. Tekereza ko igihe Imana yaremaga Adamu na Eva nta kintu bari bafite, nyamara babaga muri paradizo. Biragaragara neza ko mu mugambi w’Imana itashakaga ko umunezero wacu uzajya uturuka ku bwinshi bw’ibyo dutunze. Wigeze utekereza ko Yesu atigeze avoma amazi kuri robinet cyangwa ngo yiyuhagirire muri dushe y’ikizungu aho afungura amazi amumanukiraho? Ntiyigeze amesera imyenda ye mu mashini imesa; ntiyigeze akingura umuryango wa firigo. Ntiyigeza atwara imodoka cyangwa se n’igare byibura. Nta na rimwe yigeze yumva radiyo, ntiyigeze agira umuntu n’umwe avugisha kuri telefone, ntiyakoresheje imbabura za kizungu ateka, nta nubwo yigeze abwiriza akoresheje ibyuma by’amajwi nk’imizindaro cyangwa ibindi. Ntiyigeze areba video cyangwa televiziyo, cyangwa ngo acane amatara y’amashanyarazi, ntiyigeze yumva amafu ya vantilateri cyangwa bya byuma bindi bizana akayaga keza byitwa “climatiseur/air conditioner.”. Ntiyigeze yambara isaha ku kaboko. Ntiyagiraga akabati kuzuye imyambaro (garde robe/closet). Mbese ubwo yari kwishima ate?

Muri Leta Zunze Ubumwe z’Amerika (ahari wenda no mu gihugu cyawe), dusukwaho ibihumbi by’ubutumwa bwo kwamamaza butwereka uburyo abantu banezerewe bitewe n’ukuntu bishimiye ibintu bishya runaka baguze. Bityo ubwenge bwacu bakabuyobya (we are brainwashed or “brain-dirtied”) batwumvisha ko ibyishimo by’umuntu bituruka ku kwiyongera kw’ibyo atunze, nyamara kandi nubwo dukomeza kwirundanirizaho ibintu ntitunyurwa. Ibi ni byo Yesu yavugaga avuga “ibihendo by’ubutunzi” (Mat 13:22). Ubutunzi bukubwira ko buzaguha ibyishimo ariko ntibujya bukunda gusohoza isezerano ryabwo. Kandi uko tujya muri iyo nkundura ab’isi barimo yo kubwiruka inyuma, niko mu byukuri duhinduka abasenga ibigirwamana, tukaba imbata za mamoni, zibagirwa Imana n’amategeko yayo asumba ayandi ari yo kuyikunda n’umutima wacu wose no gukunda bagenzi bacu nk’uko twikunda. Imana yihanangirije ibi bintu Abisirayeli:

Wirinde ntuzibagirwe Uwiteka Imana yawe, ngo utitondera ibyo yategetse n’amateka yayo n’amategeko yayo, ngutegeka uyu munsi. Numara kurya ugahaga, ukamara kubaka amazu meza ukayabamo, inka zawe n’imikumbi yawe, n’ifeza zawe n’izahabu zawe n’ibyo ufite byose bikaba bigwiriye, uzirinde umutima wawe we kwishyira hejuru, ngo wibagirwe Uwiteka Imana yawe yagukuye mu gihugu cya Egiputa, mu nzu y’uburetwa (Guteg. 8:11-14).

Ni na ko kandi Yesu yihanangirije avuga ko “ibihendo by’ubutunzi” bishobora kuniga ubugingo bw’umwuka bw’umuntu wizera nyakuri aramutse yemeye gushukwa akarangara (reba Mat. 13:7, 22). Pawulo yatuburiye avuga ko “urukundo rw’impiya ari umuzi w’ibibi byose,” akavuga ati “hariho abantu bamwe bazirarikiye barayoba, bava mu byo kwizera bihandisha imibabaro myinshi” (1 Tim. 6:10). Umwanditsi w’igitabo cy’Abaheburayo araduhugura ati, “Ntimukagire ingeso zo gukunda impiya ahubwo mujye munyurwa n’ibyo mufite, , kuko ubwayo yavuze iti, ‘Sinzagusiga na hato kandi ntabwo nzaguhãna na hato'” (Heb. 13:5). Ibi ni bimwe gusa mu Byanditswe by’ibyitegererezo bituburira ku kaga gaturuka ku butunzi.

Iyo Amafaranga Ahindutse Umutware

(When Money is Master)

Birashoboka ko nta kindi gipimo gipima ubusabane bwacu n’Imana kiruta uburyo twitwara ku mafaranga. Amafaranga–igihe n’uburyo dukoresha ngo tuyagereho, n’ibyo tuyakoresha tumaze kuyashyikira–bigaragaza byinshi ku byerekeye ubuzima bwacu bw’umwuka. Amafaranga, igihe tuyafite ndetse n’igihe tutayafite, ni cyo kintu cya mbere gitera ibigeragezo kurusha ibindi byose. Amafaranga ashobora gutuma umuntu asuzugura mu buryo bworoshye cyane amategeko abiri aruta ayandi yose, kuko ashobora guhinduka ikigirwamana agasumba Imana nyaMana, kandi ashobora gutuma twikunda kurusha uko dukunda bagenzi bacu. Ku rundi ruhande kandi, amafaranga ashobora gukoreshwa nk’uburyo bwo kugaragaza urukundo dukunda Imana na bagenzi bacu.

Yesu yigeze guca umugani w’umuntu waretse agategekwa n’amafaranga aho gutegekwa n’Imana:

Hariho umukungu wari ufite imirima irumbuka cyane, nuko aribaza mu mutima we ati, “Ndagira nte ko ndafite aho mpunika imyaka yanjye?” Aribwira ati, “Ndabigenza ntya: Ndasenya urugarama rwanjye nubake urundi runini, abe ari mo mpunika imyaka yanjye yose n’ibintu byanjye. Ni bwo nzabwira umutima wanjye nti, ‘Mutima, ufite ibintu byinshi bibikiwe imyaka myinshi, ngaho ruhuka, urye unywe, unezerwe.'” Ariko Imana iramubwira iti, “Wa mupfu we! Muri iri joro, uranyagwa ubugingo bwawe. Ibyo wabitse bizaba ibya nde? “Ni ko umuntu wirundaniriza ubutunzi amera, atari umutunzi mu by’Imana (Luka 12:16-21).

Yesu yise uyu mugabo w’umutunzi umupfu. Nubwo yari afite umugisha wo kugira amagara meza ari mutaraga, akagira imirima irumbuka cyane n’ubuhanga bwo guhinga, ntiyari azi Imana, iyo bitaba ibyo ntaba yarirundanyijeho imitungo y’umurengera ngo yirundurire mu buzima bwo kwinezeza no kwidamararira. Ahubwo aba yarashatse mu maso h’Imana akamenya icyo yakoresha iyo migisha yahawe, azi neza ko ari uwaragijwe gusa iby’Imana. Birumvikana ko Imana yifuzaga ko yasangira n’abandi ibyo bintu bye byinshi kandi agakomeza gukora kugira ngo akomeze abone ibyo asangira n’abandi. Cyangwa se ikindi kimwe cyashobokaga cyiza, ni uko yari kureka gukomeza guhinga akiyegurira umurimo w’Imana akoresha ubutunzi bwe, bibaye ari byo Imana yamuhamagariye gukora.

Uwo muhinzi w’umutunzi wo mu mugani wa Yesu yabaze nabi cyane ku byerekeye umunsi wo gupfa kwe. Yibwiye ko agifite imyaka myinshi yo kubaho, mu gihe yari ashigaje amasaha abarirwa ku ntoki akinjira mu buzima bw’ibihe by’iteka. Ibyo Yesu yavuze ahangaha ntushobora kubyibeshyaho: Dukwiye kubaho buri munsi nk’aho ari wo munsi wa nyuma, twiteguye iteka kuba twahagarara imbere y’intebe y’Imana tugacirwa urubanza rw’ibyo twakoze.

Imyumvire y’Uburyo Bubiri

(Two Perspectives)

Mbega uburyo imyumvire y’Imana itandukanye n’iy’umuntu! Uyu mugabo w’umutunzi wo mu mugani wa Yesu yari uwo kwifuzwa na buri muntu wese wari umuzi, buri wese yifuza kuba yaba nka we, nyamara Imana yo yabonaga ari uwo kugirirwa impuhwe. Yari umutunzi mu maso y’abantu, ariko mu maso y’Imana yari umutindi. Yakabaye yaribikiye ubutunzi bwe mu ijuru aho bwari gukomeza kuba ubwe iteka ryose, ariko yahisemo kububika mu isi aho butashoboraga kuba bugifite icyo bumumariye uhereye umunota yapfiriyeho. Kandi turebye ibyo Yesu yavuze ku bantu b’abanyabugugu bagundira ibintu, nta wakeka ko Yesu yashakaga ko twibwira ko uwo mutunzi yagiye mu ijuru amaze gupfa.

Uyu mugani ukwiye kudufasha twese kwibuka ko ibyo dufite byose ari impano y’Imana, kandi ko ishaka ko tuba ibisonga byo kwizerwa. Ntibireba gusa abafite ubutunzi bw’isi, ahubwo bireba buri muntu wese ugeragezwa no iby’isi agaciro kanini cyane. Ibyo Yesu yarabisobanuye neza akomeza kubwira abigishwa be:

Ni cyo gituma [bishatse kuvuga ko ibyo Yesu yari agiye kuvuga aha byari bishingiye ku byo yari amaze kuvuga] mbabwira nti: Ntimukiganyire ngo mutekereze ibyo ubugingo muti ‘Tuzarya iki?’ Cyangwa iby’umubiri muti ‘Tuzambara iki?’ Kuko ubugingo buruta ibyo kurya, n’umubiri uruta imyambaro. Mwitegereze ibikona bitabiba ntibisarure, ntibigire ububiko cyangwa ikigega, nyamara Imana irabigaburira. Mwe se ntimuruta ibisiga cyane? Ni nde muri mwe wabasha kwiyunguraho umukono umwe, abiheshejwe no kwiganyira? Nuko ubwo mutabasha gukora igito rwose, ni iki kibaganyisha ibindi? Mwitegereze uburabyo uko bumera: ntibugira umurimo bukora, ntibuboha imyenda, ariko ndababwira yuko Salomo mu bwiza bwe bwose atarimbaga nka kamwe muri bwo. Ariko Imana ubwo yambika ubwatsi bwo mu gasozi ityo, buriho none n’ejo bakabujugunya mu muriro, ntizarushaho kubambika mwebwe abafite kwizera guke mwe? Ntimugahagarike umutima wo gushaka ibyokurya n’ibyokunywa, kandi ntimwiganyire. Ibyo byose abapagani bo mu isi ni byo bashaka, burya So aba azi ko namwe mubikennye. Ahubwo mushake ubwami bwe, kuko ari ho ibyo muzabyongerwa. Mwa mukumbi muto mwe, ntimutinye kuko So yishimira kubaha ubwami.

 

Mugure ibyo mufite, mutange ku buntu. Mwidodere udusaho tudasaza, ari bwo butunzi budashira buri mu ijuru, aho umujura atabwegera n’inyenzi ntizibwonone, kuko aho ubutunzi bwanyu buri, ari ho n’imitima yanyu izaba (Luka 12:22-34).

Mbega ukuntu amagambo ya Yesu atandukanye cyane n’ayabavugabutumwa b’iki gihe “bigisha iby’ubutunzi”! Muri iki gihe tubwirwa ko icyo Imana ishaka ari uko tugwiza ubutunzi, mu gihe Yesu yabwiraga abigishwa be ko bagurisha ibyo batunze bakabifashisha abakene! Na none yashyize ahagaragara ubupfapfa bw’ababika ubutunzi bwabo mu isi–aho ubwo butunzi bugomba kwangirikira byanze bikunze, kandi akaba ari ho n’imitima ya banyir’ubwo butunzi iba.

Urabona ko Yesu yakoresheje isomo ry’uwo mugani w’umutunzi w’umupfapfa ku bantu bari bafite utuntu duke cyane ku buryo bashoboraga kugeragezwa no guhangayikira ibyokurya n’imyambaro. Guhangayikishwa n’ibintu nk’ibyo byerekana ko duhanze amaso aho tutari dukwiye kuyahanga. Twiringiye koko Data utwitaho ntidushobora guhangayika, kuko uko kutitwararika ibintu gutuma dushobora kwita ku byo kubaka ubwami bw’Imana.

Urugero rwa Kristo

(Christ’s Example)

Yesu yavuze ibindi byinshi ku butunzi. Nyamara cyane cyane, nk’umukozi w’Imana uhindura abantu abigishwa wese, yigishije yitangaho icyitegererezo. Yigishaga ibyo akora. Yesu yabagaho ate?

Ntabwo Yesu yirundanyijeho imitungo y’isi, nubwo yashoboraga kuba yakoresha ibihe yari arimo akigwizaho ubutunzi cyane. Abakozi b’Imana benshi bafite impano z’umwuka bibwira bibeshya ko niba umurimo w’Imana bakora utuma haza amafaranga menshi ubwo ngo Imana igomba kuba ishaka ko na bo ubwabo baba abakire. Nyamara Yesu ntiyigeze akoresha amavuta y’Imana yari ari ku bugingo bwe ku bw’inyungu ze bwite. Ubutunzi yahawe yabukoreshaga ahindura abantu abigishwa. Yanamaraga ubukene bw’abigishwa be yatozaga. [1] Muri iki gihe cyacu, urubyiruko rw’abigishwa bagomba kwiyishyurira kugira ngo bashobore kwigishwa n’abakozi b’Imana babaruta mu mashuri ya Bibiliya. Nyamara Yesu we urugero yatanze ruhabanye n’ibyo cyane!

Yesu kandi yabayeho ubuzima bwo kwizera, yizera ko Se agomba kumumenyera ibimukwiye byose akamuha umugisha kugira ngo na we ashobore gufasha abandi. Rimwe na rimwe yatumirwaga mu birori byo kurya no kunywa, ubundi tukamubona ahekenya ingano mbisi asoromye mu murima (reba Luka 6:1).

Nibura ibihe bibiri yagaburiye ibihumbi by’abantu baje kumwumva yigisha. Mbega ukuntu bitandukanye cyane n’iby’ibiterane by’amahugurwa ya gikristo y’iki gihe aho buri wese agomba kwishyura amafaranga yo kwemererwa kwinjira muri ayo mahugurwa! Twe tugaburira ku buntu abaje gukurikira inyigisho zacu z’abakozi b’Imana baranaduseka rimwe na rimwe ngo “turagurira abantu kugira ngo baze kudutega amatwi.” Ariko mu byukuri icyo dukora ni ugutera ikirenge mu cya Yesu.

Yesu na we yitaga ku bakene, kuko abigishwa be bari bafite agasandugu k’amafaranga bakoragamo bafasha. Yesu yakundaga gufasha abakene cyane ku buryo igihe yabwiraga Yuda ngo agire vuba igihe yari avuye aho basangiriye Ifunguro Rya Nyuma, abandi bigishwa bose bibwiye ko agiye kugura ibyo kurya barya cyangwa ko hari amafaranga ashyiriye abakene (reba Yohana 13:27-30).

Yesu mu byukuri yakundaga mugenzi we nk’uko yikunda, bityo rero yabagaho mu buryo bwiyoroheje kandi agasangira n’abandi. Ntabwo yagombye kwihana yumvise ubutumwa bwa Yohana Umubatiza wavuze ati, “Ufite imyenda ibiri, umwe awuhe utawufite” (Luka 3:11). Yesu yagiraga ikanzu imwe gusa. Nyamara abavugabutumwa bigisha inyigisho z’ubutunzi bamwe bagerageza kutwemeza ko Yesu yari umukire kuko ngo imbere yambaragamo ikanzu itagira uruteranyirizo (reba Yohana 19:23), ngo iyo ikaba yaba yarashoboraga kwambarwa n’abantu b’abakire gusa. Mbega ukuntu umuntu yavugisha Bibiliya ibyo ashaka igihe yaba ashaka kwemeza abantu ibivuguruza ibindi byanditswe byinshi! Noneho dushobora no kuvuga ibindi nk’ibyo bidafite ishingiro tukavuga ko Yesu yashakaga guhisha ubukire bwe kuko inyuma ho atahambaraga imyambaro itagira uruteranyirizo.

Yesu yavuze ibindi byinshi ku mafaranga ku buryo tudafite umwanya wo kubirondora. Ariko reka tugire ibindi bike tureba mu bikunze kuvugwa n’abigisha iby’ubutunzi, ari na bo bakunze kugoreka ibyanditswe bakayobya abantu b’abemeragato.

“Imana Yagize Salomo Umukire”

(“God Made Solomon Rich”)

Iki ni ikintu abavugabutumwa bigisha iby’ubutunzi bakunda gukoresha biyorobeka bahisha irari ryabo. Bibagirwa ko Imana yahaye Salomo ubutunzi kubw’impamvu. Impamvu ni uko igihe Imana yasezeraniraga Salomo ko imuha icyo ayisabye cyose, Salomo yasabye ubwenge bwo gutegeka. Imana yishimiye cyane ko Salomo atasabye ubukire (mu bindi byose yashoboraga gusaba) ku buryo hamwe n’ubwo bwenge yasabye yamuhaye n’ubukire. Nyamara ariko Salomo ntiyakoresheje ubwenge yahawe nk’uko Imana yashakaga, bituma aba umupfapfa kurusha abandi bose babayeho. Iyo aza kugira ubwenge aba yarumviye ibyo Imana yari yarabwiye Abisirayeli mu Mategeko kera mbere y’uko avuka:

 

Numara kugera mu gihugu Uwiteka Imana yawe iguha, ukaba umaze kugihindùra no kugituramo, ukibwira uti, “Ndiyimikira umwami nk’uko ayandi mahanga angose yose ameze,”ntuzabure kwiyimikira uwo Uwiteka Imana yawe izatoranya, uwo muri bene wanyu azabe ari we wiyimikira, ntukwiriye kwimika umunyamahanga utari mwene wanyu. Ariko ye kuzishakira amafarashi menshi, kandi ntazasubizeyo abantu muri Egiputa kugira ngo yigwirize amafarashi menshi, kuko Uwiteka yababwiye ati, “Ntimuzasubira ukundi muri ya nzira.” Kandi ye kuzishakira abagore benshi, kugira ngo umutima we udahinduka ukava ku Uwiteka, kandi ye kuzarushaho kwishakira ifeza n’izahabu byinshi (Guteg. 17:15-17).

 

Iki ni ikindi cyanditswe ababwiriza iby’ubutunzi birengagiza iteka, bagakurikiza urugero rwa Salomo na we wakirengagije bikamuviramo akaga. Kandi kimwe na we bahinduka abasenga ibigirwamana. Wibuke ko umutima wa Salomo wayobye agatangira kuramya ibigirwamana kubera abagore be benshi, kandi abo bagore ntiyashoboraga kubabona adatagaguje bwa butunzi bwe.

Imana yashakaga ko Salomo akoresha ubutunzi yari yamuhaye mu gukunda mugenzi we nk’uko yikunda, ariko Salomo yabukoresheje mu kwikunda gusa wenyine. Yigwirije izahabu n’ifeza, amafarashi n’abagore, bityo yigomeka bitaziguye ku mategeko y’Uwiteka. Amaherezo yaje kurongora abagore maganarindwi n’incoreke maganatatu, bivuga ngo hari abagabo igihumbi yatwaye abagore. Aho gufasha abakene, Salomo yigwijeho ubutunzi. Ni ikintu gitangaje cyane kubona ukuntu abavugabutumwa bigisha iby’ubutunzi baha abakristo bo mu Isezerano Rishya Salomo ho icyitegererezo n’uburyo yishyize imbere yikunda wenyine akanasenga ibigirwamana. Mbese intego yacu si ugusa na Kristo?

“Imana Yagize Aburahamu Umukire, kandi Imigisha ya Aburahamu ni Isezerano Ryacu”

(“God Made Abraham Rich, and Abraham’s Blessings Are Promised To Us”)

Iki cyitwazo bakiremangatanije mu magambo ya Pawulo ari mu gice cya gatatu cy’igitabo cy’Abagalatiya. Ndavuga umurongo bakunze kuvuga, ariko jye ndawuvuga mu mwanya wawo wakoreshejwemo:

Kandi ibyanditswe byamenye bitaraba yuko Imana izatsindishiriza abanyamahanga kuko bizeye, bibwira Aburahamu ubutumwa bwiza bw’ibitaraba biti, “Muri wowe ni mo amahanga yose azaherwa umugisha.” Nuko abiringira kwizera, bahanwa umugisha na Aburahamu wizeraga.

Abiringira imirimo itegetswe n’amategeko bose ni ibivume, kuko handitswe ngo, “Havumwe umuntu wese udahirimbanira ibyanditswe mu gitabo cy’amategeko byose ngo abikore.” Biragaragara yuko ari nta muntu utsindishirizwa n’amategeko imbere y’Imana, kuko,” Ukiranuka azabeshwaho no kwizera.” Nyamara amategeko ntagira icyo ahuriyeho no kwizera, ariko rero “Uyakomeza azabeshwaho na yo.” Kristo yaducunguriye kugira ngo dukizwe umuvumo w’amategeko, ahindutse ikivume ku bwacu–kuko byanditswe ngo, “Havumwe umuntu wese umanitswe ku giti”–kugira ngo umugisha wa Aburahamu ugere no ku banyamahanga bawuheshejwe na Yesu Kristo, kwizera kubone uko kuduhesha wa Mwuka twasezeranijwe (Gal. 3:8-14).

“Umugisha wa Aburahamu” Pawulo yanditse ku murongo wa 14 ryari isezerano ry’Imana kuri Aburahamu ko izahera amahanga yose umugisha muri we (ari wo Pawulo yavuze ku murongo wa 8), cyangwa ku buryo bwumvikana neza, nk’uko Pawulo yabisobanuye mu mirongo ikurikiraho, mu rubyaro rwa Aburahamu, nko kuvuga umwe, Yesu (Gal. 3:16). Dukurikije ibyo tumaze gusoma, Yesu yatanze uwo mugisha wasezeranijwe avumwa n’Imana, apfira ibyaha by’ab’isi ku musaraba. Nuko rero “kuza k’umugisha wa Aburahamu ku banyamahanga” ntabwo ari uko Imana iha abanyamahanga ubutunzi bw’isi nka Aburahamu, ahubwo ni isezerano ry’Imana yagiriye Aburahamu ko izahera abanyamahanga umugisha mu rubyaro rwe–no kurisohoresha Yesu apfira ku musaraba ku bwabo. (Icyo Pawulo yari agamije cyane cyane kuvuga ahangaha ni uko abanyamahanga bashobora gukizwa no kwizera, kimwe n’Abayuda, babiheshejwe no kwizera Yesu.)

Ukundi Kugoreka

(Another Twisting)

Aha na ho hajya hakoreshwa cyane mu bundi buryo n’abavugabutumwa bigisha iby’ubutunzi bashyigikira inyigisho zabo. Baravuga ngo kuko amategeko avuga ko utayakomeza azagibwaho n’umuvumo w’ubukene (reba Guteg. 28:30-31, 33, 38-40, 47-48, 51, 68), ngo kandi kuko Pawulo yanditse ngo, “Kristo yaducunguriye kugira ngo dukizwe umuvumo w’amategeko” mu gitabo cy’Abagalatiya 3:13, ngo twe turi muri Kristo twarakijijwe umuvumo w’ubukene.

Ubwa mbere, kuba Pawulo yaba yaravugaga by’umwihariko imivumo ivugwa mu Gutegeka Kwa Kabiri 28 igihe yandikaga iby’ “umuvumo w’amategeko” Kristo yadukijije, ni ibyo kugibwaho impaka. Urabona ko Pawulo atavuze ngo Kristo yadukijije “imivumo” (mu bwinshi) y’amategeko, ahubwo yavuze “umuvumo” w’amategeko, mu buke, bishatse ahari kuvuga ko amategeko yose uko yakabaye ari umuvumo ku bagerageza gukizwa ku bwo kuyakomeza. Iyo tumaze gucungurwa na Kristo, ntituba tukigerageza kwikiza ubwacu mu gukomeza amategeko, bityo rero tuba “dukijijwe umuvumo w’amategeko.”

Iyo Pawulo aza kuba koko avuga ko Kristo yaducunguriye kugira ngo dukizwe buri cyago cyose kiri mu Gutegeka Kwa Kabiri 28, bityo bikaduhesha uburenganzira ku butunzi bw’isi, twakwibaza impamvu Pawulo yanditse yivugaho ati, “Kugeza na n’ubu twishwe n’inzara n’inyota kandi twambaye ubusa, dukubitwa ibipfunsi turi inzererezi” (1 Kor. 4:11). Twakwibaza kandi icyatumye Pawulo yandika ati,

Ni nde wadutandukanya n’urukundo rwa Kristo? Mbese ni amakuba, cyangwa ni ibyago, cyangwa ni ukurenganywa, cyangwa ni inzara, cyangwa ni ukwambara ubusa, cyangwa ni ukuba mu kaga, cyangwa ni inkota? Nk’uko byanditswe ngo,

“Turicwa umunsi ukira bakuduhora, twahwanijwe n’intama z’imbagwa” (Rom. 8:35-36).

Birumvikana ko Pawulo atari kwandika aya magambo iyo abakristo bose baza kuba badafite guhura no kurenganywa, inzara, kwambara ubusa, akaga n’inkota kuko Kristo yaducunguriye kugira ngo adukize umuvumo w’amategeko.

Dushobora no kwibaza impamvu Yesu yaba yaravuze uko mu ijuru bizagenda nk’uko tubibona mu nkuru ikurikira,

Umwami azabwira abari iburyo bwe ati, “Nimuze mwebwe abo Data yahaye umugisha, muragwe ubwami bwabatunganirijwe uhereye ku kuremwa kw’isi, kuko nari nshonje mukamfungurira, nari mfite inyota mumpa icyo nywa, nari umushyitsi murancumbikira, nari nambaye ubusa muranyambika, nari ndwaye muransura, nari mu nzu y’imbohe muza kundeba.” Abakiranutsi bazamubaza bati, ‘Mwami, twakubonye ryari ushonje turagufungurira, cyangwa ufite inyota tuguha icyo unywa? Kandi twakubonye ryari uri umushyitsi turagucumbikira, cyangwa wambaye ubusa turakwambika? Kandi twakubonye ryari urwaye cyangwa uri mu nzu y’imbohe tuza kugusura?” Umwami azabasubza ati, “Ndababwira ukuri yuko ubwo mwabikoreye umwe muri bene Data aba boroheje bari hanyuma y’abandi, ari jye mwabikoreye.” (Mat. 25:34-40).

Bityo rero nta gushidikanya ko abakristo bamwe “bacunguwe kugira ngo bakizwe umuvumo w’amategeko” bazisanga bari mu bihe bitari iby’ubukire. Nyamara urabona ko muri ibyo bihe biruhije Yesu yavuze, Imana yagiye ikemura ibibazo by’abizera, kandi ikabikorera mu bandi bizera bafite ibirenze ibyo bakeneye. Dushobora kwiringira iteka ko Imana izatumara ubukene bwacu bwose, nubwo ibihe turimo biba bitwereka ibitandukanye n’ibyo.

Hanyuma ikindi, abo bamamaza iby’ubutunzi bashaka kuba abakire nka Aburahamu bakwiye kwibaza mu byukuri niba bashaka kuba mu ihema ubuzima bwabo bwose nta mashanyarazi nta n’amazi mu nzu! Abo Imana yari yarahaye umugisha w’ubukire runaka mu Isezerano rya Kera bagombaga gukoresha ubutunzi bwabo ku bw’icyubahiro cy’Imana, basangira n’abandi ibisaga byabo. Ibyo ni byo Aburahamu yakoraga, aha akazi amagana y’abantu bityo akamara ubukene bwabo (reba Itang. 14:14). Ni na byo Yobu yakoraga, na we yahamije ko ubukire bwe yabukoreshaga afasha imfubyi n’abapfakazi (Yobu 29:12-13, 31:16-22). Abafite impano mu guteza imbere iby’ubucuruzi bakwiye kumenya ko icy’ingenzi mu bucuruzi bwabo ari ukubaha Imana no gukunda mugenzi wabo nk’uko bikunda.

“Ibyanditswe Bivuga Ko Yesu Yisize Ubusa Kugira Ngo Adutungishe” “

“Scripture Says That Jesus Became Poor So That We Could Become Rich”

Koko Bibiliya iravuga ngo,

Kuko muzi ubuntu bw’Umwami wacu Yesu Kristo uko yari umutunzi, maze agahinduka umukene ku bwanyu kugira ngo ubukene bwe bubatungishe (2 Kor. 8:9).

 

Bavuga ko ngo bitewe n’uko iki cyanditswe kigaragaza neza ko Yesu yari afite ubutunzi bw’ibintu bwinshi mu ijuru hanyuma agahinduka umukene mu isi, ngo ubwo rero ubutunzi bw’ibintu ni bwo Pawulo yavugaga igihe yabwiraga abo yandikiraga ko bagomba gutungishwa n’ubukene bwa Kristo. Bakavuga bati ntibishoboka niba Pawulo mu gice cya mbere cy’uwo murongo yaravugaga ubutunzi bw’ibintu ko mu gice cya kabiri cyawo bwaba ubutunzi bw’umwuka avuga.

Nyamara koko niba Pawulo duhinduka abatunzi b’ibintu ku bw’ubukene bwa Kristo mu buryo bw’umubiri, twakagombye kwibaza impamvu nyuma yaho gato yanditse muri urwo rwandiko nyine ngo,

Mu miruho n’imihati. Mba maso kenshi, ngira inzara n’inyota, nirirwa ubusa kenshi, nicwa n’imbeho, nambara ubusa (2 Kor. 11:27).

 

Niba Pawulo mu 2 Abakorinto 8:9 yaravugaga ko Kristo yahindutse umukene w’ibintu kugira ngo twebwe tube abatunzi b’ibintu, ubwo rero ntabwo umugambi wa Yesu wasohozwaga mu buzima bwa Pawulo! Bityo rero mu buryo bugaragara ntabwo Pawulo yavugaga ko Kristo yabaye umukene w’ibintu kugira ngo twebwe duhinduke abatunzi b’ibintu hano ku isi. Yavugaga ko tugomba kuba abakire mu buryo bw’umwuka, “abatunzi mu by’Imana,” dukoresheje imvugo Yesu yakoresheje (reba Luka 12:21), n’abakire mu ijuru aho ubutunzi bwacu n’imitima yacu biri.

Ariko se koko haba harimo ubwenge kwibwira ko ngo kuko Pawulo yavugaga ubutunzi bw’isi mu gice kimwe cy’uwo murongo ngo ntibyashoboka ko yavuga ubutunzi bw’umwuka mu kindi gice cy’uwo murongo nyine, nk’uko ababwiriza iby’ubutunzi bavuga? Tekereza kuri aya magambo akurikira Yesu yabwiye bamwe mu bayoboke be b’i Simuruna:

Nzi amakuba yawe n’ubukene bwawe (ariko rero uri umutunzi)…(Ibyah. 2:9a).

 

Biragaragara neza ko Yesu yavugaga ubukene bw’ibintu abizera b’i Simuruna bari bafite, hanyuma nyuma yahoo gato gusa yavugaga ubutunzi bw’umwuka abo bizera bari bafite.

“Yesu Yasezeranyije Kuzadukubira Incuro Ijana Ku Gutanga Kwacu”

” Jesus Promised a Hundred-Fold Return on Our Giving”

Yesu ntiyasezeranye incuro ijana ku bantu bagira ibyo batanga runaka. Reka turebe uko yavuze mu byukuri:

Ndababwira ukuri yuko ntawasize inzu, cyangwa bene se, cyangwa bashiki be, cyangwa nyina, cyangwa se, cyangwa abana, cyangwa amasambu ku bwanjye no ku bw’ubutumwa bwiza, utazahabwa ibibiruta incuro ijana muri iki gihe cya none, ari amazu, ari bene se, ari bashiki be, ndetse na ba nyina, n’abana n’amasambu, hamwe no kurenganywa, maze mu gihe kizaza akazahabwa ubugingo buhoraho (Mariko 10:29-30).

Urabona ko iri atari isezerano kuri bamwe baha abavugabutumwa amafaranga, nk’uko bikunze kuvugwa cyane n’ababwiriza iby’ubutunzi. Ahubwo iri ni isezerano ry’abasiga ingo zabo, bagasiga amasambu bagasiga n’ababo bakajya kure gukwiza ubutumwa bwiza. Abo Yesu yabasezeraniye kuzabashumbusha “incuro ijana ibibiruta muri iki gihe cya none.”

Ariko se yavugaga ko bene abo bantu bazatunga koko amazu ijana cyangwa amasambu ijana nk’uko ababwiriza iby’ubutunzi bamwe bavuga? Oya, kimwe nk’uko atashakaga kuvuga ko abo bantu koko bazagira ba nyina ijana n’abana ijana koko. Icyo Yesu yavugaga gusa ni uko abo bantu basiga ingo zabo n’imiryango yabo bazahura n’abizera bagenzi babo biteguye kubakingurira inzu zabo bakabakira iwabo nk’abavandimwe babo rwose.

Urabona kandi ko Yesu yasezeranyije abo bantu kurenganywa hamwe n’ubugingo buhoraho. Ibi bitwibutsa icyo aya magambo yari aturutseho muri rusange, aho abigishwa bitegerezaga umusore w’umutunzi akaba n’umutware washakaga ubugingo buhoraho maze akagenda ababaye nuko Yesu akavuga ati, “Icyoroshye ni uko ingamiya yanyura mu zuru ry’urushinge, kuruta ko umutunzi yakwinjira mu bwami bw’Imana” (Mariko 10:25).

Abigishwa batangajwe cyane n’ayo magambo ya Yesu, nuko bibaza noneho bo ku mahirwe yabo yo kujya mu bwami bw’Imana. Bibutsa Yesu ibyo basize ngo bamukurikire. Ubwo ni bwo Yesu yavuze ibyo gushumbushwa “incuro ijana.”

Nubwo ari uko bimeze, biratangaje ukuntu buri muntu ubwiriza iby’ubutunzi ashaka kwemeza abantu ko Yesu yadusezeranyaga koko kudukubira incuro ijana z’ibintu maze mu gihe gito cyane tukaba abatunzi bakomeye, cyane cyane ko mu masegonda macye abanziriza ibyo Yesu yari amaze kubwira wa mutunzi ngo agurishe ibyo atunze byose maze abifashishe abakene niba ashaka ubugingo buhoraho!

Hari n’ibindi byanditswe byinshi, uretse ibi tumaze kubona, ababwiriza iby’ubutunzi bagoreka, ariko byose ntitwabibonera akanya muri iki gitabo. Murabe maso!

“Amagambo y’Igiciro Dukwiye Kwibuka”

(“A Maxim to Remember”)

John Wesley, watangije umuryango w’abametodisiti mu Itorero ry’Ubwongereza, yasize amagambo atagira uko asa ku byerekeye uko tugomba gufata amafaranga. Ni aya, “Unguka ibyo ushoboye byose; uzigame ibyo ushoboye byose; utange ibyo ushoboye byose.”

Ni ukuvuga ngo, abakristo bagomba gukoresha amaboko yabo, bagakoresha ubushobozi Imana yabahaye n’uburyo Imana ibahaye bwo gukorera amafaranga, ariko bakabikorana ubunyangamugayo kandi bakirinda kugira itegeko na rimwe rya Kristo bica.

Icya kabiri, bagomba kubaho mu buzima bworoheje budahenze cyane, bagakoresha amafaranga macye ku buryo bushoboka bwose, bityo bikababashisha “kuzigama ayo bashoboye yose.”

Hanyuma, bamaze gukurikiza izo ntambwe ebyiri za mbere, bagomba “gutanga ayo bashoboye yose,” batagarukira ku cyacumi gusa, ahubwo bakigomwa ku buryo bushoboka bwose kugira ngo bashobore kugaburira imfubyi n’abapfakazi kandi n’ubutumwa bwiza bugakomeza kubwirizwa hirya no hino mu isi.

Ab’itorero rya mbere babyitwaragamo neza batyo, kandi gusangira n’abakene muri bo icyo cyari ikintu cyarangaga ubuzima bw’abo mu Isezerano Rishya. Abo mu itorero rya mbere bitonderaga cyane itegeko Yesu yahaye abayoboke be avuga ati, “Mugure ibyo mufite, mutange ku buntu. Mwidodere udusaho tudasaza, ari bwo butunzi budashira buri mu ijuru, aho umujura atabwegera n’inyenzi ntizibwonone” (Luka 12:33). Dusoma mu nkuru ya Luka iby’abo mu itorero rya mbere:

Abizeye bose babaga hamwe bagasangira ibyabo byose, ubutunzi bwabo n’ibintu byabo barabiguraga, bakabigabanya bose nk’uko umuntu wese akennye. Abizeye bose bahuzaga umutima n’inama, kandi nta n’umwe wagiraga ubwiko ku kintu, ahubwo byose barabisangiraga….nuko rero Ubuntu bw’Imana bwinshi bukaba kuri bo bose. Nta mukene wababagamo, kuko abari bafite amasambu bose cyangwa amazu barabiguraga, bakazana ibiguzi by’ibyo baguze, bakabishyira intumwa, na zo zikabigabanya abantu, umuntu wese agahabwa icyo akennye (Ibyak 2:44-45; 4:32-35).

Kandi Bibiliya igaragaza neza ko ab’itorero rya mbere bagaburiraga abapfakazi bakennye bakamara n’ubukene bwabo bwose (reba Ibyak 6:1; 1 Tim. 5:3-10).

Pawulo, intumwa ikomeye cyane mu zabayeho zindi zose, watumwe n’Imana kubwiriza abanyamahanga ubutumwa bwiza, akaba ari we wanditse inzandiko nyinshi zo mu Isezerano Rishya, yabonaga ko gufasha abakene ari cyo kintu cy’ingenzi mu murimo we. Mu matorero Pawulo yatangije, yakusanyaga amafaranga menshi yitangishije ku bwo gufasha abakristo b’abakene (reba Ibyak 11:27-30; 24:17; Rom. 15:25-28; 1 Kor. 16:1-4; 2 Kor. 8-9; Gal. 2:10). Nyuma y’imyaka cumi n’irindwi nibura amaze gukizwa, Pawulo yafashe urugendo ajya i Yerusalemu ashyiriye Petero, na Yakobo na Yohana ubutumwa bwiza yari yahawe ngo babusuzume barebe ko ari bwo. Nta n’umwe muri bo wigeze agira inenge abona kuri ubwo butumwa yabwirizaga, Pawulo yibuka iby’icyo gihe yanditse mu rwandiko rwe yandikiye Abagalatiya ati, “Ariko hariho kimwe banyongereyeho, ni uko twibuka abakene–kandi ibyo narinsanzwe mfite umwete wo kubikora (Gal. 2:10). Ku bwa Petero, Yakobo, Yohana na Pawulo, gufasha abakene, ni cyo cyari ikintu cya kabiri nyuma yo kubwiriza ubutumwa bwiza.

Mu Ncamake

(In Summary)

Kuri ibi, inama nziza umuntu yagira abakozi b’Imana bahindura abantu abigishwa itangwa na Pawulo, we wamaze kuburira Timoteyo ati “gukunda impiya ni umuzi w’ibibi byose,” kandi ati “hariho abantu bamwe bazirarikiye barayoba, bava mu byo kwizerwa bihandisha imibabaro myinshi,” akamuhugura ati,

Ariko wehoho muntu w’Imana ujye uhunga ibyo, ahubwo ukurikize gukiranuka, kubaha Imana , kwizera,, urukundo, kwihangana n’ubugwaneza (1 Tim. 6:11).

 

---

[1] Abavugabutumwa bigisha iby’ubutunzi akenshi ibi bakunda kubivuga bashaka kwemeza ko Yesu akora umurimo we hano mu isi yari afitemo ubukire. Nta gushidikanya ko Imana yahaga Yesu ibyo akeneye byose kugira ngo abashe gusohoza inshingano ze. Itandukaniro hagati ya Yesu n’abavugabutumwa bamamaza iby’ubutunzi ni uko Yesu we atari we wirebagaho gusa, kandi ntiyakoresheje amafaranga y’umurimo mu kwigwizaho imitungo ubwe.

Ibyerekeye iby’intambara yo mu mwuka byaramamaye cyane mu itorero muri iyi myaka ishize ya vuba. Ikibabaje ariko, ibyinshi mu byigishwa bivuguruza Bibiliya. Ingaruka iba ko usanga abakozi b’Imana benshi hirya no hino mu isi bigisha bakanarwana intambara y’umwuka Bibiliya itavuga. Koko hari intambara yo mu mwuka Ibyanditswe bivuga, kandi iyo ni yo abakozi b’Imana bahindura abantu abigishwa bakwiye kurwana bakanigisha.

Muri iki gice n’ikigikurikira ndavuga ku myumvire mibi abantu bagira kuri Satani no ku ntambara yo mu mwuka. Ni icyegeranyo cy’ibiri mu gitabo nanditse kitwa, Modern Myths About Satan and Spiritual Warfare(“Ibyo Abantu Bibwira Kuri Satani n’Intambara Yo Mu Mwuka Muri Iki Gihe”). Icyo gitabo ushobora kugisoma mu Cyongereza mu buryo bwuzuye ku rubuga rwacu rwa interineti www.shepherdserve.org.

Iki gitekerezo by’umwihariko kivuguruza rimwe mu mahame akomeye y’ibanze ku Mana riri muri Bibiliya–rivuga ko Imana nta kiyinanira, cyangwa ko ari Ishoborabyose.

Yesu yatubwiye ko byose bishobokera Imana (reba Mat. 19:26). Yeremiya yahamije ko nta kintu na kimwe kibasha kuyinanira (reba Yer. 32:17). Nta n’umwe cyangwa ikintu icyo ari cyo cyose cyabasha kurogoya imigambi yayo (reba 2 Ingoma 20:6; Yobu 41:10; 42:2). Imana inyuze muri Yeremiya yarabajije iti, “Ni nde uhwanye nanjye….Ni nde…uzanyimīra?” (Yer. 50:44). Igisubizo ni nta n’umwe, haba na Satani.

Niba Imana ishobora byose koko nk’uko Ibyanditswe tumaze kubona bibyemeza, kuvuga ko Imana ihanganye na Satani uba ushatse kuvuga ko idashobora byose. Niba Imana hari ubwo yaba yarigeze itsindwa na gato, ikaneshwa na Satani na gato gusa cyangwa hakaba hari ubwo yigeze kurwana na Satani n’ubwo cyaba igihe gito gusa, ubwo ntiyaba ishobora byose nk’uko ibyivugira ubwayo.

Yesu Avuga Ku Mbaraga za Satani

(Christ’s Commentary on Satan’s Power)

Yesu yigeze kuvuga ikintu ku byerekeye kugwa kwa Satani ava mu ijuru kiri budufashe gusobanukirwa imbaraga Satani afite ugereranyije n’iz’Imana yacu ishobora byose:

Nuko abo mirongo irindwi bagaruka bishīma bati, “Databuja, abadayimoni na bo baratwumvira mu izina ryawe.” Arababwira ati, “Nabonye Satani avuye mu ijuru, agwa asa n’umurabyo” (Luka 10:17-18).

Igihe Imana Ishoborabyose yacaga iteka ry’uko Satani yirukanwa mu ijuru, Satani ntiyashoboye kubirwanya. Yesu yahisemo ikigereranyo ngo, asa n’umurabyo, kugira ngo asobanure umuvuduko yahanukanye akagwa. Ntiyaguye nk’ibishingwe byatinda mu kirere ahubwo yaguye nk’umurabyo. Mu isegonda rimwe yari ari mu ijuru, mu rindi segonda rikurikiyeho–BOOM!–ibye byari byarangiye yagiye!

Niba Imana ishobora kwirukana Satani ubwe vuba kandi mu buryo buyoroheye gutyo, ntibitangaje ko abagaragu bayo itumye bakwirukana abadayimoni vuba kandi biboroheye. Kimwe n’abigishwa ba mbere ba Kristo, Abakristo benshi cyane batangarira imbaraga za Satani ariko ntibarashyikira uburyo imbaraga z’Imana zirenze cyane mu buryo butavugwa izo za Satani. Imana ni Rurema, ariko Satani ni ikiremwa gusa. Satani ntaho ahuriye n’Imana mu mbaraga.

Intambara Itigeze Iba

(The War That Never Was)

Bishobora gutungura cyane amatwi ya bamwe muri twe, ariko tugomba gusobanukirwa ko nta ntambara Imana irimo irwana na Satani, nta yigeze ibaho na rimwe, kandi iyo ntambara ntizigera ibaho. Ni byo koko bafite imigambi ihabanye, kandi umuntu yashobora kuvuga ko batavuga rumwe. Ariko iyo hari impande ebyiri zitavuga rumwe, uruhande rumwe ariko rukaba rurusha urundi imbaraga cyane ku buryo butagereranywa, kutumvikana kw’izo mpande zombi ntibyitwa ko bari ku rugamba barwana. Mbese umunyorogoto warwana n’inzovu? Satani, nk’umunyorogoto, yagerageje kwanjwa ngo ararwanya Umurusha amaboko ku buryo butagereranywa. Kwigomeka kwe kwahise gufatirwa ibyemezo, ashushubikanywa yirukanwa mu ijuru “nk’umurabyo.” Nta kurwana kwabayeho–habayeho kwirukanwa gusa.

Niba Imana ishobora byose, Satani nta n’agacucu k’amahirwe afite ko kuba yanakwibeshya ngo ararogoya Imana ayibuze gukora icyo ishaka gukora. Kandi iyo Imana yemereye Satani kugira ikintu akora, iba ishaka amaherezo gusohoza imigambi yayo gusa nk’Imana. Ibi biri buze kugenda bisobanuka kurushaho uko tugenda dusuzuma ibyanditswe bivuga kuri iyi ngingo.

Igishimishije, ubutware butangaje Imana ifite kuri Satani ntabwo bwerekanwe gusa mu bihe by’iteka byatambutse, ahubwo buzerekanwa no mu gihe kizaza. Dusoma mu gitabo cy’Ibyahishuwe ko hari marayika uba ukwe kwa wenyine uzaboha Satani akamushyira mu buroko kumara imyaka igihumbi (reba Ibyah. 20:1-3). Ibyo bizaba ntibishobora kwitwa intambara hagati y’Imana na Satani nk’uko igihe Satani yirukanwaga mu ijuru ntawabyita intambara. Urabona kandi ko Satani nta bushobozi azagira bwo kwikura muri gereza ahubwo azarekurwa gusa igihe Imana izaba ibonye ko igihe kigeze bijyanye n’imigambi yayo. (reba Ibyah. 20:7-9).

Hanyuma se Iby'”Intambara izaba mu Ijuru”?

(What About the Future “War in Heaven”?)

None se niba nta ntambara iri hagati y’Imana na Satani, ikaba ntayigeze ibaho, ikaba itazanigera ibaho, kuki dusoma mu gitabo cy’Ibyahishuwe ko hari hari intambara izaba mu ijuru kandi izaba irimo Satani (reba Ibyah. 12:7-9)? Icyo ni ikibazo cyiza kandi cyoroshye gusubiza.

Urabona ko iyo ntambara izaba hagati ya Mikayeli n’abamarayika be na Satani n’abamarayika be. Imana ubwayo ntabwo ivugwa ko izaba iri mu ntambara. Imana iramutse igiyemo ntibyakwitwa intambara, kuko ari Imana ishobora byose, mu kanya gato cyane yaba ikuyeho icyayitambika imbere cyose nk’uko yamaze kubigaragaza.

Abamarayika, na Mikayeli arimo, ntibashobora byose, bityo rero ni yo mpamvu guhangana kwabo na Satani bishobora kwitwa intambara kuko hazaba kurwana koko kumara igihe runaka. Ariko na none kuko ari bo bafite imbaraga nyinshi, bazanesha Satani n’abambari be.

Kuki Imana ubwayo itazajya muri urwo rugamba ngo irwane ahubwo ikabirekera abamarayika bayo? Simbizi. Nta gushidikanya, kuko Imana izi byose, yari izi ko abamarayika bayo bazatsinda iyo ntambara, nuko ahari ibona ko bitari ngombwa ko ubwayo irinda kujyamo.

Sinshidikanya ko Imana iba yarashoboye kurimbura mu kanya gato kandi biyoroheye Abanyakanani babi mu gihe cya Yoshuwa, ariko yahisemo kurekera Abisirayeli uwo murimo. Ibyo Imana yashoboraga gukora mu masegonda kandi nta n’imbaraga biyisabye gushyiraho, yasabye ko ari bo babikora, kandi byabasabye imbaraga nyinshi binabatwara amezi menshi. Wenda ibi ni byo byanezezaga Imana kurushaho kuko byasabaga Abisirayeli kwizera. Ahari wenda ni yo mpamvu Imana ubwayo itazajya muri iriya ntambara izaba mu ijuru. Bibiliya ariko ntibitubwira.

Kuko gusa umunsi umwe mu ijuru hazaba intambara hagati ya Mikayeli ari kumwe n’abamarayika be na Satani ari kumwe n’abamarayika be, iyo si impamvu yo kwibwira ko Imana idashobora byose–nk’uko intambara Abisirayeli barwanye i Kanani zitaba impamvu yo kwibwira ko Imana idashobora byose.

Mbese Ku Musaraba Yesu Ntiyatsinze Satani?

(Was Not Satan Defeated by Jesus on the Cross?)

Ubwa nyuma, ku byerekeranye n’iki gitekerezo abantu bibwira cy’intambara yaba iri hagati y’Imana na Satani, ndashaka kwanzura mvuga ku magambo akunze gukoreshwa ngo: Yesu yanesheje Satani ku musaraba. Mu byukuri ntaho Bibiliya ivuga ko Yesu yanesheje Satani ku musaraba.

Iyo tuvuze ngo Yesu yanesheje Satani, tuba twumvikanisha ko Yesu na Satani barwanye, ibyo kandi bikumvikanisha yuko Imana idashobora byose kandi ko Satani atari yakageze rwose munsi y’ubutware bw’Imana. Hari ubundi buryo bwa Bibiliya bwo kuvuga ibyabaye kuri Satani igihe Yesu yatangaga ubugingo bwe i Kaluvariyo. Urugero, Bibiliya itubwira ko mu rupfu rwe, Yesu yahinduye “ubusa ufite ubutware bw’urupfu” (reba Heb. 2:14-15).

Ni mu buhe buryo Yesu yahinduye Satani ubusa? Kuko biragaragara neza ko imbaraga za Satani zitarimbutse rwose, naho ubundi ntabwo intumwa Yohana yari kwandika ngo, “Ab’isi bose bari mu bubasha bwa wa mubi ” (1 Yoh 5:19). Dukurikije Abaheburayo 2:14-15, Satani yahinduwe ubusa ku byerekeranye “n’ubutware bw’urupfu.” Ibyo bisobanura iki?

Ibyanditswe bivuga uburyo butatu bw’urupfu: urupfu rw’umwuka, urupfu rw’umubiri, n’urupfu rwa kabiri.

Nk’uko twabyize mu gice twabonye mbere, urupfu rwa kabiri (cyangwa urupfu rw’iteka) ruvugwa mu gitabo cy’Ibyahishuwe 2:22; 20:6,14; 21:8, ni igihe abatizera bazajugunywa mu nyanja yaka umuriro n’amazuku.

Urupfu rw’umubiri ni igihe umwuka w’umuntu utandukanye n’umubiri we, hanyuma umubiri ukaba utagikora.

Urupfu rw’umwuka bivuga uko umwuka w’umuntu uba umeze iyo utarabyarwa ubwa kabiri n’Umwuka w’Imana. Umuntu wapfuye mu buryo bw’umwuka aba afite umwuka uri kure y’Imana cyane, umwuka ufite kamere y’icyaha, umwuka umuntu yavuga ko mu buryo runaka uba ufatanye na Satani. Abefeso 2:1-3 haduha ishusho y’umuntu wapfuye mu buryo bw’umwuka:

Namwe yarabazuye mwebwe abari bapfuye muzize ibicumuro byanyu, ibyo mwagenderagamo kera mukurikiza imigenzo y’iyi si, mugakurikiza umwami utegeka ikirere, ari wo mwuka ukorera mu batumvira. Kandi natwe twese twahoze muri bo dukurikiza ibyo kamere yacu yifuza, tugakora ibyo kamere n’imitima byacu byishakira, kandi ku bwa kavukire yacu twari abo kugirirwa umujinya nk’abandi bose.

Pawulo yavuze ko Abefeso bari bapfuye mu bicumuro n’ibyaha byabo. Biragaragara neza ko atavugaga urupfu rw’umubiri kuko yandikiraga abantu bazima mu buryo bw’umubiri. Ubwo rero, agomba kuba yaravugaga ko bapfuye mu buryo bw’umwuka.

Ni iki cyari cyarabishe mu mwuka? Byari “ibicumuro n’ibyaha byabo.” Wibuke ko Imana yabwiye Adamu ngo natumvira, azapfa (reba Itang. 2:17). Imana ntiyavugaga urupfu rw’umubiri, yavugaga urupfu rw’umwuka, kuko Adamu ntiyapfuye mu buryo bw’umubiri ubwo yaryaga ku mbuto yabujijwe. Ahubwo icyo gihe yapfuye mu mwuka, ariko mu buryo bw’umubiri yakomeje kubaho yaje gupfa nyuma y’imyaka magana.

Pawulo yakomeje avuga ko Abefeso, nk’abantu bapfuye mu mwuka, bagenderaga mu (cyangwa bakoraga) byaha n’ibicumuro, bakurikiza “uko ab’isi bakora” (ni ukuvuga gukora nk’ibyo abandi bose bakora) kandi bakurikizaga “umwami utegeka ikirere.”

Ni nde “mwami utegeka ikirere”? Ni Satani, utegeka ubwami bw’umwijima nk’umugaba mukuru w’indi myuka mibi yo mu kirere. Iyo myuka mibi iri mu nzego zitandukanye nk’uko biri ku rutonde mu gice giheruka cy’Abefeso (reba Ef. 6:12).

Pawulo yavuze ko uwo mwami w’umwijima ari “umwuka ukorera mu batumvira.” Iri jambo, “abatumvira,” ni ubundi buryo bwo kuvuga abatizera, bishimangira ko kamere yabo ari iy’icyaha. Nyuma Pawulo yaje kuvuga ko “ku bwa kavukire ari abo kugirirwa umujinya” (Ef. 2:3). Ikindi kandi, yavuze ko Satani abakoreramo.

Satani ni we Se

(The Devil for a Dad)

Abantu badakijijwe babimenya cyangwa batabimenya, bakurikiye Satani kandi ni abagaragu be mu bwami bw’umwijima. Bafite kamere ye mbi yo kwikunda gusa iba mu myuka yabo yapfuye. Mu byukuri Satani ni we mwami wabo wo mu mwuka kandi ni we se. Ni cyo gituma Yesu yigeze kubwira abayobozi bamwe b’abanyedini ati: “Mukomoka kuri so Satani, kandi ibyo so ararikira ni byo namwe mushaka gukora” (Yoh. 8:44).

Iyo ni ishusho nyayo y’umuntu utaravutse ubwa kabiri! Aragenda asa nk’uriho ariko yarapfuye mu mwuka, yuzuye kamere ya Satani, agenda asanga byanze bikunze urupfu rw’umubiri atinya cyane; kandi yabimenya atabimenya, umunsi umwe azahura n’urupfu rubi kurusha izindi mfu zose, urupfu rw’iteka, ubwo azatabwa muri ya nyanja yaka umuriro n’amazuku.

Ni ngombwa cyane ko dusobanukirwa ko ari urupfu rw’umwuka, ari urw’umubiri n’urupfu rw’iteka byose ari ibigaragaza umujinya w’Imana ku bantu bakiranirwa kandi bikagaragaza ko Satani abifitemo uruhare. Imana yaretse Satani ngo ategeke ubwami bw’umwijima n’ “abakunda umwijima” bose (Yoh 3:19). Ni nk’aho Imana yabwiye Satani iti, “Wemerewe gukoresha imbaraga zawe ukagira imbohe abanga kungandukira.” Satani yabaye igikoresho cy’Imana mu gusohoza umujinya w’Imana ku bana b’abantu bayigometseho. Kuko bose bakoze ibyaha, bose bari mu butware bwa Satani, buzuye kamere ye mu mitima yabo kandi ni imbohe ze akoresha ibyo ashaka (reba 2 Tim. 2:26).

Incungu y’Ubucakara Bwacu

(The Ransom for Our Captivity)

Ariko dushobora gushimira Imana ko yagiriye abana b’abantu imbabazi, kandi ku bw’izo mbabazi, nta muntu n’umwe ukwiriye kuguma muri iyo mibereho iteye agahinda. Bitewe n’uko gupfa kwa Yesu yitangaho incungu byasohoje gukiranuka kw’Imana, abizera Kristo bose bashobora kurokoka urupfu rw’umwuka n’ingoyi ya Satani kuko baba batakiriho umujinya w’Imana. Iyo twizeye Umwami Yesu, Umwuka Wera aza mu mwuka wacu agakuramo kamere ya Satani, agatuma umwuka wacu uvuka ubwa kabiri (reba Yoh. 3:1-16) agatuma kandi dushobora gufatanya na kamere y’Imana (reba 2 Pet. 1:4).

Noneho tugaruke ku kibazo cyacu cya mbere. Igihe umwanditsi w’igitabo cy’Abaheburayo yavugaga ko Yesu, mu rupfu rwe, yahinduye “ubusa uwari ufite ubutware bw’urupfu, ni ukuvuga Satani,” yashakaga kuvuga ko ubutware bw’urupfu rw’umwuka, Satani afite ku bantu bose badakijijwe, bwarimbuwe ku bari “muri Kristo” bose. Twahinduwe bazima kubera Kristo wahanwe igihano cy’ibyaha byacu.

Byongeye kandi, kuko tutagipfuye mu mwuka tukaba tutakiri no mu bubata bwa Satani, ntitugifite gutinya urupfu rw’umubiri, kuko tuzi ibidutegereje–umurage w’ubwiza w’iteka ryose.

Icya nyuma, kubera Yesu, twakijijwe kuzababazwa mu rupfu rwa kabiri, dutabwa mu nyanja y’umuriro.

Mbese Yesu yatsinze Satani ku musaraba? Oya, ntiyamutsinze ku musaraba, kuko nta ntambara yabaye hagati ya Yesu na Satani. Ariko, Yesu yahinduye Satani ubusa ku byerekeye ubutware bwa Satani bw’urupfu rw’umwuka, ubwo akoresha abohera mu byaha abantu badakijijwe, ariko abakijijwe, Satani nta mbaraga abafiteho.

Kunyaga ubutware n’ubushobozi

(The Disarming of the Powers)

Ibi bidufasha kandi gusobanukirwa amagambo ya Pawulo avuga “kunyaga abatware n’abafite ubushobozi” ari mu Abakolosayi 2:13-15:

Kandi ubwo mwari mupfuye [mu mwuka] muzize ibicumuro byanyu…yabahinduranye bazima na we imaze kutubabarira ibicumuro byacu byose, igahanagura urwandiko rw’imihango rwaturegaga, ikarudukuzaho kurubamba ku musaraba. Kandi imaze kunyaga abatware n’abafite ubushobozi, ibahemura ku mugaragaro, ibīvuga hejuru ku bw’umusaraba.

Muri aya magambo Pawulo yakoresheje imvugo ngereranyo. Mu gice cya mbere cy’aya magambo agereranya ibyaha byacu “n’urwandiko rwemeza umwenda dufite.” Ibyo tutashoboraga kwishyura, Kristo yarabyishyuye, ajyana umwenda wacu w’ibyaha ku musaraba.

Mu gice cya kabiri, nk’uko abami ba kera banyagaga intwaro abanzi babo bamaze kubanesha bakabīvuga hejuru babazengurutsa mu mihanda y’imijyi yabo, ni ko urupfu rwa Yesu rwabaye kwivuga hejuru y’ “abatware n’abafite ubushobozi,” ni ukuvuga inzego zo hasi z’abadayimoni batwara abantu batumvira bakabagumana mu bubāta.

Mbese ntitwavuga ko Kristo yatsinze Satani, dushingiye kuri aya magambo? Wenda, ariko tukongeraho ibisobanuro. Tugomba kutibagirwa ko muri aya magambo, Pawulo yakoreshaga imvugo ngereranyo. Kandi iteka mu mvugo ngereranyo, hari aho bigera ibyasaga ntibibe bigisa, nk’uko twabibonye mu gice cy’iki gitabo kivuga uko Bibiliya isobanurwa.

Tugomba kwitonda mu gusobanura imvugo ngereranyo ya Pawulo mu rwandiko rw’Abakolosayi 2:13-15. Biragaragara ko, atari “urwandiko rw’umwenda” koko rwari rwanditseho ibyaha byacu byose rwabambwe ku musaraba. Ariko ni ikigereranyo cy’ibyo Yesu yakoze.

Ni kimwe rero, abadayimoni batwaraga abantu badakijijwe ntabwo mu byukuri Yesu yabambuye inkota zabo n’ingabo zabo ngo maze abivuge hejuru ku karubanda abazengurutsa mu mihanda. Imvugo Pawulo akoresha hano ni imvugo ngereranyo y’ibyo Yesu yakoze ku bwacu. Twari twarabaswe n’iyo myuka mibi. Ariko Yesu mu gupfira ibyaha byacu, Yesu yatubohoye muri ubwo bubata. Ntabwo Yesu mu byukuri yarwanye n’abo badayimoni kandi ntibamurwanyaga. Ahubwo ku bwo guhabwa uruhushya n’Imana mu gukiranuka kwayo, bashyize ubugingo bwacu munsi y’ubutware bwabo. “Imbunda” zabo ntabwo zari zitunze kuri Kristo, nit we zari zitunzeho. Ariko Yesu “yabanyaze intwaro” zabo. Nta bushobozi bagifite bwo kongera kutubāta.

Tureke kwibwira ko hari intambara y’igihe kirekire yabayeho hagati ya Yesu n’imyuka mibi ya Satani, hanyuma amaherezo Yesu akaza gutsinda urugamba ku musaraba. Igihe tuvuze ko Yesu yanesheje Satani, tujye dusobanukirwa neza ko yamudutsindiye, atamwitsindiye kuko we atamurwanyaga.

Nigeze kwirukana akabwana k’imbwa mu rugo rwanjye kuko kateraga ubwoba umwana wanjye w’umukobwa. Nshobora kuvuga ko namutsindiye ako kabwana, ariko ndizera ko wumva ko jyewe ako kabwa nta bwoba kari kanteye, uwo kari gateye ubwoba ni umukobwa wanjye gusa. Ni ko byagenze no kuri Yesu na Satani. Yesu yatwirukanyeho imbwa itarigize icyo imutwaye na gato.

Mbese iyo mbwa ari yo Satani yayirukanye ate? Yayirukanye yishyiraho igihano cy’ibyaha byacu, bityo adukuraho urubanza rwadutsindaga imbere y’Imana, adukiza umujinya w’Imana, nuko rero imyuka mibi Imana yemerera ikabata abantu batumvira ntiyarigifite uburenganzira bwo kutugira imbata. Imana ishimwe ku bw’ibyo!

Ibyo biratuma biba ngombwa kureba ikindi gitekerezo cya kabiri abantu bibwira gifitanye isano n’icyo tumaze kubona.

Twamaze kubona mu gitabo cy’Ibyahishuwe ko hari igihe hazaba intambara mu ijuru hagati ya Mikayeli ari kumwe n’abamarayika be na Satani ari kumwe n’abamarayika be. Uretse iyo ntambara, hari indi ntambara imwe gusa y’abamarayika, tuyisanga mu gice cya cumi cy’igitabo cya Daniyeli.

Daniyeli atubwira ko yamaze ibyumweru bitatu arira mu mwaka wa gatatu w’ingoma ya Kūro, umwami w’i Buperesi, ubwo marayika yamubonekeraga ari ku ruzi rwa Hidekelu. Intego yo kumusura kwa marayika kwari ukugira ngo amumenyesha iby’ibihe bizaza ku ishyanga rya Isirayeli, kandi twamaze kubona mu ncamake ibyo Daniyeli yabwiwe mu gice cyabanje kivuga ku byo Kuzamurwa kw’Itorero n’ibihe by’imperuka. Mu kiganiro bagiranye, uwo marayika utaravuzwe izina yabwiye Daniyeli ati:

Witinya Daniyeli, kuko uhereye ku munsi watangiriyeho gushishikarira gusobanukirwa no kwicisha bugufi imbere y’Imana yawe, amagambo yawe yarumviswe kandi ni yo anzanye. Ariko umutware w’ubwami bw’u Buperesi amara iminsi makumyabiri n’umwe ambuza.Nyuma Mikayeli, umwe wo mu batware bakomeye aza kuntabara, ntinda mu bami b’u Buperesi (Dan. 10:12-13).

Daniyeli yamenye ko gusenga kwe hari hashize ibyumweru bitatu kumviswe mbere y’uko abonana na marayika, ariko byatwaye ibyumweru bitatu kugira ngo marayika amugereho. Impamvu yo gutinda kumugeraho kwa marayika ni uko “umutware w’ubwami bw’u Buperesi” yari yamutangiriye. Ariko hanyuma yaje gushobora gutambuka, ubwo Mikayeli, “umwe mu batware bakomeye,” yagiye kumutabara.

Igihe marayika yari agiye gutandukana na Daniyeli, yaramubwiye ati,

Dore ubu ngiye gusubirayo kurwana n’umutware w’u Buperesi, nimara kugenda umwami w’u Bugiriki araherako aze. Ariko ndagusobanurira ibyanditswe mu byanditswe by’ukuri, kandi abo nta wundi dufatanije kubarwanya keretse Mikayeli, umutware wanyu (Dan. 10:20-21).

Hari ibintu bikomeye byinshi dushobora kwigira muri iki gice cya Bibiliya. Na none turabona ko abamarayika b’Imana badashobora byose, kandi ko koko bashobora kurwana n’abamarayika babi.

Icya kabiri, tubona ko abamarayika bamwe (nka Mikayeli) barusha abandi (nk’uwo wavuganaga na Daniyeli) imbaraga.

Ibibazo Tudafitiye Ibisubizo

(Questions for Which We Have No Answers)

Dushobora kubaza tuti “Mbese ubundi kuki mbere hose Imana itatumye Mikayeli aho kugira ngo habe gukererwa ibyumweru bitatu byose?” Ikiriho ni uko Bibiliya itatubwira impamvu Imana yohereje umumarayika tudashidikanya ko yari izi ko adashobora guca ku “mutware w’u Buperesi” adafashijwe na Mikayeki. Mu byukuri ntituzi impamvu Imana ikoresha umumarayika uwo ari we wese kugira ngo ihe umuntu ubutumwa ishaka kumugezaho! Kuki itigendeye ubwayo mbese, cyangwa ngo yibwirire Daniyeli n’ijwi ryumvikana, cyangwa ngo ijyane Daniyeli mu ijuru igihe gito maze imubwire ibyo byose? Ntitubizi gusa.

Ariko se iki gice cyerekana ko hari intambara zihoraho hagati y’abamarayika b’Imana n’aba Satani? Oya, icyo byerekana gusa ni uko, mu myaka ibihumbi ishize, habaye intambara y’ibyumweru bitatu hagati y’umwe mu bamarayika b’Imana bafite imbaraga nke n’umwe mu bamarayika ba Satani witwa “umutware w’u Buperesi,” intambara tubona ko, iyo Imana ishaka, iba itarabayeho. Indi ntambara imwe yonyine tubona muri Bibiliya yose ni intambara izaba mu ijuru mu bihe bizaza, iri mu gitabo cy’Ibyahishuwe. Ni ibyo. Hashobora kuba wenda harabayeho izindi ntambara z’abamarayika, ariko kubyemeza kwaba ari ugukeka gusa.

Igitekerezo Gishingiye Ku Gitekerezo

(A Myth Based Upon a Myth)

Mbese iyi nkuru ya Daniyeli n’umutware w’u Buperesi irerekana ko uburyo turwana intambara y’umwuka ari bwo butuma uruhande rumwe rw’abamarayika runesha cyangwa rukaneshwa? Na none iki gitekerezo kirashaka kuvuga ko (gishingiye ku byanditswe bimwe) hari intambara z’urudaca mu bamarayika. Ariko reka duhumirize tuvuge koko, ko ari byo, hari intambara z’urudaca hagati y’abamarayika b’impande zombi. Iyi nkuru ya Daniyeli se, irerekana ko imirwanire yacu yo mu mwuka ari yo igena uko urugamba hagati y’abamarayika rurangira?

Hari ikibazo abashyigikiye icyo gitekerezo bakunda kubaza ngo, “Mbese byari kugenda bite iyo Daniyeli atezūka akareka gusenga nyuma y’umunsi umwe gusa?” Birumvikana igisubizo kuri icyo kibazo, ni uko mu byukuri ntawuzi uko byari kugenda, kuko ikigaragara ni uko Daniyeli atarekeye aho gusenga kugeza wa mumarayika utazwi izina amugezeho. Ariko icyo kubaza icyo kibazo bishatse kuvuga, ni ugushaka kutwemeza ko, uko gukomeza kurwana intambara y’umwuka kwa Daniyeli, ari rwo rwa baye urufunguzo rwo kugira ngo wa mumarayika utazwi izina ashobore kunesha mu kirere. Ngo iyo Daniyeli ataza gukomeza kurwana mu mwuka asenga, ngo uwo marayika ntaba yarapfuye ashoboye guca ku mutware w’u Buperesi. Bagashaka kutwumvisha ko natwe, nk’uko Daniyeli yagenje, tugomba gukomeza kurwana urugamba rw’umwuka, ko naho ubundi niba atari ibyo, marayika runaka wa Satani ashobora kunesha abamarayika b’Imana akabivuga hejuru.

Icya mbere, reka mbanze mvuge ko Daniyeli nta “ntambara y’umwuka yari arimo”–yasengaga Imana. Ntaho tumubona avuga ikintu na kimwe cyerekeranye n’abadayimoni, cyangwa aho abahambira, cyangwa “abarwanya.”. Mu byukuri Daniyeli, nta n’igitekerezo yari afite cy’intambara yari iri hagati y’abamarayika kugeza ubwo bya byumweru bitatu byashiriye hanyuma wa mu marayika utaravuzwe izina akamubonekera. Yamaze ibyo byumweru bitatu yiyiriza ubusa ashaka mu maso y’Imana.

Reka rero tubaze cya kibazo mu bundi buryo: Iyo Daniyeli areka gusenga no gushaka Imana nyuma y’umunsi umwe cyangwa ibiri, ntabwo wa mumarayika aba yarashoboye kumugezaho ubutumwa bw’Imana? Ntabwo tubizi. Ndashaka kandi kuvuga ko wa mumarayika atigeze abwira Daniyeli ati, “Wagize neza kudacogora gusenga, simba narashoboye kubyikuramo.” Oya, marayika yashimye Mikayeli ko ari we wamutabaye agashobora gusohoza ubutumwa. Biragaragara neza ko Imana ari yo yohereje uwo mumarayika na Mikayeli, kandi yabohereje isubiza gusenga kwa Daniyeli asaba gusobanukirwa uko bizamera muri Isirayeli mu bihe bizaza.

Byaba ari uguhimba gusa umuntu atekereje ko iyo Daniyeli aza guhagarika kwiyiriza ubusa cyangwa gushaka Imana, Imana iba yaravuze iti, “O.K. mwa bamarayika mwe uko muri babiri, Daniyeli yahagaritse kwiyiriza ubusa no gusenga, none rero nubwo nari nohereje umwe muri mwe ngo amushyire ubutumwa kuva ku munsi wa mbere atangiye gusenga, mwibagirwe ibyo kuba mukijyaniye ubutumwa Daniyeli. Ndabona nta gice cya cumi na rimwe cyangwa icya cumi na kabiri bizigera bibaho mu gitabo cya Daniyeli.”

Daniyeli ikigaragara ni uko yakomeje gushishikarira gusenga (si “ukurwana urugamba rw’umwuka”), hanyuma Imana ikamusubiza yohereza abamarayika. Natwe tugomba gushishikara mu gusenga Imana, kandi Imana ari ko ibishatse, igisubizo cyacu cyazanwa na marayika. Ariko ntiwibagirwe ko hari abantu benshi muri Bibiliya tubona bazaniwe ubutumwa bukomeye na marayika, kandi ntaho tubona basenze n’isengesho na rimwe, uretse no gusenga ibyumweru bitatu.[2] Tugomba guhagarara neza tugashyira mu gaciro. Byongeye kandi hari ingero nyinshi muri Bibiliya z’aho abamarayika bazaniye abantu ubutumwa bakabubagezaho batagombye kurwana n’abamarayika ba Satani babategeye mu nzira bava mu ijuru. Birashoboka ko wenda abo bamarayika byagiye biba ngombwa ko babanza kurwana n’abadayimoni mu nzira mbere y’uko bashobora gusohoza ubutumwa, ariko niba byarabayeho, ntacyo tubiziho, kuko Bibiliya ntacyo ibitubwiraho.

Bityo rero turakomereza ku cya gatatu abantu bakunze kwizera kidafite ishingiro.

Igitekerezo #3: “Igihe Adamu Yacumuraga, Satani Yafashe Ubutware bwa Adamu Bwo Gutegeka Isi.”

Ariko se koko byagenze bite kuri Satani igihe abana b’abantu bacumuraga? Abantu bamwe bibwira ko Satani yazamutse mu ntera cyane igihe Adamu yakoraga icyaha. Baravuga ngo Adamu ubundi mbere yari “imana y’iyi si,” ngo ariko Adamu amaze kugwa Satani yafashe iyo ntebe, bityo bimuha uburenganzira bwo gukora ibyo ashatse byose ku isi. Ngo n’Imana ntiyabaye igishoboye kuba yamubuza kuva icyo gihe, ngo kuko Adamu yari afite “uburenganzira busesuye” bwo guha ubutware bwe Satani, kandi Imana yagombaga kubahiriza amasezerano yagiranye na Adamu, kandi ayo masezerano yari abaye aya Satani. Ngo ubu rero Satani ni we ufite “ubutware bwa Adamu,” ngo kandi Imana ntishobora kubyambura Satani “igihe cy’ubutware Adamu yahawe kitarashira.”

Mbese iyo mitekerereze ni yo? Satani yahawe “ubutware bwa Adamu” igihe yakoraga icyaha?

Oya na mba. Igihe abana b’abantu bakoraga icyaha ntacyo Satani yungutse uretse kuvumwa n’Imana no gusezeranirwa ko azarimbuka burundu.

Bibiliya ntaho ivuga na rimwe ko Adamu mbere na mbere yari “imana y’iyi si.” Icya kabiri, Bibiliya nta na rimwe ivuga ko Adamu yari afite uburenganzira busesuye bwo guha uwo ari we wese ubwo butware bavuga yari afite bwo gutegeka isi. Icya gatatu, nta na rimwe Bibiliya ivuga ko Adamu yari afite ubutware bufite igihe buzarangirira. Ibi bitekerezo byose ntabwo bishingiye kuri Bibiliya.

Ni ubuhe butware ubundi Adamu yari afite mbere na mbere? Dusoma mu gitabo cy’Itangiriro ko Imana yabwiye Adamu na Eva iti “Mwororoke mugwire, mwuzure isi, mwimenyereze ibiyirimo, mutware amafi yo mu nyanja, n’inyoni n’ibisiga byo mu kirere, n’ibintu byose bifite ubugingo byigenza ku isi” (Itang 1:28).

Nta kintu na kimwe Imana yavuze cy’uko Adamu ari “imana” ku isi, cyangwa cy’uko azategeka ibintu byose, nko kugenga iby’imvura n’umucyo n’imiyaga n’ibindi, cyangwa ko azategeka abantu bazavuka bose bo mu bihe bizakurikira, n’ibindi. Yahaye gusa Adamu na Eva, nk’abantu ba mbere, gutwara amafi, inyoni n’inyamaswa kandi ibategeka kuzura isi no kuyigarurira.

Igihe Imana yaciraga iteka kuri Adamu, ntacyo yigeze ivuga cy’uko yambuwe ubutware bwe bwo kuba “imana y’iyi si.” Ikindi kandi , nta cyo yabwiye Adamu na Eva cy’uko bambuwe ubutware ku mafi yo mu nyanja, inyoni n’ibisiga n’inyamaswa. Mu byukuri, ndibwira ko ari ibintu bigaragara kokugeza ubu abantu bagifite ubutware ku mafi n’ibisiga n’ “ibintu byose bifite ubugingo byigenza hasi.” Abantu baracyagwira bakuzura isi kandi bakayigarurira. Ntacyo Adamu yatakaje ku butware bwe yahawe n’Imana mbere na mbere.

Mbese Satani si “Imana y’iyi Si”?

(Isn’t Satan “God of This World”?)

Ariko se Pawulo ntiyise Satani “imana y’iyi si,” Yesu na we akamwita “umutware w’iyi si”? Yego ni ko bamwise koko, ariko nta n’umwe muri bo wavuze ko Adamu yari “imana y’iyi si” cyangwa ko Satani yavanye ubwo butware kuri Adamu amaze kugwa.

Kandi, Satani kwitwa “imana y’iyi si” ntibishatse kuvuga ko ashobora gukora icyo ashatse cyose mu isi cyangwa ko Imana nta bubasha ifite bwo kumubuza. Yesu yaravuze ati, “Nahawe ubutware bwose mu ijuru no mu isi” (Mat. 28:18). Niba rero Yesu afite ubutware bwose mu isi, Satani ashobora kugira icyo akora ari uko gusa amuhaye uruhushya.

Ni nde wahaye Yesu ubutware bwose mu ijuru no mu isi? Igomba kuba ari Imana Data yabumuhaye, ari yo yari ibufite kugira ngo ibuhe Yesu. Ni yo mpamvu Yesu avuga kuri Se yamwise “Umwami w’ijuru n’isi” (Mat 11:25; Luka 10:21).

Imana ifite ubutware bwose mu isi kuva yayirema. Ku ntangiriro yahaye abantu agace gato k’ubutware, kandi ntabwo abantu bigeze na rimwe batakaza ubwo yabahaye mbere na mbere.

Iyo Bibiliya ivuze ko Satani ari imana cyangwa umutware w’iyi si, iba ishaka kuvuga gusa ko abantu b’isi (batavutse ubwa kabiri) bayobotse Satani. Ni we bakorera, babimenya cyangwa batabimenya. Ni we mana yabo.

Ubutunzi Satani atanga?

(Satan’s Real-Estate Offer?)

Ahanini iyo myizerere y’ubutware Satani yagezeho bushingira ku nkuru y’uburyo Yesu yageragejwe na Satani mu butayu, yanditse muri Matayo no muri Luka. Reka turebe uko Luka abivuga kugira ngo turebe icyo dukuramo:

Umwanzi [Satani] aramuzamura [Yesu] amwereka ubwami bwose bwo mu isi mu kanya gato, aramubwira ati, “Ndaguha ubu butware bwose n’ikuzo ryabwo, kuko ari jye wabugabanye kandi mbugabira uwo nshaka wese. Nuko numpfukamira ukandamya, buriya bwose buraba ubwawe.” Yesu aramusubiza ati, “Handitswe ngo, ‘Uramye Uwiteka Imana yawe, abe ari yo ukorera yonyine'” (Luka 4:5-8).

Mbese ibi bivuga ko Satani agenga ibyo mu isi byose, cyangwa ko Adamu yabimweguriye, cyangwa ko Imana nta bushobozi ifite bwo kubuza Satani ibyo ashatse gukora? Oya, kandi bitewe n’impamvu zitandukanye.

Icya mbere, tugomba kwitonda mu gushingira imyizerere yacu ku magambo yavuzwe n’uwo Yesu yise “se w’ibinyoma” (Yohana 8:44). Rimwe na rimwe Satani avuga ukuri, ariko hariya, dukwiye kwitonda cyane, kuko ibyo Satani yavuze bisa nk’aho bivuguruza ibyo Imana yavuze.

Mu gice cya kane cy’igitabo cya Daniyeli, tuhabona inkuru y’ukuntu Umwami Nebukadinezari yacishijwe bugufi. Nebukadinezari, yuzuye ubwibone bw’icyubahiro cye n’imirimo yakoze ikomeye, yabwiwe n’umuhanuzi Daniyeli ko agiye guhabwa ubwenge nk’ubw’inyamaswa kugeza aho azamenyera ko “Isumbabyose ari yo itegeka ubwami bw’abantu, kandi ko ibwimikamo uwo ishaka” (Dan. 4:25). Ibi bisubirwamo incuro enye zose muri iyi nkuru imwe, mu gushimangira uburemere bwabyo (reba Dan. 4:17, 25, 32; 5:21).

Urabona ko Daniyeli yavuze ati, “Isumbabyose ni yo itegeka ubwami bw’abantu.” Ibyo birerekana ko Imana hari ubutegetsi ifite mu isi, si byo se?

Urabona ko aya magambo ya Daniyeli avuguruza mu buryo butaziguye ibyo Satani yabwiye Yesu. Daniyeli yavuze ko Imana “ibwimikamo uwo ishaka,” Satani na we ati, “Mbugabira uwo nshatse wese” (Luka 4:6).

None urizera nde? Jye nzizera ibya Daniyeli.

Ariko, birashoboka ko Satani yavugaga ukuri–tubirebye mu bundi buryo.

Satani ni “imana y’iyi si,” kandi ibyo bivuga, nk’uko namaze kubivuga, ko ategeka ubwami bw’umwijima, bugizwe n’abantu bose bo mu bihugu byose batubaha Imana. Bibiliya iravuga ngo “ab’isi bose bari mu Mubi” (1 Yohana 5:19). Igihe Satani yavugaga ko ashobora guha uwo ashatse wese gutwara ubwami bwose bwo mu isi, ashobora kuba yaravugaga iwe gusa, ubwami bw’umwijima, bugizwe n’ubwami buto buto bwinshi butandukanye muri buri gihugu nk’uko tubibona mu isi. Ibyanditswe bitubwira ko Satani afite ibyiciro byinshi by’imyuka mibi akoresha mu gutwara ubwami bwe (reba Ef. 6:12), kandi dushobora kuvuga ko ari we uzamura cyangwa akamanura mu ntera iyo myuka y’abadayimoni mu byiciro bye, kuko ari we mutware. Muri ubwo buryo, Satani yabwiraga Yesu ko yamuha kuba uwa kabiri kuri we–akamwungiriza–akamufasha gutegeka ubwami bwe bw’umwijima. Icyo Yesu yagombaga gukora gusa kwari ugupfukamira Satani akamuramya. Ariko ibyo Yesu ntiyabyitayeho.

Ni nde Wahaye Satani Ubutware?

Hnyuma se twavuga iki kuri ibyo bya Satani byo kuvuga ko “yahawe” ubutware kuri ubwo bwami bwose?

Na none, igishoboka cyane ni uko Satani yabeshyaga. Ariko wenda reka tuvuge ko yavugaga ukuri.

Urabona ko Satani atavuze ngo ni Adamu wabumuhaye. Nk’uko twamaze kubibona, Adamu ntabwo yashoboraga kubuha Satani kuko ntabwo Adamu yigeze abugira ngo abe yabutanga. Adamu yategekaga, amafi, ibisiga, n’inyamaswa, ntabwo ari ubwami bw’ibihugu. (Mu byukuri nta bwami bw’amahanga bwari burakabaho igihe Adamu yacumuraga.) Ikindi kandi, niba Satani ubwami yavugaga yaha Yesu ari ubwami bw’umwijima, bugizwe n’abadayimoni bose n’abantu badakijijwe, nuko rero nta buryo na bumwe twavuga ko Adamu yaba yarahaye Satani ubwo butware. Satani yategekaga abamarayika bacumuye mbere y’uko Adamu aremwa.

Satani ashobora kuba yarashakaga kuvuga ko abantu bose bo mu isi bamuhaye ubutware bwo kubatwara, kuko mu gihe batagandukira Imana, babimenya batabimenya, baba bamugandukira.

Ikindi gishoboka cyane ndetse no kurushaho ni uko Imana yaba ari yo yabumuhaye. Birashoboka cyane, dukurikije icyo Ibyanditswe, ko Imana yabwiye Satani iti, “Wowe n’abadayimoni bawe mbahaye uruhushya rwo gutegeka umuntu wese udashaka kungandukira.” Ubu muri aka kanya byakugora kubyakira, ariko nyuma uraza kubona ko ari cyo gishobora kuba igisobanuro kiruta ibindi byose kuri ibyo bya Satani byo kuvuga ko yahawe ubutware. Niba Imana ari yo “itegeka ubwami bw’abantu”(Dan. 4:25), ni ukuvuga ko ubutware ubwo ari bwo bwose Satani yagira ku bantu bugomba kuba butanzwe n’Imana.

Satani atwara ubwami bw’umwijima gusa; bushobora kandi no kwitwa “ubwami bwigometse.” Yatangiye gutegeka ubwo bwami kuva igihe yirukanwaga mu ijuru, kandi ibyo byabaye mbere y’uko Adamu acumura. Ubwami bw’umwijima bwari bugizwe n’abamarayika bigometse gusa, kugeza ubwo Adamu yacumuye akagwa. Kuva Adamu amaze gukora icyaha, yagiye mu bwami bwigometse; nuko uhereye ubwo, ubwami bwa Satani ntibukigizwe n’abamarayika bigometse gusa ahubwo n’abantu bigometse barimo.

Satani yategekaga ubwami bw’umwijima kuva mbere hose Adamu ataranaremwa, nuko rero reka tureke kwibwira ko igihe Adamu yacumuraga, hari icyo Satani yafashe cyari gifitwe na Adamu mbere. Oya, ubwo Adamu yakoraga icyaha, yinjiye mu bwami bwigometse ariko bwari bumaze igihe buriho, ubwami butegekwa na Satani.

Mbese Imana Yatunguwe No Kugwa Kwa Adamu?

Andi makosa agaragara muri iyo “mitekerereze ivuga ko Satani yungutse” ni uko bituma Imana igaragara nk’aho nta bwenge ifite, nk’aho yaba yaratunguwe n’uko kugwa kwa Adamu maze ikisanga mu bihe bibabaje itateganyaga. Mbese Imana ntiyari izi ko Satani azagerageza Adamu na Eva kandi ko bizakurikirwa no kugwa k’umuntu? Niba Imana izi byose, kandi ni byo koko imenya byose, yari izi rwose ibizaba. Ni yo mpamvu Bibiliya itubwira ko na mbere y’uko irema abantu yari yarashyizeho umugambi wo kuzabacungura (reba Mat. 25:34; Ibyak 2:2-23; 4:27-28; 1 Kor. 2:7-8; Ef. 3:8-11; 2 Tim. 1:8-10; Ibyah. 13:8).

Imana yaremye Satani izi ko azacumura, kandi na Adamu na Eva yabaremye izi ko bazacumura. Nta buryo na mba buhari bwo kugira ngo Satani ariganye Imana ajyane ibyo Imana idashaka ko agira.

Mbese icyo mvuga ni uko Imana ishaka ko Satani aba “imana y’iyi si?” Yego, bipfa kuba bihuje n’intego zayo nk’Imana. Iyo Imana idashaka ko Satani akora, iba yaramushyize mu ibohero , nk’uko tubwirwa mu gitabo cy’Ibyahishuwe 20:1-2 ko ari ko izamugira umunsi umwe.

Nyamara simvuga ko Imana ishaka ko hari umuntu n’umwe waguma munsi y’ubutware bwa Satani. Imana ishaka ko abantu bose bakizwa bakava mu bwami bwa Satani (Ibyak 26:18; Kolo 1:13; 1 Tim. 2:3-4; 2 Pet. 3:9). Ariko Imana ireka Satani agategeka umuntu wese ukunda umwijima (reba Yohana 3:19)–abakomeza kuyigomekaho bose.

Ariko se hari icyo twakora ngo dufashe abantu kuva mu butware bwa Satani? Yego, dushobora kubasengera kandi tukabahamagarira kwihana bakizera ubutumwa bwiza (nk’uko Yesu yabidutegetse). Nibemera, bazabaturwa mu butware bwa Satani. Ariko kwibwira ko dushobora “gukubita hasi” imyuka mibi igundiriye abo bantu ni ukwibeshya. Iyo abantu bashatse kwigumira mu mwijima, Imana irabareka. Yesu yabwiye abigishwa be ko umudugudu bazageramo ntiwakire ubutumwa bwabo bazawukunkumuriramo umukungugu wo mu birenge byabo bakahava bakajya mu wundi mudugudu (Mat 10:14). Ntabwo yababwiye kuhaguma ngo babanze bakubite ibihome by’abadayimoni hasi muri uwo mudugudu hanyuma abantu bashobore kwakira cyane ubutumwa bwiza. Imana yemerera imyuka mibi guheza mu ngoyi abantu banga kwihana no guhindukirira Kristo.

Ikindi Cyerekana Ubutware Bukomeye Imana Ifite kuri Satani

Hari ibindi byanditswe byinshi byerekana ko Imana itigeze itakaza ubutware kuri Satani igihe Adamu yacumuraga. Bibiliya ishimangira kenshi ko Imana yahoranye kandi izahorana ubutware busesuye kuri Satani. Satani ashobora gukora gusa ibyo Imana yemeye ko akora. Reka tubanze turebe ibibyerekana neza mu Isezerano rya Kera.

Ibice bibiri bibanza mu gitabo cya Yobu birimo urugero rwiza rwerekana ubutware Imana ifite kuri Satani. Aho tuhabona Satani ari imbere y’intebe y’Imana, ashinja Yobu. Muri icyo gihe, Yobu ni we muntu wubahaga Imana kurusha abandi bantu bose bari batuye isi, birumvikana rero ko Satani yagombaga kumwibasira. Imana yari izi ko Satani “yibasiye” Yobu (Yobu 1:8, reba ibisobanuro ku ruhande muri Bibiliya yitwa NASB), kandi yateze Satani amatwi ashinja Yobu ko ayikorera kubera imigisha yose yamuhaye (reba Yobu 1:9-12).

Satani yavuze ko Imana yazitiriye Yobu ikamurinda impande zose hanyuma asaba ko Imana ikuraho imigisha yahaye Yobu. Hanyuma Imana yemereye Satani kubabaza Yobu kugeza ku gipimo runaka atagomba kurenga. Ubwa mbere Satani ntiyari yemerewe gukora ku mubiri wa Yobu. Ariko nyuma Imana yaje kwemerera Satani ngo akore ku mubiri wa Yobu, ariko imubuza kumwica (Yobu 2:5-6).

Iki gice cy’Ibyanditswe cyonyine kiragaragaza neza Satani adashobora gukora icyo ashatse cyose. Ntiyashoboraga gukora ku mitungo ya Yobu Imana itarabimwemerera. Ntiyashoboye gukora ku magara ya Yobu kugeza ubwo Imana yabimwemereye. Kandi ntiyashoboye kwica Yobu kuko Imana yabimubujije.[3] Imana ifite ubutware kuri Satani, ndetse n’aho Adamu akoreye icyaha.

Umwuka Mubi Wateraga Sawuli ” Uvuye Ku Uwiteka”

Mu Isezerano rya Kera hari ingero nyinshi z’aho Imana yakoreshaga imyuka mibi nk’ibikoresho byo gusohoza uburakari bwayo. Dusoma muri 1 Samweli 16:14 ngo: “Icyo gihe Umwuka w’Uwiteka yari yavuye kuri Sawuli, kandi umwuka mubi uvuye ku Uwiteka yajyaga amuhagarika umutima.” Ibi biragaragara cyane ko byabaye kubera ko Imana yashakaga guhana Umwami Sawuli utarukiyigandukira.

Ikibazo gihari ni ukumenya icyo amagambo “umwuka mubi uvuye ku Uwiteka” ashatse kuvuga. Bishatse se kuvuga ko Imana yajyaga yohereza umwuka mubi ubana na yo mu ijuru, cyangwa biravuga ko Imana mu butware bwayo yarekaga umwuka umwe mu myuka mibi ya Satani ukajya guhagarika Sawuli umutima? Ndibwira ko Abakristo benshi bakwemeranya n’icyo cya kabiri, umuntu ahereye ku bindi Bibiliya yigisha. Impamvu Bibiliya ivuga ko uwo mwuka mubi “wavaga ku Uwiteka” ni uko uwo mwuka wajyaga guhagarika Sawuli umutima cyari igihano Uwiteka yamuhanishaga. Bityo rero tubona ko imyuka mibi iri munsi y’ubutware bw’Imana.

Mu gitabo cy’Abacamanza 9:23 turasoma ngo, “Nuko Imana itegeka umwuka uyobya kujya uteranya Abimeleki n’ab’i Shekemu,” kugira ngo izabahanire gukiranirwa kwabo. Na none rero, uyu mwuka mubi ntabwo wabaga uvuye mu ijuru aho ubuturo bw’Imana buri, ahubwo wabaga uturutse mu bwami bwa Satani, hanyuma Imana ikawemerera gutegura imigambi mibisha ku bantu babikwiye. Imyuka mibi ntishobora gusohoza imigambi yayo mibi ku muntu uwo ari we wese idahawe uruhushya n’Imana. Niba atari ko bimeze, noneho Imana ntiyaba ishobora byose. Bityo rero na none dushobora kongera kwanzura tuvuga ko igihe Adamu yagwaga mu cyaha, Satani atatwaye ubutware ku buryo ndetse Imana itari igishoboye kugira icyo ibikoraho.

Ingero Ziri Mu IsezeranoRishya Z’uburyo Imana Irusha Satani Imbaraga

Isezerano Rishya ritanga ibindi bihamya bisenya iyo myizerere ivuga ko hari ubutware Satani yafashe.

Urugero, dusoma muri Luka 9:1 ko Yesu yahaye abigishwa be “ubushobozi n’ubutware bwo gutegeka abadayimoni.” Kandi muri Luka 10:19, Yesu yarababwiye ati, “Dore mbahaye ubutware bwo kujya mukandagira inzoka na sikorupiyo, n’imbaraga z’umwanzi zose, kandi nta kintu kizagira icyo kibatwara rwose.”

Niba Yesu yarabahaye ubutware ku mbaraga zose za Satani, agomba kubanza akabugira na we ubwe kugira ngo ashobore kubuha abandi. Satani ari munsi y’ubutware bw’Imana.

Nyuma tuza gusoma mu butumwa bwiza bwa Luka Yesu abwira Petero ati, “Simoni, Simoni, dore Satani yabasabye kugira ngo abagosore nk’amasaka” (Luke 22:31). Aya magambo aragaragaza ko Satani atashoboraga kugosora Petero atabanje kubona uruhushya rw’Imana. Na none, Satani ari munsi y’ubutware bw’Imana.[4]

Kubohwa Kwa Satani Imyaka Igihumbi

Iyo dusoma inkuru y’ukuntu umumarayika azaboha Satani mu gitabo cy’

Ibyahishuwe 20, ntaho tubona ubutware bwa Adamu burangira. Impamvu yo kubohwa kwa Satani nta yindi ni “ukugira ngo atongera kuyobya amahanga” (Ibyah 20:3).

Igitangaje, nyuma y’imyaka 1,000 Satani aboshywe, azarekurwa hanyuma “azasohoka ajye kuyobya amahanga yo mu mpfuruka enye z’isi” (Ibyah 20:8). Ayo mahanga yayobejwe azakoranya ingabo atere Yerusalemu, aho Yesu azaba afite icyicaro. Nibamara kugota umurwa, umuriro uzamanuka uvuye mu ijuru “ubatwike” (Ibyah. 20:9).

Mbese hari uwajijwa kugeza ubwo yavuga ko igihe cy’ubutware bwa Adamu cyarimo n’agahe gato ka nyuma y’iyo myaka 1,000, maze bikaba ngombwa ko Imana ibohora Satani? Icyo ni igitekerezo gipfuye.

Oya, ahubwo icyo dukura muri ibi byanditswe na none ni uko Imana ifite ubutware bwuzuye kuri Satani ariko ikamureka ayobye abo ayobya kugira ngo gusa abe igikoresho cyo gusohoza imigambi y’Imana.

Kumara iyo myaka igihumbi y’ubutegetsi bwa Yesu, Satani ntacyo azaba ashobora gukora, nta muntu n’umwe azaba ashobora kuyobya. Ariko hazaba hari abantu mu isi, bazaba bubaha Kristo mu buryo bw’inyuma gusa aharebeshwa amaso y’umubiri, nyamara mu mutima bifuza kubona ingoma ye ihirikwa. Ariko kandi ntibazatinyuka kubigerageza bitewe n’uko bazaba bazi neza ko batashobora guhirika ubutegetsi bw’ “uzaragiza amahanga inkoni y’icyuma” (Ibyah. 19:15).

Ariko Satani narekurwa, azashobora kuyobya abazaba banga Kristo mu mitima yabo, kandi mu bupfapfa bwabo bazagerageza ibidashoboka. Satani niyemererwa kuyobya abacecekanye ubwigomeke mu mitima yabo, ibihishwe mu mitima y’abantu bizajya ahabona, hanyuma Uwiteka azacira iteka abatabereye gutura mu bwami bwe.

Birumvikana iyo ni imwe mu mpamvu Imana ireka Satani akayobya abantu muri iki gihe. Hanyuma turi buze kureba intego z’Imana kuri Satani mu buryo bwuzuye, ariko reka hagati aho tuvuge ko nta muntu n’umwe Imana ishaka ko akomeza kubatirwa mu buriganya bwa Satani. Nyamara ariko ishaka kumenya ibiri mu mitima y’abantu. Satani ntashobora kuyobya abantu bazi kandi bizera ukuri. Ahubwo Imana irareka Satani akayobya abantu b’imitima yinangiye banga kwakira ukuri.

Pawulo avuga ku gihe cya antikristo, yaranditse ati;

Ni bwo wa mugome azahishurwa,uwo Umwami Yesu azicisha umwuka uva mu kanwa ke, akamutsembesha kuboneka k’ukuza kwe. Kuza k’uwo mugome kuri mu buryo bwo gukora kwa Satani, gufite imbaraga zose n’ibimenyetso n’ibitangaza by’ibinyoma, n’ubuhenzi bwose bwo gukiranirwa ku barimbuka, kuko batemeye gukunda ukuri ngo bakizwe. Ni cyo gituma Imana izaboherereza ubushukanyi bukomeye cyane ngo bizere ibinyoma, kugira ngo abatizeye iby’ukuri bose bakishimira gukiranirwa, bacirwe ho iteka (2 Tes. 2:8-12).

Urabona ko Imana ari yo ivugwaho kohereza “ubushukanyi kugira ngo bizere ibinyoma.” Ariko na none urabona ko abo bantu bazayobywa ari abantu “batizeye ukuri,” bishatse kuvuga ko bagize amahirwe yo kumva ubutumwa bwiza ariko ntibabwakira. Imana izareka Satani ahe antikristo ubushobozi bwo gukora ibimenyetso n’ibitangaza kugira ngo abanze Kristo bayobe, kandi intego y’Imana izaba igamije ni ukugira ngo amaherezo “bacirweho iteka.” Ni ku bw’iyo mpamvu kandi n’uyu munsi Imana ireka Satani akayobya abantu.

Iyo Imana itari kuba ifite impamvu yo kureka Satani ngo akore imirimo ye mu isi, iba yaramuciriye ahandi hantu akaboherwayo igihe yigomekaga. Muri 2 Petero 2:4 tubwirwa ko hari abamarayika bakoze ibyaha bamaze kujugunywa “mu mworera w’umwijima ngo barindirwe gucirwa ho iteka.” Iyo bihuza n’imigambi y’Imana yacu ishobora byose iba yarabigenje ityo no kuri Satani no ku bamarayika be. Ariko Imana ifite impamvu zayo zituma yarabaye iretse Satani n’abamarayika be ngo babe bakora mu isi.

Ubwoba Abadayimoni Bafite Bwo Kuzababazwa

Dusoza inyigisho yacu kuri iyi mitekerereze, urundi rugero rwa nyuma ruri mu byanditswe twareba ni inkuru ya ba Bagadareni bari bafite dayimoni:

Amaze [Yesu] gufata hakurya mu gihugu cy’Abagadareni, ahura n’abantu babiri batewe n’abadayimoni bava mu mva, bari abasazi cyane bituma ari nta watinyuka kunyura muri iyo nzira. Barataka cyane bati, “Duhuriye he, Mwana w’Imana? Mbese uje hano kutwica urupfu n’agashinyaguro, igihe cyacu kitaragera?” (Mat 8:28-29).

Iyi nkuru ijya ikunda gukoreshwa cyane n’abashyigikiye imyizerere y’uko Satani hari ubutware yafashe, bakayikoresha bashyigikira icyo gitekerezo. Bakavuga ngo, “Abo badayimoni biyambaje ubutabera bwa Yesu no gushyira mu gaciro kwe. Ngo bari bazi ko nta burenganzira afite bwo kubica urupfu n’agashinyaguro mbere y’uko ubutware Adamu yari yahawe bucyura igihe, ari cyo gihe abadayimoni na Satani bazajugunywa mu nyanja yaka umuriro n’amazuku aho bazababarizwa ijoro n’amanywa iteka ryose.”

Ariko mu byukuri ahubwo barabicuritse. Abadayimoni bari bazi ko Yesu afite ububasha n’uburenganzira bwose bwo kubica urupfu n’agashinyaguro igihe icyo ari cyo cyose yashakira, ari yo mpamvu yatumye bamutakambira ngo abababarire. Biragaragara cyane ko bari bafite ubwoba bw’uko Umwana w’Imana ashobora kubohereza kwicwa urw’agashinyaguro mbere y’igihe. Luka atubwira ko bamwinginze ngo “atabategeka kujya ikuzimu” (Luka 8:31). Iyo Yesu ataza kugira uburenganzira kubera ngo uburenganzira Satani yari afite , ntibaba bararinze guhangayika na gato.

Abo badayimoni bari bazi ko ubugingo bwabo buri mu maboko ya Yesu, nk’uko byerekanwa no kwinginga kwabo basaba kutirukanwa ngo bave mu gihugu (Mariko 5:10), gutakamba kwabo ngo bemererwe kwinjira mu mukumbi w’ingurube wari hafi aho (Mariko 5:12), kwinginga ngo badatabwa “ikuzimu” (Luka 8:31), no gutakambira Kristo ngo batajya kwicwa urupfu rw’agashinyaguro “igihe” kitaragera.

Igitekerezo #4: “Satani nk’ ‘imana y’iyi si’ afite ububasha ku bintu byose byo mu isi, harimo n’ubutegetsi bw’ibihugu, ib za, no guhindagurika kw’ikirere.”

(Myth #4: “Satan, as ‘the god of this world’ has control over everything on the earth, including human governments, natural disasters, and the weather.”)

Intumwa Pawulo yita Satani “imana y’iyi si” muri Bibiliya (2 Kor. 4:4) Yesu akamwita “umutware w’iyi si” (Yoh 12:31; 14:30; 16:11). Abenshi bashingiye kuri ibi byanditswe, bagiye bibwira ko Satani afite ubutware busesuye bwo gutegeka isi. Nubwo twamaze kureba ibyanditswe bihagije bivuguruza iyi myizerere igoramye, dukwiriye na none kongera kwimbika kurushaho kugira ngo dusobanukirwe neza ukuntu mu byukuri imbaraga za Satani zifite umupaka ntarengwa. Tugomba kwitonda kugira ngo imyumvire yacu kuri Satani idashingira ku byanditswe bine gusa bimwita imana y’iyi si cyangwa umutware w’iyi si.

Iyo dukomeje kwiga Bibiliya neza, tubona ko Yesu atavuga gusa ko Satani ari “umutware w’iyi si,” ahubwo anita Se wo mu ijuru “Umwami w’ijuru n’isi” (Mat. 11:25; Luka 10:21). Ikindi kandi Pawulo na we kimwe na Yesu, ntiyavuze gusa ngo Satani ni “imana y’iyi si,” ariko yanavuze ko Imana ari “Umwami w’ijuru n’isi” (Ibyak 17:24). Ibi bitwereka ko yaba Yesu cyangwa Pawulo,nta n’umwe muri bo washakaga ko twakumva ko Satani afite ubutware bwose ku isi. Ubutware bwa Satani bufite aho bugarukira.

Itandukaniro rinini cyane hagati y’ibi byanditswe bitandukanye turisanga hagati y’ijambo isi [abantu] (world) n’isi(earth). Nubwo kenshi dukunze gukoresha aya magambo nk’aho asobanura kimwe, ariko mu Kigiriki cy’umwimerere aya magambo yombi aratandukanye. Iyo dusobanukiwe itandukaniro ryayo, turushaho cyane kumva ubutware bw’Imana n’ubwa Satani ku isi icyo ari cyo.

Yesu yavuze ko Imana Data ari Umwami w’isi (earth). Ijambo isi (earth) mu rurimi rw’Ikigiriki ni ge. Rishatse kuvuga ubutaka, amazi n’ikirere bigize isi dutuyeho, ni na ryo ryakomotseho ijambo ry’Icyongereza geography(“ubumenyi bw’isi”).

Ariko Satani we Yesu yamwise umutware w’iyi si (world). Ijambo ry’Ikigiriki rivuga isi (world) ahangaha ni kosmos, rigasobanura mbere na mbere uko ibintu biteye cyangwa uko gahunda zigenwe. Ryo rivuga abantu aho kuvuga isi nk’umubumbe dutuyeho w’ubutaka n’amazi n’ibindi. Ni yo mpamvu kenshi Abakristo bita Satani “imana y’imikorere y’iyi si.”

Muri iki gihe, ntabwo Imana ifite ubutware bwuzuye ku isi[abantu] (world), kuko itagenga abantu bose bo ku isi. Impamvu ibitera ni uko Imana yahaye abantu uburenganzira bwo kwihitiramo ugomba kubagenga akababera shebuja, ariko abenshi bahisemo kuyoboka Satani. Abantu kuba bafite uburenganzira bwo guhitamo, birumvikana, biri mu mugambi w’Imana.

Pawulo yakoresheje irindi jambo ritandukanye n’iryo avuga isi (world), yakoresheje ijambo ry’Ikigiriki aion, ubwo yandikaga avuga ku by’imana y’iyi si. Iri jambo aion rishobora gusobanura age (ibihe) kandi akenshi ni ko risobanura, bishatse kuvuga igihe runaka gifite aho gitangirira n’aho kirangirira. Satani ni imana y’iki gihe.

Ibi byose bishatse kuvuga iki? Isi (earth) ni ubu butaka dutuyeho. Isi (world) ivuga abantu batuye kuri iyi si muri iki gihe, by’umwihariko cyane cyane abantu badakorera Yesu. Bakorera Satani kandi babohewe mu mikorere ye y’ingeso mbi z’ibyaha. Twebwe Abakristo turi “mu isi” ariko ntituri “ab’isi” (Yohana 17:11,14). Tuba mu baturage b’ubwami bw’umwijima, ariko mu byukuri twe turi mu bwami bw’umucyo, ubwami bw’Imana.

Ubu rero noneho igisubizo cyacu turakibonye. Tubivuge mu buryo bworoshye: Imana ifite ubutware bwuzuye mu kugenga isi (earth). Satani, ahawe uruhushya n’Imana, agenga “imikorere y’isi (world) gusa, agenga abo mu bwami bw’umwijima. Ku bw’iyo mpamvu intumwa Yohana yanditse ko “isi (world) yose (ntabwo ari isi [earth] yose iri mu mubi” (1 Yohana 5:19).

Ibi ntabwo bivuze ko Imana nta butware ifite ku isi (world), cyangwa ku mikorere y’isi, cyangwa ku b’isi. Nk’uko Daniyeli yavuze ni yo, “itegeka ubwami bw’abantu, ikabugabira uwo ishaka wese” (Dan. 4:25). Ishobora gushyira hejuru uwo ishaka igacisha bugufi uwo ishaka. Ariko nk’ “umutegeka w’ikirenga w’ubwami bw’abantu,” ifite ubutware bwo kureka Satani akagira igice cy’abantu atwara, ni ukuvuga abantu bigometse ku Mana.

Turebe Ibyo Satani Yavugaga Gutanga

(Satan’s Offer Considered)

Gutandukanya isi (earth) n’isi (world) binadufasha gusobanukirwa ikigeragezo cya Yesu mu butayu. Satani yeretse Yesu “ubwami bwose bw’isi (world) mu kanya gato.” Satani ntabwo ari umwanya mu butegetsi bw’abantu yahaga Yesu, nko kuba perezida cyangwa minisitiri w’intebe. Satani si we uzamura cyangwa ngo acishe bugufi abategetsi bo mu isi–ni Imana.

Ahubwo, Satani agomba kuba yareretse Yesu uduce tw’ubwami bwe bw’umwijima. Yeretse Yesu inzego zitandukanye z’abadayimoni uko uturere bagenga mu bwami bw’umwijima dukurikirana, n’abantu bigometse ku Mana bakaba abagaragu babo. Satani rero yabwiraga Yesu ko yamuha gutegeka ubwami bwe–Yesu aramutse yemeye kumusanga bakigomeka ku Mana hamwe. Yesu rero yari kuba uwa kabiri kuri Satani mu butegetsi bw’ubwami bw’umwijima.

Ubutware bw’Imana ku Bwami bw’abantu

(God’s Control Over Earthly, Human Governments)

Reka turebe ku buryo bw’umwihariko aho ubutware bwa Satani butarenga dushingiye ku byanditswe bihamya ubutware Imana ifite ku butegetsi bwo mu isi. Satani hari ubutware afiteho mu butegetsi bwo mu isi bitewe gusa n’uko hari ubutware afite ku bantu badakijijwe, kandi ubutegetsi bwo mu isi akenshi buba bufitwe n’abantu badakijijwe. Ariko hejuru y’ibyo byose, Imana ni yo igenga ubutegetsi bw’abantu, Satani ashobora kubakoresha kugeza gusa aho Imana itamwemerera kurenga.

Twamaze kubona amagambo Daniyeli yabwiye Umwami Nebukadinezari, ariko kuko ari amagambo ahumura amaso cyane, reka twongere tuyarebe.

Umwami ukomeye Nebukadinezari yazamutse cyane mu bwibone kubera imbaraga n’ibyo yari yarakoze bikomeye, hanyuma Imana ica iteka ryo kumumanura ikamucisha bugufi cyane kugira ngo amenye ko ” Isumbabyose ari yo itegeka ubwami bw’abantu, kandi ikabugabira uwo ishaka, ikimikamo uworoheje nyuma ya bose” (Dan. 4:17). Biragaragara ko Imana ari yo yari ikwiye gushimirwa gukomera k’ubutegetsi bwa Nebukadinezari. Kandi ibi ni ko bimeze kuri buri mutegetsi wo mu isi. Intumwa Pawulo avuga ku bategetsi bo mu isi yaravuze ati “nta butware butava ku Mana, n’abatware bariho bashyizweho n’Imana” (Rom. 13:1).

Uhereye ku itangiriro Imana ni yo mugaba w’ikirenga w’ibyaremwe byose. Hagize undi uwo ari we wese ugira ubutware ubwo ari bwo bwose, ni uko gusa Imana yaba yemeye kumuhaho agace.

Hanyuma se abatware babi? Pawulo yashakaga kuvuga ko na bo bashyirwaho n’Imana? Yego ni byo yashakaga kuvuga. Mbere yaho muri urwo rwandiko, Pawulo yaranditse ati, “Ibyanditswe byabwiye Farawo biti, ‘Icyatumye nkwimika ni ukugira ngo nkwerekanireho imbaraga zanjye, kandi ngi izina ryanjye ryamamazwe hose mu isi yose'” (Rom. 9:17). Imana yashyize hejuru Farawo w’umutima winangiye ifite intego yo kugira ngo yiheshe icyubahiro. Imana yashakaga kwerekanira imbaraga zayo zitangaje mu bitangaza byayo byo gukiza–kandi ibyo byatewe ni umuntu utumvira washyizwe hejuru n’Imana.

Mbese ibi ntibigaragarira no mu magambo Yesu yavuganye na Pilato? Pilato atangajwe n’uko Yesu yanze kumusubiza, yaramubwiye ati, “Uranyihorera? Ntuzi yuko mfite ububasha bwo kukurekura, kandi ko mfite ububasha bwo kukubamba?” (Yohana 19:10).

Yesu aramusubiza ati, “Ntiwagira ububasha bwo kugira icyo untwara, utabuhawe buvuye mu ijuru” (Yohana 19:11). Bitewe n’uko Imana yari izi ububi bwa Pilato, yamuhaye ubutware kugira ngo umugambi wayo kuri Yesu gupfa urupfu rwo ku musaraba uzasohozwe.

Iyo ucishije amaso gusa mu bitabo by’amateka by’Isezerano rya Kera ubona ko rimwe na rimwe Imana ikoresha abategetsi b’abagome kugira ngo isuke uburakari bwayo ku bantu babukwiye. Nebukadinezari Imana yamukoresheje mu guhana amahanga menshi yo mu Isezerano rya Kera.

Muri Bibiliya hari ingero nyinshi z’abategetsi Imana yashyize hejuru cyangwa ikabacisha bugufi. Urugero, mu Isezerano Rishya dusoma ibya Herode, wananiwe guha Imana icyubahiro igihe bamwe mu bantu be basakuzaga bati, “Yemwe noneho ni ijwi ry’Imana, si iry’umuntu!” (Ibyak 12:22).

Ingaruka? “Ariko muri ako kanya marayika w’Umwami Imana aramukumbanya…aherako agwa inyo umwuka urahera” (Ibyak 12:23).

Ntiwibagirwe ko Herode yari uwo mu bwami bwa Satani, ariko ntabwo yari hejuru y’amategeko y’Imana. Biragaragara ko Imana ishatse yahanantura umutegetsi uwo ari we wese wo muri iki gihe cya none.[5]

Ubuhamya bw’Imana ubwayo

Reka turangiza, dusome ibyo Imana ubwayo yivugiye mu kanwa k’umuhanuzi Yeremiya ku byerekeye ubutware bwayo ku bwami bw’abantu.

“Yemwe ab’inzu ya Isirayeli mwe, mbese sinabasha kubagenza nk’uyu mubumbyi?” Ni ko Uwiteka abaza. “Dore uko ibumba rimeze mu ntoki z’umubumbyi, ni ko namwe mumeze mu ntoki zanjye, mwa ab’inzu ya Isirayeli mwe. Igihe nzavuga iby’ishyanga n’iby’igihugu ngo bikurweho bisenywe birimbuke, ariko iryo shyanga navugaga niriva mu byaha byaryo, nzareka ibyago nibwiraga kubagirira. Kandi igihe nzavuga iby’ishyanga n’iby’igihugu ngo mbashingishe intege kandi mbameze, ariko bakanga bagakorera ibyaha imbere yanjye ntibumvire ijwi ryanjye, nzaherako ndeke ibyiza nari navuze ko nzabagirira” (Yer. 18:6-10).

Urabona ko nta kuntu Satani, igihe yageragezaga Yesu mu butayu, yari afite uburenganzira n’ubushobozi bwo kugira ubutware amuha ku butegetsi bw’ubwami bw’abantu ku isi? Niba yaravugishaga ukuri (nk’uko rimwe na rimwe ajya abigira), ubwo rero ubutware yavugaga yaha Yesu bwari ubwo gutegeka ubwami bwe bw’umwijima.

Ariko se Satani afite ijambo ku bwami bw’abantu? Yego, ariko gusa bitewe n’uko ari we utegeka ibitekerezo by’abantu badakijijwe, kandi mu butegetsi bw’abantu harimo abantu badakijijwe. Nyamara na none ijambo ashobora kugira ni ku rwego Imana iba imwemereye gusa, kandi Imana ifite kuburizamo imigambi ya Satani igihe icyo ari cyo cyose ishakiye. Intumwa Yohana yanditse ko Yesu ari we “utwara abami bo mu isi” (Ibyah. 1:5).

Mbese Satani ashobora guteza ibza n’ikirere kibi?

Bitewe n’uko Satani ari “imana y’iyi si,” abenshi bibwira ko rero anafite ububasha bwo kugenga guhindagurika kw’ikirere kandi akaba ari we uteza ibīza, nk’amapfa, imyuzure, imiyaga y’inkūbi, ibishyitsi n’ibindi. Ariko se ni ko Bibiliya ivuga? Na none aha tugomba kwitonda cyane kugira ngo imyumvire yacu kuri Satani idashingira gusa ku cyanditswe kimwe kivuga ngo, “umujura ntazanwa n’ikindi keretse kwiba no kwica no kurimbura” (Yoh 10:10). Mbega ukuntu numvise kenshi abantu bakoresha uyu murongo bashaka kwemeza ko ikintu cyose kije kwiba, kwica no kurimbura kiba giturutse kuri Satani! Nyamara iyo dusomye Bibiliya twitonze, tubona ko Imana ubwayo rimwe na rimwe yica ikarimbura. Reba iyi mirongo itatu mu ngero nyinshi zishoboka:

Utegeka agaca imanza, ni Imwe yonyine, ari yo ibasha gukiza no kurimbura (Yak 4:12).

Ahubwo ndabereka uwo mukwiriye gutinya: mutinye umara kwica umuntu agashobora kumujugunya muri gehinomu. Ni koko ndababwira abe ari we mutinya! (Luka 12:5.)

Kandi ntimuzatinye abica umubiri badashobora kwica ubugingo, ahubwo mutinye ushobora kurimburira ubugingo n’umubiri muri Gehinomu (Mat. 10:28).

Tuvuze ko buri kintu cyose kirimo kwica cyangwa kurimbura ari igikorwa cya Satani twaba twibeshye. Hari ingero nyinshi muri Bibiliya z’aho Imana yica kandi ikarimbura.

Tugomba kwibaza, igihe Yesu yavugaga umujura utazanwa n’ikindi uretse kwiba, kwica no kurimbura, niba ari Sani yavugaga koko? Na none icyo bidusaba ni ugusoma tureba igihe ayo magambo yayavugiye, ibindi biyakikije. Umurongo umwe mbere y’ayo magambo yavuze y’umujura utazanwa n’ikindi uretse kwiba, kwica no kurimbura, Yesu yaravuze ati, “Abambanjirije bose bari abajura n’abanyazi, ariko intama ntizabumvise” (Yohana 10:8). Iyo dusomye amagambo yose Yesu yavuze muri Yohana 10:1-15 avuga ko ari we Mwungeri mwiza, birushaho kugaragara cyane ko amagambo umujura n’abajura yakoresheje yavugaga abigisha b’ibinyoma n’abayobozi b’amadini.

Imyumvire Itandukanye Ku By’ikirere kibi n’ib za

Iyo inkubi y’umuyaga cyangwa guhinda umushyitsi kw’isi byadutse, bizana ikibazo cy’imyizerere mu mitwe y’abantu bizera Imana: “Ni nde uteye ibi?” Hari uburyo bubiri gusa bushoboka ku Bakristo bizera Bibiliya: Ni Imana cyangwa ni Satani.

Bamwe bashobora kubyamagana bati: “Reka reka! Ntitugomba gushyira amakosa ku Mana! Amakosa ni ay’abantu. Imana yo irabahanira gusa ibyaha byabo.”

Niba Imana izana inkubi y’umuyaga n’ibishyitsi nk’ibihano by’ibyaha, ni byo koko amakosa ni ay’abantu batumvira si ay’Imana, ariko ntibibuza ko na none Imana ari yo bibarwaho kuko ibīza ntibishobora kubaho Imana idaciye iteka.

Cyangwa, niba kandi ari Imana yemerera Satani ngo ateze inkubi z’umuyaga cyangwa ibishyitsi`kugira ngo ihane abanyabyaha, koko dushobora kuvuga ko ari Satani ubiteza, ariko na none, ni Imana ibikora. Impamvu ni uko ari yo yemerera Satani guteza ibyo byago kandi bitewe n’uko ibyo bīza biba bibaye ari ingaruka zitewe n’uko Imana yarakajwe n’ibyaha by’abantu.

Abandi bavuga ko ari Imana ari na Satani ntawuteza iyo miyaga y’inkubi cyangwa ibishyitsi, ahubwo ngo ni “ibintu bisanzwe byo mu kirere by’iyi si yacu y’ibyaha yanduye.” Mu buryo bufifitse, na bo baba bavuga ko abantu ari bo ba nyirabayazana b’ibyo bīza, ariko na none baba hari icyo batarasobanukirwa. Ibi na none ntibikuramo uruhare rw’Imana. Niba imiyaga y’inkubi ari “ibintu bisanzwe gusa byo mu kirere cy’iyi si yacu y’ibyaha,” ni nde wategetse ko bibaho? Biragaragara ko mu byukuri imiyaga y’inkubi itaremwe n’abantu. Ni ukuvuga ngo, izo nkubi z’imiyaga ntizibaho kuko hari ibinyoma bigeze ku gipimo runaka bimaze kuzamuka mu kirere. Ibishyitsi by’imitingito y’isi ntibiba kuko hari umubare runaka w’abantu basambanye.

Oya, niba hari isano iri hagati y’icyaha n’inkubi z’imiyaga, ni ukuvuga ko Imana ibirimo, kuko iyo miyaga ya kirimbuzi ari igihano cy’ibyaha. Nubwo byaba bibaho rimwe na rimwe, na bwo ni Imana yagennye ko bizajya biba rimwe na rimwe, bityo rero ibifitemo uruhare.

Nubwo kandi nta sano yaba iri hagati y’ibyaha n’ibīza, hanyuma Imana ikaba yararemye isi ikayikwanjika ntiyiringanize, hakabamo amakosa mu miterere yayo ku buryo rimwe na rimwe ihinduka igatigita kandi n’ikirere rimwe na rimwe kikarakara kikihinduriza, na none Imana yabarwaho ibyo bishyitsi n’imiyaga y’inkubi kuko ari yo muremyi, kandi ayo makosa yayo atera abantu imibabaro.

“Nyina w’Ibiriho” ntabaho

(There is No “Mother Nature”)

Bityo rero dufite ibisubizo by’uburyo bubiri gusa ku kibazo cy’ibīza. Ni Imana cyangwa ni Satani uba ari inyuma yabyo. Mbere y’uko tureba ibyanditswe bitwereka igisubizo cy’ukuri, reka tubanze twongere dutekereze kuri ubwo buryo bubiri bushoboka.

Niba Satani ari we uteza ibīza, ni ukuvuga ko Imana ishobora cyangwa idashobora kumubuza kubikora. Niba Imana ishoboye kubuza Satani guteza ibīza ariko ntimubuze, ubwo na none ni ukuvuga ko ibifitemo uruhare. Ibyago by’ibīza ntibyashobora na rimwe kuba itabyemeye.

Ariko noneho ku rundi ruhande. Reka dufate ko, Imana idashoboye kubuza Satani gukora ibyo akora, ariko ikaba yifuzaga kumubuza. Ariko se koko ibyo birashoboka?

Niba Imana idashoboye kubuza Satani guteza ibīza, ubwo noneho Satani arusha Imana imbaraga, cyangwa ayirusha amayeri. Ibi ni byo, mu byukuri, ba bandi bizera ko “Satani yafashe ubutware bwo gutegeka isi igihe Adamu yagwaga” bavuga. Bavuga ko Satani afite uburenganzira buciye mu mategeko bwo gukora icyo ashatse ku isi ngo kuko yibye Adamu ubutware yari yahawe. Ngo none, Imana yifuzaga kuba yabuza Satani kugira ibyo akora bibi, ngo ariko igomba kubahiriza ubutware yari yageneye Adamu, ngo bukaba ubungubu bufitwe na Satani. Mu bundi buryo bishatse kuvuga ngo Imana yarajijwe ntiyashobora kumenya hakiri kare uko bizagenda igihe Adamu azacumura, ariko Satani we kubera ko azi ubwenge kurusha Imana, yagize ubushobozi Imana itifuzaga ko agira. Jye sinarota mvuga ngo Satani arusha Imana ubwenge.

Niba iyo myizere ivuga ko “Satani yafashe ubutware bwa Adamu” ari yo koko, twakwibaza impamvu Satani adateza ibishyitsi cyangwa inkubi z’imiyaga birenze ibyo ateza ubu, kandi n’impamvu atareba ahirundiye Abakristo benshi ngo abe ari ho yibasira. (Nuvuga uti “ni uko Imana itamwemerera kwibasira aho Abakristo batuye ari benshi,” uraba wemeje ko Satani adashobora kugira icyo akora adahawe uruhushya n’Imana.)

Iyo tubirebye neza, dusanga ibisubizo bibiri gusa bishobora kuboneka ku kibazo cyacu ari ibi: (1) Imana ni yo iteza ibishyitsi n’inkubi z’imiyaga cyangwa (2) Satani ni we ubiteza ahawe uruhushya n’Imana.

Urabona ko utanitaye ku kumenya igisubizo cy’ukuri icyo ari cyo, uko bigenda kose, Imana ari yo ibitera? Igihe abantu bavuga ngo, “Imana si yo yohereje uriya muyaga–ni Satani wabikoze ahawe uruhushya n’Imana,” mu byukuri ntibaba bakuyemo uruhare rw’Imana mu buryo bwuzuye nk’uko bashobora kuba babyifuzaga. Niba Imana yashoboraga kuba yabujije Satani guteza incubi y’umuyaga, tutitaye ku kureba niba yabishakaga cyangwa itabishakaga, mu byukuri ni yo iba yabiteye. Abantu batumvira Imana bashobora gushyirwaho amakosa kubera ibyaha byabo (igihe inkubi y’umuyaga yoherejwe n’Imana cyangwa Imana yemeye ko ibaho nk’igihano), ariko na none byaba ari ubupfapfa kuvuga ko Imana nta ruhare ibifitemo na mba cyangwa ko atari yo ibiri inyuma.

Ubuhamya bw’Ibyanditswe

(Scripture’s Testimony)

Ni iki, ku buryo bw’umwihariko, Bibiliya ivuga ku “bīza”? Mbese Bibiliya ivuga ko Imana ari yo ibiteza cyangwa Satani? Reka tubanze turebe ibishyitsi kuko Bibiliya ibivugaho cyane.

Nk’uko Bibiliya ivuga, ibishyitsi bishobora kubaho ibihano by’Imana ku banyabyaha babikwiriye. Dusoma muri Yeremiya ngo: “Isi itigiswa n’uburakari bwayo [bw’Imana] kandi amahanga ntabasha kwihanganira umujinya wayo” (Yer. 10:10).

Yesaya arihanangiriza ati,

Uwiteka Nyiringabo azamuteza guhinda kw’inkuba n’umushyitsi w’isi n’umuriri ukomeye, na serwakira n’inkubi y’umuyaga, n’ikirimi cy’umuriro ukongora (Yes. 29:6).

Ushobora kuba wibuka ukuntu mu gihe cya Mose, isi yasamye ikamira Kora na bagenzi be bigometse (reba Kub. 16:23-34). Iki cyari igihano cy’Imana ku buryo bugaragara neza. Izindi ngero z’aho Imana yahanishije umushyitsi w’isi ziboneka muri Ezek. 38:19; Zab. 18:7; 77:18; Hag. 2:6; Luka 21:11; Ibyah. 6:12; 8:5; 11:13; 16:18.

Imwe mu mishyitsi y’isi yanditswe muri Bibiliya ntabwo ari ibihano by’Imana, ariko ibyo ari byo byose ni Imana yabaga ibiteye. Urugero, nk’uko ubutumwa bwiza bwa Matayo buvuga, igihe Yesu yapfaga isi yahinze umushyitsi (Mat. 27:51,54), habayeho ukundi guhinda umushyitsi kw’isi kandi igihe yazukaga (Mat. 28:2). Ni Satani se wabiteje?

Igihe Pawulo na Sila bahimbazaga Imana mu gicuku bari mu nzu y’imbohe i Filipi, “habayeho igishyitsi cyinshi, imfatiro z’inzu ziranyeganyega, inzugi zose ziherako zirakinguka, iminyururu ya bose iradohoka” (Ibyak 16:26). Mbese ni Satani wateje icyo gishyitsi? Si ko nibwira! N’umurinzi wa gereza amaze kubona Imbaraga z’Imana ibyo zikoze yarakijijwe. Kandi uwo si wo mushyitsi wonyine watewe n’Imana uvugwa mu gitabo cy’Ibyakozwe (reba Ibyak 4:31).

Mperutse gusoma ukuntu Abakristo bamwe, bamaze kumva mu iteganyagihe ko hari umushyitsi w’isi ugiye kubaho, bagiye aho hantu umushyitsi uzabera ngo “barwane intambara yo mu mwuka” batsinde Satani. Urabona ukuntu bibeshya? Byakabaye byiza mu buryo bugendanye na Bibiliya iyo basenga bagatakambira Imana ikagirira imbabazi abantu b’aho hantu. Kandi iyo bakora ibyo ntibiba byarabaye ngombwa ko batakaza igihe cyabo n’amafaranga bafata urugendo rwo kujya aho hantu umushyitsi washoboraga kubera–baba barasengeye Imana aho batuye. Ariko kujya kurwanya Satani ngo bahagarike umushyitsi w’isi bihabanye n’ibyo Bibiliya ivuga.

Naho Se Inkubi Z’Imiyaga?

(How About Hurricanes?)

Ijambo inkubi y’umuyaga (hurricane) ntabwo riri muri Bibiliya, ariko dushobora kubona ingero zivuga imiyaga ikomeye. Urugero:

Abamanuka bajya mu nyanja bakagenda mu nkuge, bagatundira mu mazi y’isanzure, barebeye imirimo y’Uwiteka n’ibitangaza bye imuhengeri. Kuko yategetse agahuhisha umuyaga w’ishuheri, ushyira hejuru umuraba waho (Zab. 107:23-25).

Maze Uwiteka yohereza umuyaga mwinshi mu nyanja, mu nyanja haba ishuheri ikomeye inkuge yenda kumeneka (Yona 1:4).

Hanyuma y’ibyo mbona abamarayika bane bahagaze ku mfuruka enye z’isi bafashe imiyaga ine yo mu isi kugira ngo hatagira umuyaga uhuha mu isi cyangwa mu nyanja cyangwa ku giti cyose (Ibyah. 7:1).

Biragaragara ko Imana ihagurutsa imiyaga ikaba ari na yo iyihosha.[6]

Muri Bibiliya yose hari icyanditswe kimwe gusa kivuga umuyaga woherejwe na Satani. Ni muri cya gihe cyo kugeragezwa kwa Yobu umugaragu we azana inkuru ati: “Nuko haza incubi y’umuyaga iturutse mu butayu, ihitana imfuruka enye z’inzu, maze inzu igwira abo basore barapfa” (Yobu 1:19).

Iyo dusomye igice cya mbere cy’igitabo cya Yobu tubona ko tubona ko Satani ari we wateje Yobu ibyago. Nyamara ntitugomba kwibagirwa ko Satani atashoboraga kugira icyo atwara Yobu cyangwa abana be Imana itabyemeye. Na none rero turabona ko Imana ari yo ifite ububasha ku muyaga.

Ishuheri Ku Nyanja Ya Galilaya

The Gale on Galilee

Twavuga iki se kuri ya “shuheri” yamereraga nabi Yesu n’abigishwa be ubwo bari mu bwato bambuka inyanja ya Galilaya? Agomba kuba rwose ari Satani wateje iriya nkubi y’umuyaga, kuko Imana itashoboraga kohereza umuyaga washoboraga kubika ukaroha ubwato bwarimo Umwana wayo. “Ubwami bwirwanyije ubwabwo burasenyuka,” none se kuki Imana yari guteza umuyaga washoboraga kubangamira ubuzima bwa Yesu n’abigishwa cumi na babiri?

Ibi ni ibitekerezo bifite ishingiro, ariko reka tubanze twibaze akanya gato. Niba Imana atari yo yohereje umuyaga akaba ari Satani wawuteje, na none ariko tugomba kwemera ko Imana yemereye Satani kuwuteza. Na none rero cya kibazo ni cyo kikigomba gusubizwa: Kuki Imana yari kwemerera Satani guteza umuyaga ushobora kubangamira ubuzima bwa Yesu na ba bandi cumi na babiri?

Mbese hari igisubizo twabona? Wenda Imana hari icyo yigishaga abo bigishwa ku byo kwizera. Wenda yarabageragezaga. Wenda yageragezaga Yesu, wagombaga “kugeragezwa mu buryo bwose nkatwe, ariko ntakore icyaha” (Heb. 4:15). Kugira ngo Yesu ageragezwe mu buryo bwuzuye, yagombaga kugira ubwo ageragezwa kuba yagira ubwoba. Cyangwa Imana yashakaga guhesha Yesu icyubahiro. Cyangwa yashakaga gukora ibi byose bimaze kuvugwa haruguru.

Imana yajyanye Abisirayeli ku Nyanja Itukura kandi izi neza ko ingabo za Farawo zibakurikiye zishobora kuhabafatira. Nyamara se ntiyarimo ibakura mu bubata bw’Abanyegiputa? None se ubwo ntiyirwanyaga ubwayo ibayobora ahantu bari buze kurimburirwa? Mbese aha ntihatwereka “ubwami bwirwanya ubwabwo”?

Oya, kuko nta mugambi Imana yari ifite wo kwicisha Abisirayeli. Kandi nta mugambi yari ifite wo kwemerera Satani ngo ateze ishuheri mu Nyanja ya Galilaya cyangwa ngo Yesu n’abigishwa be cumi na babiri barohame.

Bibiliya ntivuga ko ari Satani wohereje uwo muyaga ku Nyanja ya Galilaya, nta n’ubwo ivuga ko ari Imana yawohereje. Bamwe bavuga ko ari Satani ugomba kuba warawuteje kuko Yesu yawucyashye. Wenda birashoboka, ariko iyo ngingo ntifite ireme. Yesu ntiyacyashye Imana–Yacyashye umuyaga. N’Imana Data ni ko iba yarabigenje. Ni ukuvuga ko ishobora guhagurutsa umuyaga hanyuma ikawuturisha iwucyaha. Kuba gusa Yesu yaracyashye umuyaga ntibivuga ko ari Satani wari wawuteje.

Na none ntidukwiriye gushingira imyizerere yacu yose ku murongo umwe gusa kandi utagira icyo werekana mu byukuri. Namaze gutanga ibyanditswe byinshi byerekana ko Imana ifite ubutware busesuye ku muyaga, kandi akenshi cyane ni yo iwohereza. Ingingo yanjye y’ingenzi ni uko Satani nubwo ari “imana y’iyi si,” adafite rwose ubutware busesuye ku muyaga cyangwa ngo agire uburenganzira bwo guteza inkubi y’umuyaga igihe icyo ari cyo cyose ashakiye cyangwa aho ashatse hose.

Nuko rero igihe inkubi y’umuyaga yadutse, ntabwo dukwiye kubibona nk’aho ari ibintu byacitse Imana, cyangwa ibintu yifuzaga guhagarika ariko ikaba itabishoboye. Kuba Yesu yaracyashye umuyaga mu Nyanja ya Galilaya ugatuza byari bikwiye kuba ikimenyetso gihagije cy’uko Imana ibishatse ishobora guhagarika inkubi y’umuyaga.

Kandi iyo Imana yohereje inkubi y’umuyaga (cyangwa ibyemeye), ni uko iba ifite impamvu, kandi igisubizo cyumvikana ku kibazo cy’igituma yohereza cyangwa ikemerera umuyaga uza ugasenya ukarimbura ibintu bitagira uko bingana ni uko iba ihana kandi yihanangiriza abantu batumvira.

“Ariko Inkubi Z’imiyaga Zijya Zigira Ingaruka Ku Bakristo”

(“But Hurricanes Sometimes Harm Christians”)

Hanyuma se twavuga iki ku Bakristo babangamirwa cyane n’ibīza? Iyo incubi y’umuyaga yadutse ntisenyera abadakijijwe gusa. Mbese urupfu rwa Yesu yitangaho igitambo, ntirwakuyeho Abakristo umujinya w’Imana? None dushobora dute kuvuga ko ari Imana iteza ibīza kandi bishobora no guhitana abana bayo?

Ibi koko ni ibibazo bikomeye gusubiza. Ariko tugomba kumenya ko bitoroshye gusubiza turamutse tugendeye ku myumvire ipfuye yo kumva ko Satani ari we uteza ibīza. Niba Satani ari we uteza ibīza byose, none kuki Imana imwemerera guteza ibintu bishobora kugirira nabi abana bayo? Urabona ko na none tugifite cya kibazo.

Bibiliya ivuga yeruye ko abari muri Kristo “batagenewe umujinya” (1 Tes. 5:9). Kandi Bibiliya ikavuga ko abatumvira Yesu “umujinya w’Imana uguma kuri”(Yohana 3:36). Ariko se umujinya w’Imana waguma ute ku badakijijwe ntugire ingaruka ku bakijijwe? Igisubizo ni uko rimwe na rimwe bidashoboka, kandi ibyo tugomba kubyakira gutyo.

Mu minsi yo kuva muri Egiputa, Abisirayeli bose babaga mu gace kamwe, ibyago byose Uwiteka yateje Abanyegiputa, Abisirayeli bo ntibyabagezeho (reba Kuva 8:22-23; 9:3-7; 24-26; 12:23). Ariko twebweho tubana n’ “Abanyegiputa” no mu kazi aho dukora dukorana na bo. Niba se Imana igomba kubahanisha ibīza, twe twabicika dute?

Gucika/kurokoka ni ryo jambo rwose ry’urufunguzo rwo kugira ngo umuntu asobanukirwe igisubizo kuri iki kibazo. Nubwo Nowa yarokotse umujinya w’Imana igihe yatezaga umwuzure, ariko na we byamugizeho ingaruka, kuko yarushye abaza inkuge, kandi yagombye kumara umwaka ari muri ubwo bwato hagati y’iminuko y’inyamaswa n’amatungo bitandukanye byataga amase n’amahurunguru. (Nyamara kandi ari Isezerano Rya Kera ari n’Irishya yombi avuga ko Imana ari yo yateje umwuzure wa Nowa, ntabwo ari Satani; reba Itang. 6:17; 2 Pet. 2:5).

Loti yararusimbutse igihe ibihano by’Imana byamanukiraga Sodomu na Gomora, ariko yatakaje ibyo yari atunze byose kuko byarimbuwe n’umuriro n’amazuku. Igihano cy’Uwiteka ku banyabyaha cyagize ingaruka ku mukiranutsi.

Imyaka myinshi mbere y’uko biba, Yesu yaburiye abizera b’i Yerusalemu ko bagomba kuzahunga ubwo bazabona umujyi wabo ugoswe n’ingabo z’amahanga, kuko icyo kizaba ari igihe cyo “guhōra” (Luka 21:22-23)–ibyo bikerekana neza ko wari umugambi w’umujinya w’Imana kugira ngo Yerusalemu izagotwe n’Abaroma mu mwaka wa 70 nyuma ya Yesu Kristo. Imana ishimwe ku Bakristo bumviye Kristo kuko bahunze bagakiza amagara yabo, ariko batakaje ibyabo basize i Yerusalemu.

Muri izi ngero zose uko ari eshatu tubonye haruguru, turabona ko abantu b’Imana na bo ingaruka zishobora kubageraho ku gipimo runaka igihe Imana itanze ibihano ku banyabyaha. Bityo rero ntidushobora guherako dufata umwanzuro ngo tuvuge ko Imana atari yo iteza ibīza ngo kubera ko bigera no ku Bakristo.

None Se Twakora iki?

(What Then Shall We Do?)

Tuba mu isi yavumwe n’Imana, isi ihura n’umujinya w’Imana igihe cyose. Pawulo yaranditse ati, “Umujinya w’Imana uhishurwa [ntabwo ari “ugiye guhishurwa”] uva mu ijuru ubyukirijwe ubugome no gukiranirwa by’abantu byose” (Rom. 1:18). Twe rero nk’abantu baba mu isi mbi, yavumwe n’Imana, ntidushobora guhunga burundu ingaruka z’umujinya w’Imana, nubwo uwo mujinya atari twe uba uziye by’umwihariko.

Ubwo tumenye ibi se twakora iki? Mbere na mbere twakwiringira Imana. Yeremiya yaranditse ati:

Hahirwa umuntu wizera Uwiteka, Uwiteka akamubera ibyiringiro. Kuko azahwana n’igiti cyatewe hafi y’amazi gishorera imizi mu mugezi. Ntikizatinya amapfa nacana, ahubwo ikibabi cyacyo kizahorana itoto, ntikizita ku mwaka wacanyemo amapfa kandi ntikizareka kwera imbuto zacyo (Yer. 17:7-8).

Urabona ko Yeremiya atavuze ko umuntu wiringira Uwiteka atazigera ahura n’amapfa na rimwe. Oya, ahubwo iyo amapfa acanye umuntu wiringira Uwiteka amera nk’igiti gishoreye imizi yacyo mu mugezi. Aba afite ahandi akura ibimutunga, mu gihe isi iba irimo iruma hirya no hino. Inkuru ya Eliya agaburirwa n’igikona igihe amapfa yateraga muri Isirayeli ni urugero ruherako ruza mu bitekerezo (reba 1 Abami 17:1-6). Dawidi yanditse avuga ku bakiranutsi ati, “Mu minsi y’inzara bazahazwa” (Zab. 37:19).

Ariko se amapfa ntaterwa na Satani? Oya, si ko Bibiliya ivuga. Iteka Imana ni yo iba ibiri inyuma, kandi iteka bikunze kuvugwa ko amapfa aba aturutse ku mujinya Imana isutse ku bantu babikwiye. Urugero:

Uwiteka Nyiringabo avuga atya ati, “Dore ngiye kubahana, abasore bazicishwa inkota, abahungu babo n’abakobwa babo bazicwa n’inzara” (Yer. 11:22).

Uku ni ko Uwiteka Nyiringabo avuga ati, “Dore nzabagabiza inkota n’inzara n’icyorezo, kandi nzabahindura nka za mbuto mbi z’umutini, zitaribwa kuko ari mbi” (Yer. 29:17).

“Mwana w’umuntu, igihugu nikinkorera icyaha kigacumura, nanjye nkakiramburaho ukuboko kwanjye ngakuraho urushingikirizo rw’umutsima, maze nkagiteza inzara nkagitsembamo abantu n’amatungo…” (Ezek. 14:13).

“Mwiringiraga kubona byinshi ariko dore byabaye bike, mubizanye imuhira mbitumuza umwuka wanjye. Ibyo byatewe n’iki? Ni ko Uwiteka Nyiringabo abaza. Byatewe n’inzu yanjye isigaye ari umusaka, kandi umuntu wese wo muri mwe yihutira kwiyubakira iye nzu. Nicyo gituma ijuru ku bwanyu ryimana ikime, n’isi ibura umwero wayo. Nuko ntera amapfa mu gihugu no ku misozi, no ku myaka no ku nzabibu, no ku mavuta ya Elayo no ku byera mu butaka byose, no ku bantu no ku matungo, no ku mirimo yose ikoreshwa amaboko” (Hag. 1:9-11).

Mu rugero rwa kane haruguru, tubona ko Abisirayeli ari bo biswe ba nyirabayazana b’amapfa ku bw’ibyaha byabo, ariko na none Imana ikavuga ko ari yo yayateje.[7]

Iyo Imana iteje amapfa abantu babi, ariko tukaba dutuye muri bo, tugomba kwiringira ko Imana izadutunga. Pawulo yahamije ko inzara idashobora kudutandukanya n’urukundo rwa Kristo!: “Ni nde wadutandukanya n’urukundo rwa Kristo? Mbese ni amakuba, cyangwa ni ibyago, cyangwa ni ukurenganywa, cyangwa ni inzara, cyangwa ni ukwambara ubusa, cyangwa ni ukuba mu kaga, cyangwa ni inkota?” (Rom. 8:35). Urabona ko Pawulo atavuze ko Abakristo batazigera bahura n’inzara, ahubwo yabaye nk’ukomoza ku kuvuga ko bashobora guhura n’inzara, nubwo we nk’umuntu uzi cyane Ibyanditswe, yari azi ko amapfa ashobora guterwa n’Imana nk’igihano ku banyabyaha.

Kuganduka Hamwe N’Ubwenge

Icya kabiri, tugomba kumvira kandi tugakoresha ubwenge bw’Imana kugira ngo twirinde tutagerwaho n’umujinya w’Imana uba wateganyirijwe ab’isi. Nowa yabaje inkuge, Loti yahungiye mu misozi, Abakristo b’i Yerusalemu bahunze umujyi wabo; aba bose bumviye Imana kugira ngo batagibwaho n’igihano cy’abanyabyaha.

Ndamutse ntuye ahantu hakunda kuba inkubi z’imiyaga, nakubaka inzu ikomeye idashobora kugurukanwa n’umuyaga cyangwa se nkubaka inzu ihendutse cyane itazandushya kongera kubaka! Kandi ngasenga. Buri Mukristo aba akwiye gusenga kandi agakomeza gutega amatwi uwo Yesu yasezeranye ko “azatubwira ibyenda kuba” (Yohana 16:13) kugira ngo dushobore kwirinda umujinya w’Imana uza ku banyabyaha.

Dusoma mu gitabo cy’Ibyakozwe 11 iby’umuhanuzi Agabo wavuze ku by’inzara yendaga gutera kandi yashoboraga kuzamerera nabi Abakristo b’i Yudaya. Ku bw’iyo mpamvu Pawulo na Barunaba bakiriye amaturo yo kuzagoboka ab’i Yudaya mu gihe gikomeye (reba Ibyak 11:28-30).

Mbese ibyo byabaho muri iki gihe? Yego rwose, kuko Umwuka Wera atahindutse, cyangwa ngo urukundo rw’Imana rugajuke. Ariko birababaje ko bamwe mu mubiri wa Kristo batiteguriye izo mpano n’uko gukora k’Umwuka Wera, kandi bityo bitewe n’uko “bazimya Umwuka” (1 Tes. 5:19) bagahomba bimwe mu byiza by’Imana.

Nyakwigendera Demos Shakarian, wabaye perezida w’umuryango Full Gospel Businessmen, ari na we wawushinze, yandika igitabo cy’ubuzima bwe avuga ukuntu Imana yavugiye mu gahungu k’agahanuzi katize amashuri ivugana n’Abakristo bo muri Arumeniya mu myaka y’1800. Imana yarababuriye ibabwira itsembabwoko (holocaust) ryendaga kubaho, bityo ibihumbi by’Abakristo b’abapentekoti bizeraga gukora k’Umwuka Wera barahunze, barimo n’ababyeyi b’ababyeyi ba Demos Shakarian. Nyuma yaho gato, Turikiya yateye Arumeniya maze Abanyarumeniya basaga miliyoni bararimburwa, harimo n’Abakristo bari banze kumvira uko Imana yababuriraga.

Byaba byiza dukomeje kwiyugururira Umwuka Wera kandi tukumvira Imana, bitabaye ibyo, natwe birashoboka cyane ko umujinya w’Imana watugeraho, kandi mu byukuri itagambiriye ko twebwe bitugeraho. Hari umugore Elisa yigeze kugira inama ati: “Hagurukana n’abo mu nzu yawe, ugende usuhukire aho uzashobora hose, kuko Uwiteka ategetse ko inzara itera ikazamara imyaka irindwi mu gihugu” (2 Abami 8:1). Mbese iyo uwo mugore ataza kumvira umuhanuzi?

Mu gitabo cy’Ibyahishuwe tubona aho Imana iburira abantu ngo basohoke bave muri “Babuloni” kugira ngo umujinya w’Imana umanukiye Babuloni utabageraho:

Numva irindi jwi rivugira mu ijuru riti, “Bwoko bwanjye, nimuwusohokemo [Babuloni] kugira ngo mwe gufatanya n’ibyaha byawo, mwe guhabwa no ku byago byawo. Kuko ibyaha byawo byarundanijwe bikagera mu ijuru, kandi Imana yibutse gukiranirwa kwawo….Ku bw’ibyo, ibyaha byawo byose bizaza ku munsi umwe, urupfu n’umuborogo n’inzara kandi uzatwikwa ukongoke, kuko Umwami Imana iwuciriye ho iteka ari iy’imbaraga” (Ibyah. 18:4-5,8).

Mu magambo make, Imana ifite ubutwre ku guhindagurika kw’ikirere no ku bīza. Muri Bibiliya Imana yakomeje kwerekana kenshi ko ari yo ifite ubutware ku biriho byose, uhereye ku mvura yagushije iminsi mirongwine igihe cya Nowa, kugeza ku mvura y’urubura n’ibindi byago yagiye iteza abanzi ba Isirayeli, kugeza ku ishuheri yahagurukije mu nyanja igateza umuraba ukomeye ubwato Yona yari arimo, kugeza ku guturisha umuyaga mu Nyanja ya Galilaya. Ni, “Umwami w’ijuru n’isi” nk’uko Yesu yavuze (Mat 11:25). Ibindi byanditswe byerekana uburyo Imana ifite ubutware ku biriho byose, reba Yos. 10:11; Yobu 38:22-38; Yer. 5:24; 10:13; 31:35; Zab. 78:45-49; 105:16; 107:33-37; 135:6-7; 147:7-8,15-18; Mat. 5:45; Ibyak 14:17.

Hari ibibazo bike dufitiye ibisubizo

(A Few Questions Answered)

Mbese iyo Imana ihana abantu ibateza inzara, imyuzure, imishyitsi y’isi, ni icyaha ko twebwe nk’abantu bahagarariye Imana mu isi, dutabara abantu bari mu kaga k’ibihano batejwe n’Imana?

Oya rwose. Tugomba kumenya ko Imana ikunda abantu bose, harimo n’abo iha ibihano. Nubwo bishobora kudutangaza cyane, ariko ibihana itanga mu guteza ibīza, mu byukuri bigaragaza urukundo rwayo. Ibyo bishoboka bite? Mu miruho n’ibibazo biterwa n’ibīza, Imana iba iburira abantu ikunda ko ari Imana ikiranuka igahana ibyaha, kandi ko icyaha kigira ingaruka. Imana ijya ireka hakabaho umubabaro w’igihe gito kugira ngo abantu bashobore gukanguka babone ko bakeneye Umukiza–kugira ngo bazashobore kurokoka inyanja yaka umuriro. Urwo ni urukundo!

Kugeza igihe cyose umuntu aba agihumeka, Imana ikomeza kumugaragariza imbabazi nyinshi kandi agera igihe akihana. Mu buryo bw’impuhwe no gufasha abagezweho n’umujinya w’Imana w’akanya gato, nyamara bakaba bashobora kurokoka umujinya wayo w’iteka, dushobora kubagaragariza urukundo rw’Imana. Ibīza biduha uburyo bwiza bwo kugera ku bantu Yesu yapfiriye.

Mbese kugeza ubutumwa bwiza ku bantu si cyo kintu cy’ingenzi cyane muri ubu buzima? Iyo turebye ibintu ku buryo bw’iteka ryose, tubona ko imibabaro iterwa n’ibīza ari ubusa ugereranyije n’imibabaro abazatabwa mu nyanja y’umuriro bazahura na yo.

Birazwi ko muri rusange abantu bakira ubutumwa bwiza igihe bari mu mubabaro. Hari ingero nyinshi muri Bibiliya zibigaragaza, kuva ku kwihana kw’Abisirayeli mu gihe bakandamizwaga n’amahanga abakikije, kugeza ku nkuru ya Yesu ya wa mwana w’ikirara. Abakristo bakwiriye kubona ibīza nk’igihe ibisarurwa biba byeze cyane bikwiriye gusarurwa.

Reka Tuvuge Ukuri

(Let’s Tell the Truth)

Ariko se dukwiriye kubwira ubuhe butumwa abantu baba bagerageza kongera gutangira ubuzima nyuma yo gusigwa iheruheru n’inkubi y’umuyaga cyangwa umushyitsi w’isi? Twabasubiza dute igihe batubajije icyatumye Imana ireka ibyo bikababaho? Dukwiye kuvugisha ukuri ku byo BIbiliya ivuga, tukabwira abantu ko Imana ikiranuka kandi ko ibyaha byabo bigira ingaruka. Tubabwire ko guhinda k’umuyaga guteye ubwoba bumvise ari agace gato cyane kerekana imbaraga zitangaje Imana ifite, kandi ko ubwoba bagize igihe inzu yabo yatigitaga ntaho bihuriye n’ubwoba bukomeye buzabafata bajugunywa mu muriro. Kandi tugomba kubabwira ko nubwo twese twari dukwiriye gutabwa muri gehinomu, ko Imana mu mbabazi zayo iduha igihe cyo kwihana no kwizera Yesu, ari we dushobora gukirizwamo umujinya w’Imana.

“Ariko ntidukwiye gutera abantu ubwoba tubakangisha Imana, si byo?” Ni ko bamwe babaza. Igisubizo kiri muri Bibiliya: “Gutinya/kūbaha Uwiteka ni ishingiro ryo kumenya” (Imig. 1:7). Iyo umuntu ataratinya Imana, mu byukuri nta kintu aba arakamenya.

None se Abantu Barakariye Imana?

(What if People Become Angry With God?)

None se nti hari abantu bashobora kurakarira Imana kubera imibabaro? Birashoboka, ariko tugomba kubafasha mu bugwaneza kubona ubwibone bwabo. Nta muntu n’umwe ufite uburenganzira bwo kwitotombera Imana, kuko twese twakabaye twaramaze kujugunywa muri gehinomu kera. Abantu aho gutuka Imana ku bw’ibyago bakwiriye kuyihimbaza bayishimira urukundo rwinshi ibakunda kugira ngo ibabūrire. Imana ifite uburenganzira bwose bwo kuba yareka umuntu uwo ari we wese agakurikira inzira y’irari rye izamugeza mu muriro. Ariko Imana ikunda abantu kandi irabahamagara uko bukeye ngo bave mu bibi. Ibahamagara bucece mu kubumbura kw’indabyo z’ibiti, mu kuririmba kw’inyoni, mu bwiza bw’imisozi, no mu kurabagirana kw’uduhumbi n’uduhumbagiza tw’inyeyeri zo ku ijuru. Irabahamagara mu ijwi ry’umutima-nama wabo, biciye no mu nzu yayo itorero, no mu Mwuka Wera wayo. Ariko ntibita ku guhamagara kwayo.

Nta gushidikanya ko atari ubushake bw’Imana ko abantu bababara, ariko iyo bakomeje kutayitaho, irabakunda cyane ku buryo ikoresha uburyo bukomeye nk’ubwo bwo kubababaza kugira ngo bayihindukirire bayitege amatwi. Inkubi z’imiyaga, ibishyitsi, imyuzure n’inzara ni bumwe muri ubwo buryo bukomeye. Imana iba yiringiye ko ibyago nk’ibyo bishobora gucisha bugufi ubwibone bw’abantu bigatuma basubiza amaso inyuma bakibaza.

Mbese Imana Irarenganya Mu Guhana Kwayo

(Is God Unfair in His Judgment?)

Iyo tureba Imana n’isi yacu mu buryo bwa Bibiliya, ubwo ni bwo gusa tuba dutekereza uko bikwiriye. Bibiliya yerekana ko twese twari tugenewe umujinya w’Imana, ariko ko Imana igira imbabazi. Igihe abantu bari mu kaga bavuga ko atari uko Imana yari ikwiriye kubagira, nta kabuza birayibabaza. Buri wese mu byukuri ahabwa imbabazi zirenze izo yari akwiriye.

Muri uwo murongo, Yesu yigeze kuvuga ku byago bibiri byo mu gihe cye. Dusoma mu butumwa bwiza bwa Luka ngo:

Muri icyo gihe hari abantu bari bahari bamutekerereza [Yesu] iby’Abanyagalilaya, abo Pilato yavangiye amaraso yabo n’ibitambo byabo. Yesu arabasubiza ati, ” Mbese mugira ngo abo Banyegalilaya bari abanyabyaha kuruta abandi Banyegalilaya, ubwo bababajwe batyo? Ndababwira yuko atari ko biri, ahubwo namwe nimutihana muzarimbuka mutyo mwese. Cyangwa se ba bandi cumi n’umunani, abo umunara w’i Silowamu wagwiriye ukabica, mugira ngo bari abanyabyaha kuruta abandi b’i Yerusalemu bose? Ndababwira yuko atari ko biri, ahubwo namwe nimutihana muzarimbuka mutyo mwese” (Luka 13:1-5).

Abanyagalilaya bishwe n’ukuboko kwa Pilato ntabwo bashoboraga kuvuga ngo, “Imana yaturenganyije kuko itadukijije Pilato!” Oya, bari abanyabyaha bakwiriye urupfu. Kandi nk’uko Yesu yavuze, Abanyegalilaya barokotse bari kuba bibeshye baramutse bihutiye kuvuga ko bari bafite ibyaha bike kurusha bagenzi babo bishwe. Ntacyo bari bakoze ngo gitume Imana ibishimira kurusha abo bapfuyeapfuye–ahubwo bagiriwe imbabazi ziruta izabo.

Ubutumwa bwa Kristo bwari busobanutse neza: “Mwese muri abanyabyaha. Icyaha kigira ingaruka. Muriho kubera imbabazi z’Imana. Nimwihane rero namwe igihe kitarabarengana.”

Yesu yashoje amagambo ye kuri ayo makuba aca umugani uvuga ku mbabazi z’Imana:

Kandi abacira uyu mugani ati: “Hariho umuntu wateye umutini mu ruzabibu rwe, bukeye araza awushakaho imbuto arazibura. Abwira umuhinzi ati, ‘Dore none uyu mwaka ni uwa gatatu, nza gushaka imbuto kuri uyu mutini sinzibone. Uwuce, uakomeza kunyunyuriza iki ubutaka?’ Na we aramusubiza ati, ‘Databuja, uwureke uyu mwaka na wo, nywuhingire, nywufumbire, ahari hanyuma wakwera imbuto. Icyakora nutera uzawuce'” (Luka 13:6-9).

Aha ni ho hagaragarira uko ubutabera bw’Imana n’imbabazi zayo bigendana. Ubutabera bw’Imana buravuga ngo, “Ca icyo giti kitagira icyo kimaze!” Ariko imbabazi zayo zikinginga ziti, “Oya, cyongere iminsi turebe ko cyakwera imbuto.” Umuntu wese udafite Kristo ameze nk’icyo giti.

Mbese Twacyaha Inkubi Z’imiyaga n’Imyuzure?

(Can We Rebuke Hurricanes and Floods?)

Ikibazo kimwe cya nyuma ku byerekeye ibīza: Mbese turamutse dufite kwizera guhagije, ntitwacyaha ibīza tukabihagarika ntibize?

Kugira kwizera guhagije ni ukwizera ibyo Imana yahishuye ko ari bwo bushake bwayo.Kwizera rero kugomba kuba gushingiye ku ijambo ry’Imana ubwayo bitabaye ibyo ntikuba ari ukwizera na gato, biba ari ibyiringiro cyangwa se ibyo umuntu yibwira gusa. Nta hantu na hamwe muri Bibiliya Imana iduha isezerano ry’uko tuzacyaha tugaturisha inkubi z’imiyaga, bityo rero nta buryo umuntu yagira kwizera ko kubikora(uretse igihe Imana mu butware bwayo yaba imuhaye uko kwizera).

Reka nongere mbisobanure neza. Uburyo buhari bwonyine kugira ngo umuntu agire kwizera gucyaha inkubi y’umuyaga ni igihe yaba azi neza ko Imana itashakaga guteza ahantu runaka iyo nkubi y’umuyaga. Kuko nk’uko twabibonye muri BIbiliya, Imana ni yo ifirte ubutware ku muyaga bityo ni yo iteza incubi z’imiyaga zirimbura. Ni yo mpamvu rero bidashoboka ko umuntu yagira kwizera kutajegajega ko yahagarika inkubi y’umuyaga kandi Imana ubwayo yategetse ko bibaho! Keretse gusa Imana yahinduye gahunda yayo ku nkubi y’umuyaga yendaga guteza, kandi ibyo ishobora kubikora isubiza gusenga k’umuntu wayinginze ngo igire imbabazi, cyangwa se igihe abantu yendaga guhana bihannye (aha umuntu yibuka inkuru ya Ninewi igihe cya Yona). Ariko nubwo Imana yahindura gahunda yayo, ntawagira kwizera ko gucyaha inkubi y’umuyaga ngo ayiturishe keretse uwo muntu yamenye ko Imana yahinduye gahunda yayo kandi akamenya ko ishaka ko acyaha agaturisha uwo muyaga.

Umuntu umwe wenyine wacyashye agaturisha umuyaga w’ishuheri ni Yesu. Uburyo bumwe gusa buhari bwo kugira ngo hagire uwo ari we wese muri twe wabikora ni uko Imana yaba imuhaye “impano yo kwizera,” ( cyangwa impano yo “kwizera kudasanzwe” nk’uko rimwe na rimwe yitwa), imwe mu mpano icyenda z’Umwuka zanditse mu 1 Abakorinto 12:7-11. Nk’uko bimeze ku mpano z’Umwuka zose, impano yo kwizera ntikora nk’uko twe dushaka, ahubwo ni nk’uko Umwuka ashaka gusa (reba 1 Kor. 12:11). Nuko rero, igihe Imana itaguhaye kwizera kudasanzwe ko gucyaha inkubi y’umuyaga iteye, ntukwiye kuguma mu nzira yawo, ngo uhagaze mu kwizera. Ukwiye kuva mu nzira ngo utaguhitana! Nakugira inama kandi ko wasenga kugira ngo Imana ikurinde, kandi ukayitakambira ngo igirire imbabazi abo bantu yari izaniye ibihano, ugasenga ngo irinde ubugingo bwabo kugira ngo bongererwe igihe cyo kwihana.

Urabona ko igihe Pawulo yari mu bwato agana i Roma bamaze ibyumweru bibiri bateshwa icyerekezo n’ishuheri ikomeye, atigeze akangara uwo muyaga ngo utuze (reba Ibyak 27:14-44). Impamvu atabikoze ni uko atari abishoboye. Kandi urabona ko Imana yagiriye imbabazi abari bari mu bwato bose, kuko bose uko ari 276 bararokotse igihe ubwato bwarohamaga (reba Ibyak 27:24, 34, 44). Ndibwira ko Imana yabagiriye imbabazi bitewe n’uko Pawulo yabasengeye akayitakambira ngo ibagirire imbabazi.

---

[1] Ibitekerezo bivuguruza bibiri byarashubijwe: (1) Yuda avuga impaka zabaye hagati ya Mikayeli na Satani bahanganiye ku murambo wa Mose, ariko ntaho avuga ko barwanye rwose. Mu byukuri Yuda atubwira ko Mikayeli “atahangaye gucira urubanza Satani amuvuma, ahubwo yaramubwiye ati, ‘Umwami Imana aguhane'” (Yuda 1:9). (2) Igihe Elisa n’umugaragu we bari bagoswe n’ingabo z’Abasiriya mu mudugudu wa Dotani, Elisa yasenze Imana ngo ihumure amaso y’umugaragu we (2 Abami 6:15-17). Icyakurikiyeho ni uko umugaragu we yabonye “amafarashi n’amagare by’umuriro” dutekereza ko abari bari kuri ayo mafarashi ari ingabo z’abamarayika mu isi y’umwuka. Nyamara ibi ntibyerekana ko aba bamarayika bari bamaze cyangwa bagiye kurwana n’abadayimoni. Rimwe na rimwe abamarayika Imana ijya ibakoresha mu gusohoza uburakari bwayo ku bantu babi; urugero ni igihe marayika umwe yatsembaga ingabo z’Abasiriya 185,000 nk’uko byanditse mu 2 Abami 19:35.

[2] Urugero, reba Mat. 1:20; 2:13,19; 4:11; Luka 1:11-20, 26-38.

[3] Iki gice cyose kirerekana kandi ko Yobu “atakinguriye Satani umuryango kubera ubwoba bwe” nk’uko bamwe bakunze kwibwira. Imana ubwayo ni yo yabwiye ibya Yobu muri 2:3: “Yakomeje [Yobu] gukiranuka kwe n’ubu, nubwo wanteye kumugirira nabi nkamuhora agatsi.” Ibi mbivugaho mu buryo bunonosoye mu gitabo cyanjye nise God’s Tests (Kugeragezwa n’Imana), pp. 175-181, kandi kiboneka mu rurimi rw’Icyongereza ku rubuga rwacu rwa interineti (www.shepherdserve.org).

[4] Reba kandi 1 Abakorinto 10:13, byerekana ko Imana ishyiraho umurongo ntarengwa ku kugeragezwa kwacu, bikerekana ko ishyiriraho umurongo nyirukutugerageza ari we Satani.

[5] Mbese ibi biravuga ko tutagomba gusengera abategetsi, cyangwa ngo tujye mu matora gutora abayobozi, kuko tuzi ko Imana yimika uwo ishatse? Oya, muri demokarasi, umujinya w’Imana urimīrwa. Duhabwa uwo twatoye, kandi ubusanzwe abantu babi batora ababi nka bo. Ku bw’iyo mpamvu abakiranutsi bakwiye gutora. Byongeye kandi, mu Isezerano rya Kera no mu Isezerano Rishya, hose dusabwa gusengera abadutegeka (Yer. 29:7; 1 Tim. 2:1-4), ibyo bikerekana ko dushobora kugira uruhare mu buryo Imana igena abo yimika. Bitewe n’uko rimwe na rimwe igihano cy’Imana kiza mu buryo bw’abategetsi babi, kandi bitewe n’uko ibihugu byinshi biba bikwiriye guhanwa, dushobora gutakambira Imana kandi ikatwumva, kugira ngo igihugu cyacu by’umwihariko kitagerwaho n’ibigikwiriye byose.

[6] Ibindi byanditswe byerekana ko Imana ari yo ifite ubutware ku muyaga ni: Itang. 8:11; Kuva 10:13,19; 14:21; 15:10; Kub. 11:31; Zab. 48:7; 78:76; 135:7; 147:18; 148:8; Yes. 11:15; 27:8; Yer. 10:13; 51:16; Ezek. 13:11,13; Amosi 4:9,13; Yona 4:8; Hag. 2:17. Inyinshi muri izi ngero ni aho Imana yakoresheje umuyaga mu buryo bwo guhana.

[7] Ibindi byanditswe byerekana ko Imana ari yo iteza amapfa, reba Guteg. 32:23-24; 2 Sam. 21:1; 24:12-13; 2 Abami 8:1; Zab 105:16; Yes. 14:30; Yer. 14:12,15-16; 16:3-4; 24:10; 27:8; 34:17; 42:17; 44:12-13; Ezek. 5:12,16-17; 6:12; 12:16; 14:21; 36:29; Ibyah. 6:8; 18:8). Yesu ubwe na we yavuze ko Imana “igusha imvura ku bababi n’abeza” (Mat 5:45). Imana ni yo igenga imvura.